കൊച്ചി: തെലങ്കാന സര്‍ക്കാരുമായി ധാരണ പത്രം (Memorandum of Understanding (MoU) ഒപ്പിട്ടതായി കിറ്റെക്സ് ഗ്രൂപ്പ് അറിയിച്ചു. കിറ്റെക്സിന്റെ വ്യവസായ സംരഭമായ വാറങ്കല്‍ മെഗാ ടെക്സ്റ്റൈല്‍ പ്ലാന്‍റ് തുടങ്ങുന്നതിന്‍റെ ഭാഗമായാണ് ഉടമ്പടി. 3500 കോടിയുടെ പദ്ധതിയാണിത്. കിറ്റെക്സ് ഗ്രൂപ്പ് എം.ഡി സാബു എം ജേക്കബും തെലങ്കാന വ്യവസയായ വകുപ്പ് പ്രിന്‍സിപ്പല്‍ സെക്രട്ടറി ജയേഷ് രഞ്ജനും പങ്കെടുത്ത ചടങ്ങിലാണ് ധാരണ പത്രം ഒപ്പിട്ടത്.
വ്യവസായ വകുപ്പ് മന്ത്രി കെ.ടി രാമ റാവുവുമായി അടുത്തിടെ കിറ്റെക്സ് ഗ്രൂപ്പ് എം.ഡി ചര്‍ച്ച നടത്തിയിരുന്നു. ഇതിന്‍റെ അടിസ്ഥാനത്തിലാണ് സംസ്ഥാനത്ത് വ്യവസായം ആരംഭിക്കുന്നതിന് കിറ്റെക്സ് ഗ്രൂപ്പ് തയ്യാറായത്.
കുടുല്‍ വിവരങ്ങള്‍ ശനിയാഴ്ച
തെലങ്കാന സര്‍ക്കാര്‍ നിരവധ വാഗ്ദാനങ്ങളാണ് കിറ്റെക്സിന് നല്‍കിയത്. ഇതിന്‍റെ വിശദാംശങ്ങള്‍ വരും ദിവസങ്ങളില്‍ പുറത്തുവിടും. അനാവശ്യമായുള്ള റെയ്ഡുകള്‍ ഉണ്ടാകില്ലെന്നാണ് പ്രധാന വാഗ്ദാനം. ജോലി തടസപ്പെടുത്തുന്ന നടപടികള്‍ സംസ്ഥാന സര്‍ക്കാറിന്‍റെ ഭാഗത്തു നിന്ന് ഉണ്ടാകില്ല, പരിശോധനകള്‍ നടത്തുന്നതിനു മുന്‍പ് ഉദ്യോഗസ്ഥര്‍ കമ്പനിയെ വിവരങ്ങള്‍ അറിയിക്കും തുടങ്ങി വിവിധ തരത്തിലുള്ള ഉറപ്പുകള്‍ കമ്പനിക്ക് ലഭിച്ചിരുന്നു.
ജൂലൈയില്‍ കിറ്റെക്സ് കമ്പനിയുടെ ഉദ്യോഗസ്ഥര്‍ക്ക് എത്താനായി പ്രത്യേക വിമാനം അടക്കം തെലങ്കാന സര്‍ക്കാര്‍ സജ്ജമാക്കിയിരുന്നു. ശേഷം ഹെലികോപ്റ്ററിലാണ് ഉദ്യോഗസ്ഥരെ വാറങ്കലിലേക്ക് സര്‍ക്കാര്‍ എത്തിച്ചത്. കമ്പനി തുടങ്ങിയാല്‍ രണ്ടോ മൂന്നോ വർഷത്തിലൊരിക്കൽ മാത്രമേ പരിശോധനകൾ നടക്കുകയുള്ളു. അതും പ്രിൻസിപ്പൽ സെക്രട്ടറിയുടെയോ അല്ലെങ്കിൽ ബന്ധപ്പെട്ട മന്ത്രിയുടെ അനുമതിയോടെയായിരിക്കും.
ഇത് മുന്‍കൂട്ടി കമ്പനിയെ അറിയിക്കും. കമ്പനിയുടെ അനുമതിയും സൗകര്യവും അനുസരിച്ചായിരിക്കും പരിശോധന നടത്തുകയെന്നും തെലങ്കാന സര്‍ക്കാര്‍ ഉറപ്പു നല്‍കിയതായി കമ്പനി എം.ഡി പറഞ്ഞു.
ഇടതുസര്‍ക്കാര്‍ ഉപദ്രവിച്ചെന്ന് കിറ്റെക്സ് എം.ഡി
പരിശോധനയില്‍ കണ്ടെത്തുന്ന ഏത് ന്യൂനതയും കമ്പനി പരിഹരിക്കും. സര്‍ക്കാര്‍ തലത്തില്‍ കമ്പനിയെ അപകീര്‍ത്തിപ്പെടുത്തുന്നത് വ്യവസായത്തെ വലിയ രീതിയില്‍ ബാധിക്കുന്നുണ്ട്. കേരളത്തിലെ തന്‍റെ കമ്പനിക്കെതിരെ ഇടത് സര്‍ക്കാര്‍ വലിയ രീതിയില്‍ പരിശോധനകള്‍ നടത്തിയിരുന്നു. നാല് കോണ്‍ഗ്രസ് എം.എല്‍.എമാരുടെ പരാതിയുടെ കൂടി അടിസ്ഥാനത്തിലായിരുന്നു ഉദ്യോഗസ്ഥരുടെ നടപടി.
30 ദിവസത്തിനിടെ 11 റെയ്ഡുകളാണ് കമ്പനിയില്‍ നടത്തിയത്. മനുഷ്യാവകാശ കമ്മീഷൻ ഉള്‍പ്പെടെയുള്ള സംവിധാനങ്ങള്‍ ഉപയോഗിച്ചായിരുന്നു പരിശോധനകള്‍. കേരള ഹൈക്കോടതിയുടെയും സര്‍ക്കാറിന്‍റെ ഭാഗത്തുനിന്നും വ്യവസായത്തിന് അനുകൂലമായ നിലപാട് ഉണ്ടായില്ല. ഇതിനാലാണ് കേരളത്തില്‍ നിന്നും തന്‍റെ 35000 കോടിയുടെ പദ്ധതികള്‍ പിന്‍വലിക്കാന്‍ കമ്പനി തയ്യാറായതെന്നും അദ്ദേഹം കൂട്ടിച്ചേര്‍ത്തു.
അതേസമയം കിറ്റെക്സിന്റെ വാദങ്ങളോട് തുറന്ന സമീപമാണ് തങ്ങള്‍ക്കുള്ളതെന്നായിരുന്നു കേരള സര്‍ക്കാറിന്‍റെ മറുപടി.
കൂടുതല്‍ വായനക്ക്: നർക്കോട്ടിക് ജിഹാദ് വിവാദം: മതനിരപേക്ഷത നിലനിർത്താൻ സർക്കാർ ഇടപെടൽ നിർദേശിച്ച് സിപിഎം
