തൃശ്ശൂർ: നിപ വൈറസ് ബാധ സംശയിക്കുന്ന സാഹചര്യത്തില്‍ തൃശ്ശൂരില്‍ 34 പേർ നിരീക്ഷണത്തിൽ. കൊച്ചിയില്‍ ചികിത്സയിൽ കഴിയുന്ന യുവാവുമായി അടുത്തിടപഴകിയവര്‍ക്കാണ് ആരോഗ്യ വകുപ്പ് നിരീക്ഷണത്തിൽ ഏർപ്പെടുത്തിയത്.
പഠനത്തിന്റെ ഭാഗമായുള്ള തൊഴിൽ പരിശീലനത്തിനായി തൃശ്ശൂരിൽ എത്തിയ യുവാവിന് മുമ്പേ പനിയുണ്ടായിരുന്നു. തലച്ചോറിനെ ബാധിക്കുന്ന നിപ രോഗലക്ഷണങ്ങളാണ് രോഗിക്ക് ഉള്ളത്. ഇയാൾ താമസിച്ചിരുന്ന തൃശ്ശൂരിലെ മുറിയിൽ ഒപ്പമുണ്ടായിരുന്ന അഞ്ച് പേരും അടങ്ങുന്ന 34 പേരും ജില്ലക്ക് പുറത്തുള്ള 16 പേരുമാണ്‌ ഇപ്പോൾ ആരോഗ്യ വകുപ്പിന്റെ നിരീക്ഷണത്തിൽ ഉള്ളത്.
യുവാവ് തൃശ്ശൂരിലെ സ്വകാര്യ ആശുപത്രിയിൽ ചികിത്സ തേടിയിരുന്നതായി വിവരം ലഭിച്ചിട്ടുണ്ട്. അതിനാൽ അന്നേ ദിവസം ആശുപത്രിയിലെത്തിയ ഡോക്ടർമാരെയും ആരോഗ്യ പ്രവർത്തകരെയും രോഗികളെയും നിരീക്ഷണത്തിൽ കൊണ്ടുവരും. ഇപ്പോഴത്തെ നിരീക്ഷണം ജൂൺ അവസാനം വരെ നീളുമെന്നും തൃശ്ശൂര്‍ ഡിഎംഒ കെ ജെ റീന പറഞ്ഞു.
തൃശ്ശൂരിൽ നിപ വൈറസ് സ്ഥിരീകരിച്ചാൽ നേരിടേണ്ട നടപടികളും മുൻകരുതലുകളും ചർച്ചചെയ്യുന്നതിനായി ജില്ലാ കലക്ടർ ടി വി അനുപമയുടെ അധ്യക്ഷതയിൽ ക്യാമ്പ് ഓഫീസിൽ അവലോകന യോഗം ചേർന്നു.
