ദുബായ്: ബിസിസിഐ പ്രസിഡന്‍റ് സൗരവ് ഗാംഗുലിയെ ശരിവെച്ച് ഏഷ്യന്‍ ക്രിക്കറ്റ് കൗണ്‍സിലും. ഈ വര്‍ഷം ഏഷ്യ കപ്പ് നടക്കില്ലെന്ന് കൗണ്‍സില്‍ പ്രസ്‌താനവയിലൂടെ വ്യക്തമാക്കി. ഏഷ്യന്‍ ക്രിക്കറ്റ് കൗണ്‍സില്‍ യോഗത്തിന് ശേഷമാണ് തീരുമാനം. അടുത്ത വര്‍ഷം ടൂര്‍ണമെന്‍റ് നടത്താനാകുമെന്ന പ്രതീക്ഷയും കൗണ്‍സില്‍ അംഗങ്ങള്‍ മുന്നോട്ട് വെച്ചു. കൗണ്‍സില്‍ യോഗത്തിന് മുന്നോടിയായി ഇന്നലെ സൗരവ് ഗാംഗുലി ഈ വര്‍ഷത്തെ ഏഷ്യാകപ്പ് റദ്ദാക്കിയതായി ഒരു അഭിമുഖത്തില്‍ വ്യക്തമാക്കിയിരുന്നു.
കൊവിഡ് 19 പശ്ചാത്തലത്തില്‍ 2020ല്‍ നടക്കേണ്ടിയിരുന്ന ഏഷ്യാകപ്പുമായി ബന്ധപ്പെട്ട് പല തവണ എസിസിയുടെ എക്‌സിക്യുട്ടീവ് കമ്മിറ്റി യോഗം ചേര്‍ന്നിരുന്നു. മഹാമാരിയുടെ പശ്ചാത്തലത്തില്‍ കളിക്കാരുടെ ഉള്‍പ്പെടെ സുരക്ഷയും യാത്രാ നിയന്ത്രണങ്ങളും ടീം അംഗങ്ങളെ ക്വാറന്‍റൈനില്‍ പാര്‍പ്പിക്കേണ്ടതും കണക്കിലെടുത്താണ് ടൂര്‍ണമെന്‍റ് മാറ്റിവെച്ചത്.
ഈ വര്‍ഷം പാകിസ്ഥാനില്‍ നടക്കേണ്ടിയിരുന്ന ഏഷ്യാകപ്പ് ഇന്ത്യയുടെ എതിര്‍പ്പിനെ തുടര്‍ന്ന് നിഷ്‌പക്ഷ വേദിയായ യുഎയിലേക്ക് മാറ്റിയിരുന്നു. കൊവിഡ് 19 പശ്ചാത്തലത്തില്‍ 2021 ജൂണില്‍ ടൂര്‍ണമെന്‍റ് നടത്താനാകുമെന്ന പ്രതീക്ഷയിലാണ് എസിസി.
