ദുബായ്: ഐപിഎല്‍ ഫൈനലില്‍ നിലവിലെ ചാമ്പ്യന്‍മാരായ മുംബൈ ഇന്ത്യന്‍സിനെ നേരിടാന്‍ ഇറങ്ങുന്ന ഡല്‍ഹി ക്യാപിറ്റല്‍സിന്‍റെ ആവനാഴിയിലെ അസ്‌ത്രങ്ങള്‍ ഓരോന്നും പ്രവചനാതീതം തന്നെയാണ്. ശ്രേയസ് അയ്യര്‍ നയിക്കുന്ന ടീമില്‍ അധികവും അന്താരാഷ്‌ട്ര ക്രക്കറ്റിലെ വളര്‍ന്നുവരുന്ന താരങ്ങളാണ്. കൊവിഡിനെ അതിജീവിച്ച് തുടങ്ങിയ ഐപിഎല്ലില്‍ നിലവിലെ ചാമ്പ്യന്‍മാരായ മുംബൈ ഇന്ത്യന്‍സ് എന്തുകൊണ്ടും ആധികാരിക ജയമാണ് സ്വന്തമാക്കിയത്. മറുവശത്ത് ഡല്‍ഹി ക്യാപിറ്റല്‍സ് അനിശ്ചിതത്വങ്ങള്‍ക്ക് നടുവില്‍ നിന്ന് പോരടിച്ച് ജയിച്ചാണ് ഫൈനല്‍ യോഗ്യത സ്വന്തമാക്കിയത്. ഫൈനല്‍ മത്സരം ഡല്‍ഹിയുടെ വരുതിയിലാക്കാന്‍ സാധിക്കുന്ന അഞ്ച് താരങ്ങള്‍ ഇതാ.
കാസിഗോ റബാദ
ഈ ദക്ഷിണാഫ്രിക്കന്‍ പേസര്‍ ഐപിഎല്‍ 13ാം സീസണിലെ നമ്പര്‍ വണ്‍ വിക്കറ്റ് വേട്ടക്കാരനാണ്. പ്രതീക്ഷക്കൊത്ത് ഉയര്‍ന്ന പേസര്‍ ഡല്‍ഹിക്ക് വേണ്ടി സീസണില്‍ 29 വിക്കറ്റുകളാണ് വീഴ്‌ത്തിയത്. ലീഗ് തലത്തില്‍ ആദ്യ പകുതിയില്‍ ഡല്‍ഹിക്ക് മേല്‍ക്കൈ നല്‍കി കൊടുക്കുന്നതില്‍ ഈ വലം കൈയന്‍ പേസറുടെ സാന്നിധ്യം നിര്‍ണായകമായിരുന്നു. എതിര്‍ ടീമിലെ പ്രധാന ബാറ്റ്സ്‌മാന്‍മാരുടെ വിക്കറ്റെടുത്തിരുന്നത് പലപ്പോഴും റബാദയായിരുന്നു. ഫൈനല്‍ മത്സരത്തില്‍ റബാദയുടെ പ്രകടനം ഡല്‍ഹിക്ക് നിര്‍ണായകമാകും.
ശിഖര്‍ ധവാന്
സീസണില്‍ ഇതിനകം രണ്ട് സെഞ്ച്വറി അടക്കം 603 റണ്‍സാണ് ഈ ഡല്‍ഹി ഓപ്പണറുടെ പേരിലുള്ളത്. ഐപിഎല്ലിലെ ഈ സീസണില്‍ രണ്ടാമത്തെ വലിയ വിക്കറ്റ് വേട്ടക്കാരനാണ് ധവാന്. അന്താരാഷ്‌ട്ര ക്രിക്കറ്റില്‍ പരിചയ സമ്പന്നനായ ബാറ്റ്സ്മാന് എന്ന നിലക്ക് ഡല്‍ഹിക്ക് വേണ്ടി ഫൈനല്‍ മത്സരത്തില്‍ ധവാന്‍റെ സംഭാവന നിര്‍ണായകമാകും. ജസ്‌പ്രീത് ബുമ്രയുടെയും ട്രെന്‍ഡ് ബോള്‍ട്ടിന്‍റെയും ന്യൂ ബോള്‍ ആക്രമണങ്ങളെ തടുക്കാന്‍ ധവാന്‍റെ സാന്നിധ്യം ഡല്‍ഹിക്ക് അനിവാര്യമാണ്.
മാര്‍ക്കസ് സ്റ്റോണിയസ്
ഓസ്‌ട്രേലിയന്‍ ഓള്‍റൗണ്ടര്‍ മാര്‍ക്കസ് സ്റ്റോണിയസ് സീസണില്‍ ഇതിനകം ഡല്‍ഹിക്ക് വേണ്ടി 12 വിക്കറ്റുകളും 352 റണ്‍സും സ്വന്തം അക്കൗണ്ടില്‍ കുറിച്ചിട്ടുണ്ട്. സീസണില്‍ എതിരാളികളെ സംബന്ധിച്ചെടുത്തോളം അപകടകാരിയാണ് സ്റ്റോണിയസ്. ഡല്‍ഹിയുടെ ജയങ്ങളില്‍ അദ്ദേഹം നിര്‍ണായ പങ്ക് വഹിച്ചിട്ടുണ്ട്. സീസണില്‍ ആദ്യ പകുതിയില്‍ സ്റ്റോണിയസ് ഫോമിലായിരുന്നു. പക്ഷേ രണ്ടാം പകുതിയില്‍ മോശം ഫോമിലേക്ക് സ്റ്റോണിയസ് വഴുതിവീണത് ഡല്‍ഹിക്ക് തിരിച്ചടിയായി. എന്നാല്‍ രണ്ടാം ക്വാളിഫയറില്‍ ടീം മാനേജ്മെന്‍റ് ഏല്‍പിച്ച ചുമതല അദ്ദേഹം ഭംഗിയായി നിര്‍വഹിച്ചു. ഹൈദരാബാദിന് എതിരെ അബുദാബിയില്‍ നടന്ന മത്സരത്തില്‍ ഓപ്പണറായി ഇറങ്ങി ഡല്‍ഹിക്ക് അദ്ദേഹം നല്ല തുടക്കം സമ്മാനിച്ചു.
ശ്രേയസ് അയ്യര്‍
ഓപ്പണര്‍ ശിഖര്‍ ധവാന് ശേഷം ഡല്‍ഹിയുടെ രണ്ടാമത്തെ റണ്‍വേട്ടക്കാരനാണ് നായകന്‍ കൂടിയായ ശ്രേയസ് അയ്യര്‍. ഡല്‍ഹിക്ക് വേണ്ടി ഈ വലങ്കയ്യന്‍ ബാറ്റ്സ്മാന് 16 മത്സരങ്ങളില്‍ നിന്നായി 454 റണ്‍സാണ് അടിച്ച് കൂട്ടിയത്. അതേസമയം മുംബൈയുടെ പേസ് ആക്രമണത്തെ അതിജീവിക്കുക ഡല്‍ഹിയുടെ ഈ പുതുമുഖ ഇന്ത്യന്‍ ബാറ്റ്സ്മാന് വെല്ലുവിളിയാകും. പേസ് ആക്രണത്തെ പ്രതിരോധിച്ച് സ്‌പിന്നര്‍മാരെ അടിച്ച് കളിക്കാനാകും കലാശപ്പോരില്‍ ശ്രേയസിന്‍റെ നീക്കം.
ആന്‍ട്രിച് നോട്രിജെ
ഡല്‍ഹിയുടെ പേസ് ആക്രണത്തിന്‍റെ മൂര്‍ച്ച കൂട്ടുന്ന മറ്റൊര ദക്ഷിണാഫ്രിക്കന്‍ പേസറാണ് ആന്‍ട്രിച് നോട്രിജെ. ഈ സീസണിലാണ് നോട്രിജെ ഡല്‍ഹിയുടെ ഭാഗമാകുന്നത്. സീസണില്‍ ഇതിനകം 15 മത്സരങ്ങളില്‍ നിന്നായി ദക്ഷിണാഫ്രിക്കന്‍ പേസര്‍ 20 വിക്കറ്റുകള്‍ അക്കൗണ്ടിലാക്കി കഴിഞ്ഞു. ഡല്‍ഹിയില്‍ എത്തി ആദ്യ സീസണില്‍ തന്നെ പ്രതീക്ഷക്ക് ഒത്ത് ഉയരാന്‍ സാധിച്ചതിന്‍റെ ആത്മിവിശ്വാസം ഫൈനലില്‍ താരത്തിന് ഗുണം ചെയ്‌തേക്കും.
