'പ്രധാനമന്ത്രിയെ വിമര്‍ശിച്ചാല്‍ ദേശ വിമര്‍ശനത്തിന് തുല്യം': ജെ പി നദ്ദ

ഇന്ത്യയ്‌ക്കെതിരെ പരാമര്‍ശങ്ങള്‍ ഉന്നയിക്കുന്നത് കോണ്‍ഗ്രസിന്‍റെ സംസ്‌കാരമാണെന്നും മോദിയെ വിമർശിക്കുന്നവർ രാജ്യത്തെയാണ് വിമർശിക്കുന്നത് എന്നോർക്കണമെന്നും നദ്ദ പറഞ്ഞു.

ന്യൂഡൽഹി: രാജ്യം ചരിത്രനേട്ടങ്ങള്‍ സ്വന്തമാക്കുമ്പോഴെല്ലാം ഇന്ത്യയ്‌ക്കെതിരെ പരാമര്‍ശങ്ങള്‍ ഉന്നയിക്കുന്നത് കോണ്‍ഗ്രസിന്‍റെ സംസ്‌കാരമാണെന്ന് ബിജെപി ദേശീയ അധ്യക്ഷന്‍ ജെപി നദ്ദ ആരോപിച്ചു. പ്രധാനമന്ത്രി നരേന്ദ്ര മോദിയെ വിമർശിക്കുമ്പോൾ രാജ്യത്തെ തന്നെയാണ് കോൺഗ്രസ് അപമാനിക്കുന്നത്. പാർട്ടി തരം താഴ്ന്ന രാഷ്ട്രീയത്തിലേക്ക് മാറിയെന്നും ബിജെപി അധ്യക്ഷൻ ജെപി നദ്ദ പറഞ്ഞു. മധ്യപ്രദേശ് ബിജെപി പ്രവർത്തക സമിതി യോഗത്തിൽ സംസാരിക്കുകയായിരുന്നു നദ്ദ.

കമൽനാഥിന് വിമർശനം

"ഇന്ത്യ മികച്ചതല്ലെന്ന് കോൺഗ്രസ് നേതാവ് കമൽ നാഥ് പറഞ്ഞിരുന്നു. കമൽ നാഥ്ജി, നിങ്ങൾക്ക് ബിജെപിയെ എതിർക്കാൻ സ്വാതന്ത്ര്യമുണ്ട്, എന്നാൽ ഇന്ത്യയുടെ അന്തസ്സിനെയും പാരമ്പര്യത്തിനെയും അപമാനിക്കാനും തരം താഴ്ത്താനും നിങ്ങൾക്ക് അവകാശമില്ല. ആർട്ടിക്കിൾ 370, 35 എ എന്നിവയിൽ ദിഗ്‌വിജയ് സിംഗ് എന്താണ് ചിന്തിക്കുന്നത് എന്ന് ക്ലബ് ഹൗസ് ചാറ്റുകളിലൂടെ രാജ്യം മുഴുവൻ അറിയുന്നു", നദ്ദ പറഞ്ഞു.

ആർട്ടിക്കിൾ 370, 35 എ എന്നിവ നീക്കം ചെയ്യാൻ കോൺഗ്രസ് സർക്കാരിന് കഴിഞ്ഞില്ല, എന്നാൽ പ്രധാനമന്ത്രി മോദി തന്‍റെ ഇച്ഛാശക്തിയും ശക്തമായ രാഷ്ട്രീയ പ്രതിബദ്ധതയും കൊണ്ട് ഇവ നീക്കം ചെയ്തു. കേന്ദ്ര ആഭ്യന്തരമന്ത്രി അമിത് ഷായുടെ കാര്യക്ഷമമായ ആസൂത്രണം ഇവ രണ്ടും നിർത്തലാക്കുന്നതിന് കാരണമായി. ജമ്മു കശ്മീർ ഇന്ത്യയിൽ സമന്വയിപ്പിക്കുന്നതിന് ഇതൊരു കാരണവുമായി"ജെപി നദ്ദ ജമ്മു വിഷയത്തിൽ പ്രതികരിച്ചു.

മധ്യപ്രദേശിലെ കമൽനാഥ് ഭരണത്തെയും നദ്ദ വിമർശിച്ചു. "വെറും ഒന്നരവർഷത്തിനിടയിൽ, മധ്യപ്രദേശിലെ കോൺഗ്രസ് സർക്കാർ എങ്ങനെയാണ് കൊള്ളയടിക്കൽ വൻ അഴിമതി എന്നിവയിൽ ഏർപ്പെട്ടതെന്ന് ജനങ്ങൾ കണ്ടു. ആ കാലയളവിൽ എല്ലാ വികസന പ്രവർത്തനങ്ങളും നിലച്ചു,. സമൂഹത്തിലെ ഓരോ ജനവിഭാഗത്തെയും കോൺഗ്രസ് സർക്കാർ പറ്റിച്ചു" , നദ്ദ പറഞ്ഞു.

മധ്യപ്രദേശിലെ വികസനങ്ങൾ

കഴിഞ്ഞ ഒരു വർഷത്തിനിടെ രാജ്യത്ത് മെഡിക്കൽ ഇൻഫ്രാസ്ട്രക്ചർ വികസന രംഗത്ത് നടത്തിയ നല്ല പ്രവർത്തനങ്ങളെക്കുറിച്ച് നദ്ദ പാർട്ടിയുടെ മധ്യപ്രദേശ് നേതാക്കളോട് വിശദീകരിച്ചു. പ്രധാനമന്ത്രിയുടെ ശ്രമഫലമായി ഇന്ത്യയുടെ ഓക്സിജൻ ഉത്പാദനം ഒരാഴ്ചയ്ക്കുള്ളിൽ 900 മെട്രിക് ടണ്ണിൽ നിന്ന് 9,000 മെട്രിക് ടണ്ണായി ഉയർത്തി, ”അദ്ദേഹം പറഞ്ഞു.

മികച്ച വാക്സിനേഷൻ ഡ്രൈവ്

ലോകത്തിലെ ഏറ്റവും വലുതും വേഗതയേറിയതുമായ വാക്സിനേഷൻ പദ്ധതിയാണ് രാജ്യത്തെ കോവിഡ് വാക്സിനേഷൻ ഡ്രൈവ് എന്നും ഈ വർഷം ഡിസംബറോടെ 257 കോടി വാക്സിൻ ഡോസുകൾ ലഭ്യമാകുമെന്നും നദ്ദ വ്യക്തമാക്കി.

ജൂൺ 21 ന് 17.70 ലക്ഷം ഡോസ് വാക്സിനും ബുധനാഴ്ച 11 ലക്ഷം ഡോസ് വാക്സിനും നൽകിയതിന് മധ്യപ്രദേശ് സർക്കാരിനെ അദ്ദേഹം പ്രശംസിച്ചു. മധ്യപ്രദേശിലെ ശിവരാജ് സിംഗ് ചൗഹാൻ സർക്കാർ സംസ്ഥാനത്തിന്‍റെ വളർച്ചയ്ക്കും വികസനത്തിനും വേണ്ടി നടത്തിയ പ്രവർത്തനങ്ങളെയും നദ്ദ അഭിനന്ദിച്ചു.

ഭരണത്തിന്‍റെ വിവിധ വശങ്ങളിൽ മധ്യപ്രദേശ് ഒന്നാം സ്ഥാനത്തെത്തി. ഗോതമ്പ് സംഭരണത്തിൽ മധ്യപ്രദേശ് ഒന്നാം സ്ഥാനത്താണ്. പ്രധാനമന്ത്രി ഗ്രാമീൺ സഡക് യോജനയിൽ ഗുണനിലവാര നിലവാരം പുലർത്തുന്നു. പുള്ളിപ്പുലികളുടെ ജനസംഖ്യ വർധിപ്പിക്കുന്നതിൽ മധ്യപ്രദേശാണ് ഒന്നാം സ്ഥാനത്ത്, ”അദ്ദേഹം പറഞ്ഞു.