ന്യൂഡൽഹി: കൊവിഡ് വിട്ടൊഴിയുന്ന സാഹചര്യത്തിൽ ശനിയാഴ്‌ച മുതൽ ദേശീയ തലസ്ഥാനത്ത് എല്ലാവിധ നിയന്ത്രണങ്ങളോടും കൂടി ആരാധനലായങ്ങൾ തുറക്കുന്നു. കൊവിഡ് മാനദണ്ഡങ്ങൾ പാലിച്ച് ജനങ്ങൾക്ക് ആരാധനാലയങ്ങളിൽ പ്രവേശിക്കാൻ അനുമതി നൽകിയതായി ഡൽഹി ദുരന്തനിവാരണ അതോറിറ്റി (ഡിഡിഎംഎ) അറിയിച്ചു.
ഇവിടങ്ങളിലെ തിരക്ക് നിയന്ത്രിക്കാൻ പൊലീസിനെ ചുമതലപ്പെടുത്തിയതായും ഡിഡിഎംഎ അറിയിച്ചു. മാസ്‌ക് ധരിക്കണമെന്നും ആളുകൾ തമ്മിൽ കുറഞ്ഞത് ആറടി അകലം പാലിക്കണമെന്നും ഉത്തരവിൽ പറയുന്നു. കൊവിഡ് ലക്ഷണങ്ങളില്ലാത്തവർക്ക് മാത്രമാണ് പ്രവേശനാനുമതി. അതേസമയം ക്ഷേത്രങ്ങളിൽ പ്രസാദം വിതരണം ചെയ്യുന്നതും പള്ളികളിൽ വിശുദ്ധ തൈലം തളിക്കുന്നതും മറ്റും അനുവദനീയമല്ല.
ALSO READ:രാജ്യത്ത് 22,842 പേർക്ക് കൂടി COVID-19; 244 മരണം
രണ്ടാം തരംഗം വ്യാപകമായതോടെ ഏപ്രിൽ 19 മുതൽ ദേശീയ തലസ്ഥാനത്തെ ആരാധനാലയങ്ങൾ അടച്ചിട്ടിരിക്കുകയായിരുന്നു. ഉത്സവ സീസൺ കണക്കിലെടുത്ത് കൊവിഡ് മാനദണ്ഡങ്ങൾ കർശനമായി പാലിക്കുന്നുണ്ടെന്ന് ഉറപ്പുവരുത്തണമെന്ന് ഡിഡിഎംഎ ജില്ലാ മജിസ്ട്രേറ്റുമാർക്കും ഡെപ്യൂട്ടി കമ്മീഷണർമാർക്കും നിർദേശം നൽകിയിട്ടുണ്ട്.
