ഹൈദരാബാദ്‌: തിയേറ്ററുകളിൽ വ്യാഴാഴ്‌ച റിലീസായ സൂപ്പർ സ്‌റ്റാർ രജനികാന്തിന്‍റെ ഏറ്റവും പുതിയ ചിത്രം ജയിലർ ബോക്സോഫിസ് കുതിപ്പ് തുടരുന്നു. തിയേറ്ററുകളിൽ ആരാധകരെ ഇളക്കിമറിച്ച ചിത്രം രണ്ട് ദിവസംകൊണ്ട് 100 കോടി നേടിയാണ് വിജയഗാഥ തുടരുന്നത്. എല്ലാ പ്രതീക്ഷകളെയും മറികടന്ന് ലോകത്തെമ്പാടുനിന്നുമായി ഇതുവരെ 200 കോടി കലക്ഷന്‍ നേടിയിട്ടുണ്ട്. ഇതോടെ ചിത്രം 500, 600 കോടി രൂപയിലധികം മൊത്തം കലക്ഷന്‍ നേടുമെന്നാണ് പ്രതീക്ഷിക്കുന്നത്.
ട്രേഡ്‌ അഗ്രഗേറ്റർ സാക്‌നിൽക്‌ പറയുന്നതനുസരിച്ച് ആദ്യ ദിവസം തന്നെ 48.35 കോടി രൂപയും രണ്ടാം ദിനം 25.75 കോടി രൂപയും മൂന്നാം ദിനം 35 കോടി രൂപയും സിനിമ നേടിയിട്ടുണ്ട്. വെബ്‌സൈറ്റുകളുടെ കണക്കനുസരിച്ച് ചിത്രം പുറത്തിറങ്ങി 4ാം ദിനം തന്നെ 38 കോടി രൂപയാണ് നേടിക്കഴിഞ്ഞത്. ഇന്ത്യന്‍ കലക്ഷന്‍ അനുസരിച്ച് 147 കോടി രൂപയും സ്വന്തമാക്കി. ഇതോടെ ലോകമെമ്പാടു നിന്നുമായുളള കലക്ഷന്‍ 300 കോടിയിലേക്ക് എത്തുകയാണ്.
സ്വാതന്ത്ര്യ ദിനത്തിലെ പ്രകടനത്തോടെ ചിത്രം 300 കോടി ക്ലബിൽ കടക്കുമെന്നാണ് പ്രതീക്ഷിക്കുന്നത്. അതേ സമയം ഇന്ത്യയിൽ നിന്നും ഉടന്‍ 150 കോടി രൂപ കടക്കുമെന്നും പ്രതീക്ഷിക്കുന്നുണ്ട്. രജനികാന്തിന്‍റെ 2.0 കഴിഞ്ഞാൽ ഏറ്റവും വേഗത്തിൽ 300 കോടിയിലെത്തുന്ന രണ്ടാമത്തെ തമിഴ്‌ ചിത്രമായി ജയിലർ മാറും.
നെൽസണ്‍ ദിലീപ് കുമാറിന്‍റെ മുന്‍ ചിത്രമായ ബീസ്‌റ്റ്‌ തിയേറ്ററുകളിൽ സമ്മിശ്ര പ്രതികരണമാണ് നേടിയത്. ബീസ്റ്റിനുണ്ടായ ബോക്സോഫിസ് തകർച്ചയെ ജയിലറിലൂടെ മറികടക്കാന്‍ അദ്ദേഹത്തിന് കഴിയുമോ എന്ന് ആരാധകർ ഉറ്റുനോക്കിയിരുന്നു. എന്നാൽ നെൽസന്‍റെ സിനിമ ഇപ്പോൾ അത്തരം ആശങ്കകൾക്കെല്ലാം വിരാമമിട്ടിരിക്കുകയാണ്.
രണ്ട് വർഷത്തെ കാത്തിരിപ്പിന് ശേഷം രജനികാന്തിന്‍റെ ബിഗ് സ്‌ക്രീനിലേക്കുളള തിരിച്ചുവരവ് കൂടിയാണ് ഈ ചിത്രം. രമ്യ കൃഷ്‌ണൻ, ജാക്കി ഷ്‌റോഫ്, വസന്ത് രവി, യോഗി ബാബു, റെഡിങ് കിങ്‌സ്‌ലി എന്നിവരും ജയിലറിൽ പ്രധാന വേഷങ്ങളില്‍ എത്തുന്നു. ഇതിനിടയില്‍ മലയാളത്തിന്‍റെ നടനവിസ്‌മയം മോഹന്‍ലാലും കൂടെ വരവറിയിച്ചപ്പോൾ പ്രശംസകള്‍ക്കും അതീതമായി മാറാന്‍ ചിത്രത്തിന് കഴിഞ്ഞു.
മോഹന്‍ലാലിന്‍റെ അതിഥി വേഷം കൂടാതെ മലയാളി താരം വിനായകന്‍ ചിത്രത്തിൽ പ്രതിനായക വേഷം ചെയ്യുന്നുണ്ട്. കാവാലാ എന്ന ഗാനത്തിലെ തമന്ന ഭാട്ടിയയുടെ ഊർജസ്വലമായ പ്രകടനവും ആകർഷകമായ നൃത്ത വൈദഗ്ധ്യവും ഇതിനകം തന്നെ ഇന്‍റർനെറ്റിൽ കൊടുങ്കാറ്റായി മാറിയിട്ടുണ്ട്.
ദക്ഷിണേന്ത്യയിൽ ചിത്രം തരംഗമാവുകയും, അവിടെ നിന്നും മാത്രമായി പണത്തിന്‍റെ ഭൂരിഭാഗം നേടുകയും ചെയ്‌തു. ഡൽഹി, മുംബൈ, ഗുജറാത്ത്, പഞ്ചാബ് എന്നിവയുൾപ്പെടെയുളള ഹിന്ദി വിപണികളിലും ചിത്രം വിജയകൊയ്‌ത്ത്‌ തുടരുന്നുണ്ട്.
യുണൈറ്റഡ് സ്‌റ്റേറ്റ്സ്, കാനഡ, ഓസ്‌ട്രേലിയ, മലേഷ്യ, ശ്രീലങ്ക, ഇന്തോനേഷ്യ, യുണൈറ്റഡ് അറബ് എമിറേറ്റ്സ്, ഇംഗ്ലണ്ട് ഉള്‍പ്പെടെ അന്താരാഷ്‌ട്ര തലത്തിൽ പോലും ചിത്രം മികച്ച പ്രകടനം കാഴ്‌ചവയ്‌ക്കുകയും അനുകൂലമായ നിരൂപണങ്ങൾ നേടുകയും ചെയ്‌തു.
also read: Jailer Box Office Collection | 3 ദിനംകൊണ്ട് 100 കോടി ക്ലബ്ബില്‍; ബോക്‌സ്‌ ഓഫിസില്‍ കുതിച്ച് ജയിലര്‍
