ന്യൂഡൽഹി: രാജ്യ സേവനത്തിനുള്ള മാർഗമാണ് ജലസംരക്ഷണമെന്നും മഴക്കാലത്ത് മഴവെള്ളം സംഭരിക്കാനുള്ള മാർഗങ്ങളിൽ ശ്രദ്ധ കേന്ദ്രീകരിക്കണമെന്നും പ്രധാനമന്ത്രി നരേന്ദ്ര മോദി. പ്രധാനമന്ത്രിയുടെ പ്രതിമാസ റേഡിയോ പരിപാടിയായ മൻ കി ബാത്തിലൂടെ ജനങ്ങളുമായി സംവദിക്കുകയായിരുന്നു അദ്ദേഹം.
ജലസംരക്ഷണം ഈ തലമുറക്ക് മാത്രമല്ല, ഭാവി തലമുറക്കും ഉപകാരപ്രദമാകുമെന്ന് മോദി പറഞ്ഞു. ജലസംരക്ഷണം കടമ പോലെ ചെയ്യുന്ന ധാരാളം ആളുകൾ നമുക്ക് ചുറ്റുമുണ്ടെന്ന് പറഞ്ഞ പ്രധാനമന്ത്രി ഉത്തരാഖണ്ഡിലെ പൗരി ഗർവ്വയിൽ നിന്നുള്ള സച്ചിദാനന്ദ ഭാരതി തന്‍റെ കഠിനാധ്വാനത്തിലൂടെ ഉഫ്രൈങ്കൽ പ്രദേശത്തെ ജലക്ഷാമം ഇല്ലാതാക്കിയതെങ്ങനെയെന്ന് വിവരിച്ചു.
Also Read: രാജ്യത്ത് 135 കോടി കൊവിഡ് വാക്സിനുകൾ ലഭ്യമാക്കുമെന്ന് കേന്ദ്രം
മലമുകളിൽ കുഴി കുഴിച്ച് മഴവെള്ളം സംരക്ഷിക്കുന്ന പാരമ്പര്യ രീതിയിൽ ചില ആധുനിക രീതികളും സമന്വയിപ്പിച്ചാണ് ഭാരതി ജലക്ഷാമം അകറ്റിയത്. വർഷം മുഴുവൻ ഇപ്പോൾ ഗ്രാമത്തിൽ ജലവിതരണം നടക്കുന്നുണ്ട്. ഭാരതി മുപ്പതിനായിരത്തിലധികം വാട്ടർ ടാങ്കുകളും നിർമിച്ചുവെന്ന് പ്രധാനമന്ത്രി പറഞ്ഞു.
ഇവയിൽ നിന്നെല്ലാം പാഠം ഉൾക്കൊണ്ട് നമുക്ക് ചുറ്റുമുള്ള ജലം സംരക്ഷിക്കാൻ കഴിയുമെന്നും സാധ്യമായ എല്ലാ വിധത്തിലും ജലം സംരക്ഷിക്കണമെന്നും മൻ കി ബാത്തിലൂടെ പ്രധാനമന്ത്രി പറഞ്ഞു.
