പ്രഭാസും Prabhas കൃതി സനോണും Kriti Sanon കേന്ദ്രകഥാപാത്രങ്ങളില്‍ എത്തിയ 'ആദിപുരുഷ്' Adipurush ആദ്യ ദിനത്തില്‍ തന്നെ അതിശയിപ്പിക്കുന്ന സംഖ്യകൾ രേഖപ്പെടുത്തിയിരുന്നു. ബോക്‌സോഫിസില്‍ രണ്ടാം ദിനവും ആദ്യ ദിനത്തിലെന്ന പോലെ കലക്ഷന്‍ നേടാന്‍ ചിത്രത്തിന് കഴിഞ്ഞു. കടുത്ത വിമർശനങ്ങൾക്കിടയിലും, ശനിയാഴ്‌ച ഗംഭീര പ്രകടനമാണ് 'ആദിപുരുഷ്' കാഴ്‌ചവച്ചത്.
ഹിന്ദു പുരാണ ഇതിഹാസമായ രാമായണത്തെ Ramayana അടിസ്ഥാനമാക്കി ഓം റൗട്ട് സംവിധാനം ചെയ്‌ത 'ആദിപുരുഷ്' രണ്ടാം ദിനം 200 കോടി ക്ലബ്ബിൽ ഇടംപിടിച്ചു. ഇന്ത്യയിലെ എല്ലാ ഭാഷകളിലുമായി 65 കോടി രൂപയാണ് രണ്ടാം ദിനത്തില്‍ 'ആദിപുരുഷ്' കലക്‌ട് ചെയ്‌തത്. ആഗോളതലത്തില്‍ 140 കോടി രൂപയും ഇന്ത്യയില്‍ എല്ലാ ഭാഷകളില്‍ നിന്നുമായി 86.75 കോടി രൂപയാണ് ആദ്യ ദിനത്തില്‍ ചിത്രം സ്വന്തമാക്കിയത്. അതേസമയം, ആന്ധ്രാപ്രദേശ്‌, തെലങ്കാന എന്നീ സംസ്ഥാനങ്ങളില്‍ നിന്നും 26 കോടി രൂപയാണ് രണ്ടാം ദിനത്തില്‍ ചിത്രം കലക്‌ട് ചെയ്‌തത്.
ഒരേസമയം ഹിന്ദിയിലും തെലുഗുവിലും ചിത്രീകരിച്ച ചിത്രം ജൂൺ 16നാണ് ലോകമൊട്ടാകെയുള്ള തിയേറ്ററുകളില്‍ പ്രദര്‍ശനത്തിനെത്തിയത്. ഹിന്ദിയ്‌ക്കും തെലുഗുവിനും പുറമെ, മലയാളം, തമിഴ്, കന്നഡ എന്നീ ഭാഷകളിലേക്കും മൊഴിമാറ്റം ചെയ്യപ്പെട്ട ചിത്രം ലോകമൊട്ടാകെ ഏകദേശം 10,000 സ്‌ക്രീനുകളിലാണ് റിലീസിനെത്തിയത്. 500 കോടി ബിഗ് ബജറ്റിലൊരുങ്ങിയ സിനിമയുടെ നിര്‍മാണം ടി-സീരീസാണ്.
അതേസമയം തിരക്കഥ, സംഭാഷണങ്ങള്‍ തുടങ്ങിയവ കാരണം 'ആദിപുരുഷി'നെതിരെ ശക്തമായ വിമര്‍ശനമാണ് ഉയരുന്നത്. കഴിഞ്ഞ രണ്ട് ദിനങ്ങളിലായി, സിനിമയെ പരിഹസിച്ചുള്ള തമാശ നിറഞ്ഞ മീമുകള്‍ കൊണ്ട് നിറഞ്ഞിരിക്കുകയാണ് സോഷ്യല്‍ മീഡിയ ഹാന്‍ഡിലുകള്‍. സിനിമയ്‌ക്കെതിരെ വിമര്‍ശനങ്ങള്‍ ശക്തമായപ്പോള്‍, സോഷ്യല്‍ മീഡിയയിലൂടെ നിരാശ പ്രകടിപ്പിച്ച് ഒരു കൂട്ടര്‍ രംഗത്തെത്തിയിട്ടുണ്ട്.
അതേസമയം, ആദിപുരുഷിലെ ആക്ഷേപകരമായ രംഗങ്ങൾ നീക്കം ചെയ്യാനോ തിരുത്താനോ നിർദ്ദേശം നൽകണമെന്ന് ആവശ്യപ്പെട്ട് ഹിന്ദു സേന വെള്ളിയാഴ്‌ച ഡല്‍ഹി ഹൈക്കോടതിയെ സമീപിച്ചിരുന്നു. ഹിന്ദു സേന ദേശീയ അധ്യക്ഷന്‍ വിഷ്‌ണു ഗുപ്‌തയാണ് ഡല്‍ഹി ഹൈക്കോടതിയില്‍ ഹര്‍ജി സമര്‍പ്പിച്ചത്.
ശ്രീരാമൻ, സീത, രാവണൻ എന്നിവരുടെ കഥാപാത്രങ്ങളെ വാല്‍മീകിയുടെ രാമായണത്തില്‍ വിവരിക്കുന്നതിന് വിരുദ്ധമായാണ് 'ആദിപുരുഷി'ല്‍ ചിത്രീകരിച്ചിരിക്കുന്നത് എന്നാണ് ഹർജിയിൽ പറയുന്നത്. 1952ലെ സിനിമാട്ടോഗ്രാഫ് ആക്‌ട് സെക്ഷൻ 5 എ Section 5A of the Cinematograph Act പ്രകാരമാണ് സിനിമയ്‌ക്കെതിരെ ഹിന്ദു സേന ഹര്‍ജി സമര്‍പ്പിച്ചത്.
സിനിമ പൊതു പ്രദർശനത്തിന് യോഗ്യമല്ലെന്നും, സിനിമയുടെ പ്രദര്‍ശനം തടയണമെന്നുമാണ് ഹിന്ദു സേനയുടെ ആവശ്യം. സിനിമയില്‍ ഹിന്ദു ദൈവങ്ങളെ മോശമായാണ് ചിത്രീകരിച്ചതെന്നും, 'ആദിപുരുഷ്' മതവികാരത്തെ വ്രണപ്പെടുത്തിയെന്നും ഹര്‍ജിയില്‍ ആരോപിക്കുന്നു. സിനിമയില്‍ ശ്രീരാമൻ, സീത, ഹനുമാൻ എന്നി കഥാപാത്രങ്ങളുടെ വേഷവിധാനങ്ങളും ചിത്രങ്ങളും തികച്ചും വ്യത്യസ്‌തമായ രീതിയിൽ പ്രദർശിപ്പിച്ച് മതവികാരം വ്രണപ്പെടുത്തിയെന്നാണ് പരാതി.
വിവാദ രംഗങ്ങൾ ഒഴിവാക്കാതെ 'ആദിപുരുഷിന്' ഐഎസ്‌സി സെൻസർ ബോർഡിന്‍റെ സർട്ടിഫിക്കറ്റ് നൽകരുതെന്നും ചിത്രം തിയേറ്ററുകളിൽ പ്രദർശിപ്പിക്കരുതെന്നും ഹർജിയിൽ പറയുന്നു. കേന്ദ്ര സർക്കാർ, തമിഴ്‌നാട് സർക്കാർ, ഫിലിം സെൻസർ ബോർഡ്, സംവിധായകന്‍ ഓം റൗട്ട്, നിര്‍മാതാക്കളായ ടി സീരീസ് എന്നിവരെ പ്രതി ചേര്‍ത്താണ് ഹിന്ദു സേന ഡല്‍ഹി ഹൈക്കോടതിയില്‍ ഹര്‍ജി സമര്‍പ്പിച്ചത്.
