ഉത്തർപ്രദേശ് : രാജ്യത്ത് വികസിപ്പിച്ച ആദ്യ ദീർഘദൂര റിവോൾവർ 'പ്രബൽ' (Prabal) പുറത്തിറങ്ങി. കേന്ദ്ര സർക്കാർ ഉടമസ്ഥതയിലുള്ള അഡ്വാൻസ്‌ഡ് വെപ്പൺസ് ആൻഡ് എക്യുപ്‌മെന്‍റ് ഇന്ത്യ (AWEIL) യാണ് റിവോൾവർ നിർമിച്ചത്. 50 മീറ്റർ വരെയാണ് പ്രബലിന്‍റെ ഫയറിംഗ് റേഞ്ച്.
വിപണിയിൽ ലഭ്യമായ മറ്റ് റിവോൾവറുകളേക്കാൾ രണ്ടിരട്ടിയാണിത്. 76 എംഎം ബാരൽ നീളമുള്ള തോക്കിന് വെടിയുണ്ടകൾ ഇല്ലാതെ 675 ഗ്രാം ഭാരമുണ്ട്. 177.6 മില്ലി മീറ്ററാണ് റിവോൾവറിന്‍റെ മൊത്തത്തിലുള്ള നീളം. സൈഡ് സ്വിംഗ് സിലിണ്ടർ ഘടിപ്പിച്ചിട്ടുള്ള ആദ്യത്തെ റിവോൾവർ കൂടിയായ പ്രബൽ ഉപയോഗിച്ച് ഒരേസമയം ആറ് റൗണ്ട് വരെ വെടിവയ്‌ക്കാൻ കഴിയും.
പ്രബലിന്‍റെ വില 1.40 ലക്ഷം : സാധാരണക്കാർക്കും സ്വന്തമാക്കാൻ കഴിയുന്ന റിവോൾവറിന് ജിഎസ്‌ടി അടക്കം 1,40,800 രൂപയാണ് വില. അതേസമയം ഡീലർമാർക്ക് 28 ശതമാനം ജിഎസ്‌ടിയോടെ 1,26,720 രൂപയ്ക്കാണ് നൽകുന്നത്. കാൺപൂരിലെ ആയുധ ഫാക്‌ടറി ജനറല്‍ മാനേജര്‍ രാജീവ് ശർമ്മയാണ് റിവോൾവറിനെ കുറിച്ചുള്ള വിവരങ്ങൾ പുറത്തുവിട്ടത്.
സൈഡ് സ്വിംഗ് (side swing) ഉള്ള റിവോൾവറിന്‍റെ ആവശ്യം നിലവിൽ ഉണ്ടെന്നും ഇത് കണക്കിലെടുത്താണ് പ്രബൽ നിർമിച്ചതെന്നും അദ്ദേഹം പറഞ്ഞു. ഭാരം കുറവായതിനാൽ പ്രബൽ അനായാസം ഉപയോഗിക്കാമെന്നതാണ് പ്രത്യേകത. ആദ്യം ഓർഡര്‍ ചെയ്യുന്നവർക്ക് ആദ്യം എന്ന അടിസ്ഥാനത്തിലാണ് നിലവിൽ റിവോൾവർ വിതരണം ചെയ്യുന്നത്.
എംഐഎം സാങ്കേതിക വിദ്യയിൽ നിർമാണം : ഒരു വർഷത്തിനുള്ളിൽ 50,000 റിവോൾവറുകൾ നിർമിക്കുകയാണ് കമ്പനി ലക്ഷ്യമെന്നും അദ്ദേഹം കൂട്ടിച്ചേർത്തു. എംഐഎം (Metal injection molding) സാങ്കേതികവിദ്യ ഉപയോഗിച്ചാണ് പ്രബൽ നിർമിച്ചിട്ടുള്ളത്. ബഹിരാകാശ പേടകങ്ങൾ, വിമാനങ്ങൾ, മെഡിക്കൽ ഉപകരണങ്ങളുടെ നിർമാണം എന്നിവയ്‌ക്കാണ് ഈ സാങ്കേതിക വിദ്യ ഉപയോഗിക്കാറുള്ളത്. അതിനാൽ ഈ റിവോൾവറിൽ നിന്ന് മിസ് ഫയർ ഉണ്ടാകാനുള്ള സാധ്യത ഇല്ലെന്നും നിർമാതാക്കൾ പറയുന്നു.
വെള്ളത്തിലോ ചെളിയിലോ വീണാലും റിവോൾവർ പ്രവർത്തനക്ഷമമായിരിക്കും. അത്തരം പരീക്ഷണങ്ങൾ പൂർണമായും വിജയിച്ചതായും രാജീവ് ശർമ്മ പറഞ്ഞു.
ഹെറോൺ മാർക് 2 ഡ്രോണുകൾ : ഒരാഴ്‌ച മുൻപാണ് ഇന്ത്യ - പാകിസ്ഥാൻ അതിർത്തിയിൽ ഒരേ സമയം ദീർഘനേരം അചഞ്ചലമായി നിരീക്ഷണം നടത്താൻ കഴിയുന്ന ഹെറോൺ മാർക് 2 ഡ്രോണുകൾ ഇന്ത്യൻ വ്യോമസേന സ്വന്തമാക്കിയത്. തുടർച്ചയായി 36 മണിക്കൂർ വരെ പ്രവർത്തിക്കാൻ കഴിയുന്ന സായുധരായ ഈ ഡ്രോണുകൾക്ക് സാറ്റലൈറ്റ് കമ്മ്യൂണിക്കേഷൻ വൈദഗ്‌ധ്യത്താൽ വളരെ ദൂരത്തുള്ള ശത്രുക്കളെ കണ്ടെത്താനും തടയാനും കഴിയും. ദേശീയ സുരക്ഷയ്‌ക്ക് വലിയ മുതൽക്കൂട്ടാണ് ഇസ്രയേൽ നിർമിതമായ ഹെറോൺ മാർക് 2 ഡ്രോണുകൾ.
