ഹരിയാന : തറാവീഹ് നമസ്‌കാരത്തിനിടെ സോനിപതിലെ മുസ്‌ലിം പള്ളിയില്‍ അതിക്രമിച്ച് കയറി ആക്രമണം നടത്തിയ സംഭവത്തില്‍ പത്ത് പേര്‍ അറസ്റ്റില്‍. ആക്രമണത്തില്‍ ആറ് പേര്‍ക്ക് പരിക്കേറ്റിട്ടുണ്ടെന്ന് പൊലീസ് അറിയിച്ചു. ഞായറാഴ്‌ച രാത്രിയാണ് കേസിനാസ്‌പദമായ സംഭവം.
നോമ്പുതുറ കഴിഞ്ഞ് രാത്രി പള്ളിയിലെത്തിയ ആളുകള്‍ നമസ്‌കാരം (തറാവീഹ്) ആരംഭിച്ചതോടെ ഒരുകൂട്ടം അജ്ഞാതര്‍ പള്ളിയിലേക്ക് അതിക്രമിച്ച് കടക്കുകയും തുടര്‍ന്ന് ആളുകളെ മര്‍ദിക്കുകയുമായിരുന്നു. കുട്ടികള്‍ ഉള്‍പ്പടെയുള്ളവര്‍ പള്ളിയിലുണ്ടായിരുന്നു. സോനിപത് സ്വദേശികളായ യുവാക്കള്‍ തന്നെയാണ് സംഭവവുമായി ബന്ധപ്പെട്ട് അറസ്റ്റിലായിരിക്കുന്നതെന്നും പൊലീസ് പറഞ്ഞു.
സംഭവത്തെ തുടര്‍ന്ന് ഗ്രാമത്തില്‍ പൊലീസ് സുരക്ഷ ഏര്‍പ്പെടുത്തിയിട്ടുണ്ടെന്നും നിലവില്‍ ഗ്രാമത്തിലെ സ്ഥിതിഗതികള്‍ സമാധാനപരമാണെന്നും പൊലീസ് ഉദ്യോഗസ്ഥര്‍ വ്യക്തമാക്കി. ഗ്രാമത്തിലെ ഏതാനും ചില സാമൂഹ്യ വിരുദ്ധരാണ് ആക്രമണത്തിന് പിന്നിലെന്ന് സോനിപത് പൊലീസ് കമ്മിഷണര്‍ ബി സതീഷ്‌ ബാലന്‍ പറഞ്ഞു.
വിവിധ മത സമുദായത്തില്‍പ്പെട്ടവര്‍ സോനിപതിലുണ്ടെന്നും സമുദായങ്ങള്‍ക്ക് ഇടയില്‍ പൊരുത്തക്കേടുണ്ടാകുന്ന വിധത്തിലുള്ള യാതൊരുവിധ സംഭവങ്ങളും നേരത്തെ റിപ്പോര്‍ട്ട് ചെയ്യപ്പെട്ടിട്ടില്ലെന്നും ഇത് പ്രത്യേക പ്രകോപനങ്ങളൊന്നുമില്ലാത്ത ആക്രമണമാണെന്നും കമ്മിഷണര്‍ പറഞ്ഞു. പള്ളിയിലെ ആക്രമണത്തിന് ശേഷം കയ്യില്‍ വടികളുമായി ഗ്രാമത്തില്‍ അലഞ്ഞ് നടക്കുന്ന അക്രമികളുടെ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചിരുന്നു.
മതവികാരം വ്രണപ്പെടുത്തുന്നതുമായി ബന്ധപ്പെട്ട് ഇന്ത്യന്‍ ശിക്ഷാനിയമത്തിലെ വിവിധ വകുപ്പുകള്‍ പ്രകാരമാണ് പ്രതികള്‍ക്കെതിരെ കേസെടുത്തിരിക്കുന്നതെന്ന് കമ്മിഷണര്‍ വ്യക്തമാക്കി. സംഭവത്തില്‍ ഉള്‍പ്പെട്ട മുഴുവന്‍ പ്രതികള്‍ക്കെതിരെയും കര്‍ശനമായ നടപടി സ്വീകരിക്കുമെന്നും ഇത്തരത്തിലുള്ള ഗുണ്ടായിസം ഒരു കാരണവശാലും വച്ചുപൊറുപ്പിക്കില്ലെന്നും കമ്മിഷണര്‍ പറഞ്ഞു.
സമാന സംഭവം ഉത്തര്‍പ്രദേശിലെ മൊറാദാബാദിലും : മാര്‍ച്ച് 24ന് ഉത്തര്‍പ്രദേശിലെ മൊറാദാബാദിലെ മുസ്‌ലിം പള്ളിയിലും ഇത്തരത്തിലുള്ള അതിക്രമിച്ച് കടക്കലും ആക്രമണവും ഉണ്ടായിട്ടുണ്ട്. പള്ളിയിലെത്തിയ ഏതാനും പേര്‍ തറാവീഹ് നമസ്‌കാരത്തിന് തടസം സൃഷ്‌ടിച്ചിരുന്നു.
ഖാര്‍ഖോഡയിലെ പള്ളിയില്‍ കാവി കൊടി ഉയര്‍ത്തി : സോനിപതിന് സമീപമുള്ള ഖാര്‍ഖോഡയില്‍ രാമനവമി ദിനത്തില്‍ മുസ്‌ലിം പള്ളിയുടെ ചുമരില്‍ കാവി പതാക ഉയര്‍ത്തിയ സംഭവം ഉണ്ടായിരുന്നു. ഇതേ തുടര്‍ന്ന് വര്‍ഗീയ സംഘര്‍ഷം ഉടലെടുത്തിരുന്നെങ്കിലും കൃത്യ സമയത്തെ പൊലീസ് ഇടപെടല്‍ ആക്രമണങ്ങളും അപകടങ്ങളും ഒഴിവാക്കി.
രാമനവമി മറയാക്കി ആക്രമണങ്ങള്‍ നിരവധി : പശ്ചിമ ബംഗാളില്‍ രാമനവമി ഘോഷ യാത്രക്കിടെ വന്‍ സംഘര്‍ഷമാണ് ഉണ്ടായത്. ഹൗറയിലെ സന്ധ്യ ബസാറിന് സമീപത്തായിരുന്നു സംഭവം. ഘോഷ യാത്ര സന്ധ്യ ബസാറില്‍ എത്തിയപ്പോള്‍ ഒരുകൂട്ടം ആളുകള്‍ ഘോഷ യാത്രയ്‌ക്ക് നേരെ കല്ലും ബിയര്‍ കുപ്പികളും വലിച്ചെറിഞ്ഞുവെന്നാണ് ആരോപണം.
ഇതേ തുടര്‍ന്നാണ് ബസാറില്‍ സംഘര്‍ഷമുണ്ടായത്. ആക്രമണത്തില്‍പ്പെട്ട് 15 പേര്‍ക്ക് പരിക്കേറ്റിരുന്നു. സംഭവത്തെ തുടര്‍ന്ന് പൊലീസ് സ്ഥലത്തെത്തുകയും ജനങ്ങളെ പിരിച്ച് വിടാന്‍ ശ്രമിക്കുകയും ചെയ്‌തു. കഴിഞ്ഞ വര്‍ഷവും രാമനവമി ഘോഷയാത്ര സന്ധ്യ ബസാറില്‍ എത്തിയപ്പോള്‍ ആക്രമണം നേരിടേണ്ടി വന്നിട്ടുണ്ടെന്നും ആരോപണമുണ്ട്.
സംഭവത്തെ തുടര്‍ന്ന് നിരവധി വാഹനങ്ങള്‍ കത്തിച്ചു. പൊലീസ് ലാത്തിവീശുകയും കണ്ണീര്‍ വാതകം പ്രയോഗിക്കുകയും ചെയ്‌തു. ഇതോടെ ജനങ്ങള്‍ പിരിഞ്ഞ് പോയി. സംഭവത്തെ തുടര്‍ന്ന് മേഖലയില്‍ കനത്ത സുരക്ഷയൊരുക്കുന്നതിനായി കൂടുതല്‍ പൊലീസ് ഉദ്യോഗസ്ഥരെ വിന്യസിച്ചിരുന്നു.
