അഹമ്മദാബാദ്: ഗുജറാത്ത്, മുംബൈ എന്നിവിടങ്ങളില്‍ നിന്നായി 120 കോടിയിലധികം വിലമതിക്കുന്ന മെഫെഡ്രോൺ (Mephedrone) പിടിച്ചെടുത്ത് എൻസിബി (നാര്‍കോട്ടിക്‌സ് കണ്‍ട്രോള്‍ ബ്യൂറോ). എയർ ഇന്ത്യയുടെ മുൻ പൈലറ്റടക്കം ആറുപേർ പിടിയിലായി. 60 കിലോഗ്രാം തൂക്കമുള്ള മെഫെഡ്രോണാണ് ഇന്ന് (ഒക്‌ടോബര്‍ ഏഴ്) പിടിച്ചെടുത്തത്.
ഗുജറാത്തിലെ ജാംനഗറിലെ ഇന്‍റലിജൻസ് യൂണിറ്റിന് ലഭിച്ച രഹസ്യവിവരത്തിന്‍റെ അടിസ്ഥാനത്തിലാണ് നടപടി. എൻസിബി ഡെപ്യൂട്ടി ഡയറക്‌ടര്‍ ജനറൽ സഞ്ജയ് സിങാണ് വാർത്താസമ്മേളനത്തിൽ ഇതുസംബന്ധിച്ച വിവരം പുറത്തുവിട്ടത്. രാജ്യത്തിന്‍റെ വിവിധയിടങ്ങളിലായി വ്യാപിച്ചുകിടക്കുന്ന മയക്കുമരുന്ന് ശൃംഖലയ്‌ക്കെതിരെയാണ് നടപടി സ്വീകരിച്ചതെന്ന് സഞ്ജയ് സിങ് പറഞ്ഞു.
ഡൽഹിയിലെ എൻസിബി ആസ്ഥാനത്തുനിന്നും മുംബൈ സോണൽ യൂണിറ്റിൽ നിന്നുമുള്ള ഉദ്യോഗസ്ഥർ ജാംനഗറിൽ തിങ്കളാഴ്‌ചയാണ് (ഒക്‌ടോബര്‍ മൂന്ന്) റെയ്‌ഡ് നടത്തിയത്. ഈ റെയ്‌ഡിൽ 10 കിലോ മെഫെഡ്രോൺ പിടിച്ചെടുത്തു. ഇതുമായി ബന്ധപ്പെട്ട് ജാംനഗറിൽ നിന്ന് ഒരാളെയും മുംബൈയിൽ നിന്ന് മറ്റ് മൂന്ന് പേരെയും എൻസിബി സംഘം അറസ്റ്റുചെയ്‌തു.
തുടര്‍ന്ന്, വ്യാഴാഴ്‌ച (ഒക്‌ടോബര്‍ ആറ്) ദക്ഷിണ മുംബൈയിലെ ഫോർട്ട് ഏരിയയിലെ എസ്ബി റോഡിലുള്ള ഗോഡൗണിൽ നടത്തിയ പരിശോധനയില്‍ 50 കിലോ മെഫെഡ്രോണ്‍ പിടിച്ചെടുത്തു. കേസിലെ മുഖ്യ കണ്ണി ഉള്‍പ്പെടെ രണ്ട് പേര്‍ പിടിയിലായി. കൂടുതല്‍ പ്രതികള്‍ ഉടന്‍ പിടിയിലാകാൻ സാധ്യതയുണ്ടെന്ന് ഉദ്യോഗസ്ഥന്‍ പറയുന്നു.
