ഗുരുഗ്രാം (ഹരിയാന): മുൻ ഉത്തർപ്രദേശ് മുഖ്യമന്ത്രിയും സമാജ്‌വാദി പാർട്ടി നേതാവുമായ മുലായം സിങ് യാദവിന്‍റെ ആരോഗ്യനില അതീവ ഗുരുതരം. ജീവൻരക്ഷാ മരുന്നുകളുടെ സഹായത്തോടെയാണ് അദ്ദേഹത്തിന്‍റെ ജീവൻ നിലനിൽക്കുന്നതെന്ന് അദ്ദേഹത്തെ പ്രവേശിപ്പിച്ചിരിക്കുന്ന ഗുരുഗ്രാമിലെ മേദാന്ത ആശുപത്രി അധികൃതർ അറിയിച്ചു.
നിലവിൽ ഐസിയുവിൽ തുടരുന്ന അദ്ദേഹത്തിന്‍റെ ആരോഗ്യനില ഡോക്‌ടർമാരുടെ വിദഗ്‌ധ സംഘം നിരീക്ഷിച്ചു വരികയാണെന്ന് ആശുപത്രിയിലെ മെഡിക്കൽ ഡയറക്‌ടർ ഡോ. സഞ്ജീവ് ഗുപ്‌ത അറിയിച്ചു. ഓഗസ്റ്റ് 22 മുതൽ മുലായം സിങ് യാദവ് ചികിത്സയിലാണ്. ഒക്‌ടോബർ രണ്ടിന് ആരോഗ്യനില വഷളായതിനെ തുടർന്ന് 82കാരനായ എസ്‌പി തലവനെ മേദാന്ത ആശുപത്രിയിൽ പ്രവേശിപ്പിക്കുകയായിരുന്നു.
വെള്ളിയാഴ്‌ച(ഒക്‌ടോബര്‍ 7) പ്രതിരോധ മന്ത്രി രാജ്‌നാഥ് സിങ് ആശുപത്രിയിലെത്തി അദ്ദേഹത്തെ സന്ദർശിച്ചിരുന്നു. ബുധനാഴ്‌ച ഹരിയാന മുഖ്യമന്ത്രി മനോഹർ ലാൽ ഖട്ടർ, ആർജെഡി നേതാവ് ലാലു പ്രസാദ് യാദവ് എന്നിവരും അദ്ദേഹത്തെ സന്ദർശിച്ചു. തെലങ്കാന മുഖ്യമന്ത്രി കെസിആറും മുലായം സിങ്ങിന്‍റെ ആരോഗ്യനില സംബന്ധിച്ച് മകനും സമാജ്‌വാദി പാർട്ടി നേതാവുമായ അഖിലേഷ് യാദവിനോട് അന്വേഷണം നടത്തി. ദസറയ്ക്ക് ശേഷം അദ്ദേഹത്തെ സന്ദർശിക്കാമെന്ന ഉറപ്പും കെസിആർ നൽകി.
ബിഹാർ മുഖ്യമന്ത്രി നിതീഷ് കുമാറും മുലായം സിങ്ങിന്‍റെ ആരോഗ്യകാര്യങ്ങൾ അഖിലേഷ് യാദവിനോട് അന്വേഷിച്ചു. കഴിഞ്ഞയാഴ്‌ച പ്രധാനമന്ത്രി നരേന്ദ്ര മോദി അഖിലേഷ് യാദവിനോട് വിവരങ്ങൾ തിരക്കിയതായാണ് റിപ്പോർട്ടുകൾ.
1939 നവംബർ 22ന് ജനിച്ച മുലായം സിങ് യാദവ് ഉത്തർപ്രദേശിലെ പ്രധാന നേതാക്കളിൽ ഒരാളാണ്. മൂന്ന് പ്രാവശ്യം ഉത്തർപ്രദേശ് മുഖ്യമന്ത്രി പദം അലങ്കരിച്ച മുലായം കേന്ദ്രമന്ത്രിസഭയിൽ പ്രതിരോധ മന്ത്രിയായും സേവനം അനുഷ്‌ഠിച്ചിട്ടുണ്ട്. 10 തവണ എംഎൽഎയായും 7 തവണ ലോക്‌സഭ എംപിയായും തെരഞ്ഞെടുക്കപ്പെട്ടിട്ടുണ്ട്.
ഈ വർഷം ജൂലൈയിലാണ് മുലായം സിങ്ങിന്‍റെ ഭാര്യ സാധന ഗുപ്‌ത അന്തരിക്കുന്നത്. ശ്വാസകോശ അണുബാധയെ തുടർന്ന് ഗുരുഗ്രാമിലെ സ്വകാര്യ ആശുപത്രിയിൽ ചികിത്സയിലായിരുന്നു അവർ. മുലായം സിങ്ങിന്‍റെ രണ്ടാം ഭാര്യയായിരുന്നു സാധന ഗുപ്‌ത. ആദ്യ ഭാര്യയും അഖിലേഷ് യാദവിന്‍റെ അമ്മയുമായ മാലതി ദേവി 2003ലാണ് അന്തരിച്ചത്.
