താനെ (മഹാരാഷ്‌ട്ര): താനെയില്‍ ഉല്ലാസ്‌നഗർ (Ulhasnagar) ഷഹാദ് ഏരിയയിലെ ഫാക്‌ടറിയിലുണ്ടായ സ്ഫോടനത്തില് രണ്ട് മരണം. ഷഹാദ് ഏരിയയിലെ സെഞ്ച്വറി റയോൺ കമ്പനിയിൽ (Century Rayon Company) ഇന്ന് രാവിലെ 11.30 ഓടെയാണ് വൻ സ്‌ഫോടനമുണ്ടായത് (Massive blast at Century Rayon Company in Thane- Two Dead). സ്ഫോടനത്തില് നിരവധി തൊഴിലാളികള്‍ക്ക് പരിക്കേറ്റതായാണ് റിപ്പോര്‍ട്ട്. പരിക്കേറ്റവരെ തൊട്ടടുത്തുള്ള സെഞ്ച്വറി ആശുപത്രിയിൽ പ്രവേശിപ്പിച്ചു.
സ്ഫോടനത്തില് നഗരത്തിലെ തനാജിനഗർ, ഷഹദ് ഗവ്താൻ, ഗുൽഷൻ നഗർ, ഷഹദ് ഫടക്, ധോബിഘട്ട്, ശിവ്‌നേരി നഗർ എന്നിവിടങ്ങളിലെ വീടുകൾ കുലുങ്ങിയതായി റിപ്പോര്‍ട്ടുകളുണ്ട്. വിവരമറിഞ്ഞ് സ്ഥലത്തെത്തിയ അഗ്നിശമന സേനയുടെ (Fire Force) നേതൃത്വത്തില്‍ രക്ഷാപ്രവർത്തനം പുരോഗമിക്കുകയാണ്. കമ്പനിയ്ക്കകത്ത് കൂടുതൽ തൊഴിലാളികൾ കുടുങ്ങിക്കിടക്കുന്നുണ്ടെന്നാണ് റിപ്പോര്‍ട്ട്. മരണസംഖ്യ ഉയര്‍ന്നേക്കാന്‍ സാധ്യതയുണ്ട്.
സെഞ്ച്വറി റയോൺ കമ്പനിയുടെ CS2 വിഭാഗമാണ് സ്‌ഫോടനത്തിന്‍റെ ഉറവിടമെന്നാണ് വിവരം. തൊഴിലാളികളായ ശൈലേഷ് രാജ്‌കരൻ യാദവ് (26), രാജേഷ് ശ്രീവാസ്തവ (46), അനന്ത ദിഗാരെ (50), അനന്ത് ജാദവ് എന്നിവരാണ് സ്‌ഫോടന സമയത്ത് പരിസരത്തുണ്ടായിരുന്നവര്‍. ഇവിടെയുണ്ടായിരുന്ന ടാങ്കർ ഡ്രൈവർ പവൻ യാദവിനെ കാണാതായിട്ടുണ്ട്. ഇവരെല്ലാം മരിച്ചതായാണ് സ്ഥിരീകരിക്കാത്ത റിപ്പോര്‍ട്ടുകള്‍. സംഭവ സ്ഥലത്തുനിന്ന് ലഭിച്ച തിരിച്ചറിയാനാകാത്ത വിധത്തിലുള്ള മൃതദേഹാവശിഷ്‌ടങ്ങള്‍ ആശുപത്രിയിലേക്ക് മാറ്റിയിരിക്കുകയാണ്. സാഗർ സാൽട്ടെ, പണ്ഡിറ്റ് മോർ, പ്രകാശ് നികം, ഹൻസ്‌രാജ് സരോജ്, അമിത് ഭാർനുകെ, മുഹമ്മദ് അർമാൻ എന്നീ തൊഴിലാളികൾ പരിക്കേറ്റ് സെഞ്ച്വറി ആശുപത്രിയിൽ ചികിത്സയിലുണ്ട്.
Also Read: Blast in Kargil | കാര്‍ഗിലിലെ ആക്രിക്കടയ്‌ക്ക് സമീപം സ്ഫോടനം ; മൂന്ന് മരണം, എട്ടുപേര്‍ക്ക് പരിക്ക്
സെഞ്ച്വറി കമ്പനിയിലേക്ക് രാവിലെ ഒരു ടാങ്കർ നൈട്രജൻ വാതകം എത്തിച്ചതായി പൊലീസ് പറഞ്ഞു. അതിൽ സിഎസ്2 (കാർബൺ ഡൈ ഓക്സൈഡ് സൾഫർ) നിറയ്ക്കാൻ പോകുകയായിരുന്നു, ഇത് പരിശോധിക്കുന്നതിനിടെയാണ് പൊട്ടിത്തെറിയുണ്ടായതെന്നാണ് പൊലീസ് നല്‍കുന്ന വിവരം. സംഭവത്തില്‍ ഇൻഡസ്ട്രിയൽ സേഫ്റ്റി ഡിപ്പാർട്ട്‌മെന്‍റ് (Industrial Safety Department) ഡെപ്യൂട്ടി ഡയറക്‌ടർ അന്വേഷണം തുടങ്ങി.
സെഞ്ച്വറി റയോൺ കമ്പനി നല്‍കുന്ന വിശദീകരണം: "സെപ്റ്റംബർ 23 ശനിയാഴ്‌ച രാവിലെ 11.30 ഓടെ MH 04 GC 2482 രജിസ്ട്രേഷന്‍ നമ്പറിലുള്ള ടാങ്കർ പുറത്തു നിന്ന് കമ്പനിക്കുള്ളിലേക്ക് വന്നു. അതിൽ CS2 (കാർബൺ ഡൈ സൾഫർ) രാസവസ്തു നിറയ്ക്കാൻ തുടങ്ങുകയായിരുന്നു. എന്നാൽ ടാങ്കർ പരിശോധിക്കുന്നതിനിടെ പൊട്ടിത്തെറിയുണ്ടായി. രണ്ട് തൊഴിലാളികൾ സംഭവസ്ഥലത്തു തന്നെ മരിക്കുകയും നാല് പേർക്ക് പരിക്കേൽക്കുകയും ചെയ്‌തു. പരിക്കേറ്റവരെ സെഞ്ച്വറി റയോൺ ആശുപത്രിയിൽ പ്രവേശിപ്പിച്ചു, അവരുടെ നില തൃപ്‌തികരമാണ്. എല്ലാ സുരക്ഷാ സംവിധാനങ്ങളും സുരക്ഷാ നടപടികളും കമ്പനി നടപ്പിലാക്കിയിട്ടുണ്ട്." -സെഞ്ച്വറി റയോൺ കമ്പനിയുടെ പബ്ലിക് റിലേഷൻസ് ഓഫിസർ മെഹുൽ ലാൽക്ക (Mehul Lalka, Public Relations Officer of Century Rayon Company) പത്രക്കുറിപ്പില്‍ അറിയിച്ചു.
