താനെ: മഹാരാഷ്‌ട്രയില്‍ 40 നിലകളുളള കെട്ടിടത്തില്‍ ലിഫ്റ്റ് തകര്‍ന്ന് വീണ് ആറ് തൊഴിലാളികള്‍ക്ക് ദാരുണാന്ത്യം (Lift collapse in Maharashtra). താനെയ്‌ക്ക് സമീപം ബൽകം എന്ന സ്ഥലത്തുളള റൺവാൾ ഗാർഡനിലാണ് സംഭവം നടന്നതെന്ന് താനെ മുനിസിപ്പല്‍ കോര്‍പ്പറേഷന്‍ ഉദ്യോഗസ്ഥന്‍ പറഞ്ഞു. ലോക്കല്‍ പൊലീസും, അഗ്നിശമന സേനാംഗങ്ങളും വാഹനങ്ങളും സംഭവ സ്ഥലത്ത് എത്തി അപകടത്തില്‍ മരിച്ചവരെയും പരിക്കേറ്റ ആളെയും പുറത്തെടുത്തു (Six workers die as lift collapses in Thane).
പുതുതായി നിർമിച്ച കെട്ടിടത്തിൽ വാട്ടർപ്രൂഫിങ് ജോലികൾ നടന്നു വരികയായിരുന്നു എന്നാണ് വിവരം. അപകടത്തില്‍ പരിക്കേറ്റയാളെ സ്വകാര്യ ആശുപത്രിയിൽ പ്രവേശിപ്പിച്ചതായി മുതിർന്ന ടിഎംസി ഉദ്യോഗസ്ഥൻ അറിയിച്ചു. "കെട്ടിടത്തിന്‍റെ മേൽക്കൂരയിൽ വാട്ടർ പ്രൂഫിങ് ജോലികൾ നടന്നു വരികയായിരുന്നു. ജോലി കഴിഞ്ഞ് തൊഴിലാളികൾ ഇറങ്ങി വരുന്നതിനിടെയാണ് ലിഫ്റ്റ് കയർ പൊട്ടിയതെന്ന് ഉദ്യോഗസ്ഥർ കൂട്ടിച്ചേർത്തു.
അപകടത്തെ തുടര്‍ന്ന് സംഭവ സ്ഥലത്തുണ്ടായിരുന്ന ദൃക്‌സാക്ഷികൾ ബല്‍ക്കം അഗ്നിശമന സേനയെ വിവരം അറിയിക്കുകയായിരുന്നു. മുൻ ലോക്കൽ കൗൺസിലർ സഞ്ജയ് ബോയറും സ്ഥലത്തെത്തി രക്ഷാപ്രവർത്തനത്തില്‍ പങ്കാളിയായി. ലിഫ്റ്റിൽ കുടുങ്ങിയ തൊഴിലാളികളെ നിലവില്‍ രക്ഷാസംഘം പുറത്ത് എത്തിച്ചതായി ടിഎംസി വൃത്തങ്ങൾ അറിയിച്ചു. സംഭവത്തെക്കുറിച്ച് പൊലീസ് അന്വേഷിക്കുന്നുണ്ട്.
മരിച്ചവരില്‍ മഹേന്ദ്ര ചൗപാൽ (32), രൂപേഷ് കുമാർ ദാസ് (21), ഹരുൺ ഷെയ്ഖ് (47), മിഥിലേഷ് (35), കരിദാസ് (38) എന്നീ തൊഴിലാളികളെ തിരിച്ചറിഞ്ഞു. മരിച്ചവരിൽ ഒരാളെ ഇതുവരെ തിരിച്ചറിഞ്ഞിട്ടില്ല. സുനിൽ കുമാർ ദാസ് (21) എന്നയാള്‍ക്കാണ് അപകടത്തിൽ പരിക്കേറ്റത്.
നോയിഡയിൽ ലിഫ്റ്റിനുള്ളിൽ അകപ്പെട്ട വയോധിക മരിച്ചു: നോയിഡയിലെ പൊലീസ് സ്റ്റേഷൻ സെക്‌ടർ 142 ഏരിയയ്ക്ക് കീഴിലുള്ള പരാസ് ടിയേറ സൊസൈറ്റിയിൽ ലിഫ്റ്റ് തകർന്ന് വയോധിക (73) മരിച്ചു (Old woman died after the lift collapsed). ഇക്കഴിഞ്ഞ ഓഗസ്റ്റ് മൂന്നിനായിരുന്നു സംഭവം. വൈകിട്ട് അഞ്ച് മണിയോടെയാണ് അപകടം നടന്നത്.
ഏറ്റവും മുകളിലെ നിലയിൽ നിന്നാണ് വയോധിക ലിഫ്റ്റില്‍ പ്രവേശിച്ചത്. ഈ സമയം ഇവര്‍ തനിച്ചായിരുന്നു ലിഫ്റ്റിൽ ഉണ്ടായിരുന്നത്. കയറിയതിന് പിന്നാലെ ലിഫ്റ്റിന്‍റെ കേബിൾ പൊട്ടുകയായിരുന്നു. എന്നാൽ ലിഫ്റ്റ് നിലത്തെത്താതെ നടുവിലെ നിലകളിൽ കുടുങ്ങി.
ഉടൻ തന്നെ വയോധികയെ ലിഫ്റ്റിന് പുറത്തെത്തിച്ച് ആശുപത്രിയിൽ പ്രവേശിപ്പിച്ചെങ്കിലും മരണപ്പെട്ടു. കേബിൾ പൊട്ടിയതിനെ തുടർന്നുണ്ടായ ആഘാതത്തില്‍ വയോധികയ്‌ക്ക് ഹൃദയാഘാതം ഉണ്ടായതാകാം മരണത്തിലേക്ക് നയിച്ചതെന്നാണ് പൊലീസ് പറയുന്നത്. അതേസമയം സംഭവത്തിൽ പ്രതിഷേധിച്ച് ബഹുനില പാർപ്പിട സമുച്ചയത്തിലെ താമസക്കാർ രംഗത്തെത്തി. കെട്ടിടത്തിൽ താമസിക്കുന്ന കുടുംബങ്ങളുടെ സുരക്ഷയ്ക്കായി മാനേജ്‌മെന്‍റ് ആവശ്യമായ നടപടികൾ സ്വീകരിക്കണമെന്നും ഇവർ ആവശ്യപ്പെട്ടു.
