ശ്രീനഗര്‍: കശ്‌മീരിലെ ഷോപ്പിയാന്‍ ജില്ലയില്‍ പണ്ഡിറ്റ് സമുദായത്തില്‍പ്പെട്ടയാള്‍ തീവ്രവാദികളുടെ വെടിയേറ്റ് കൊല്ലപ്പെട്ടു. കൊല്ലപ്പെട്ടയാളുടെ സഹോദരന് ആക്രമണത്തില്‍ ഗുരുതരമായി പരിക്കേറ്റു. സുനില്‍ കുമാര്‍ എന്നയാളാണ് കൊല്ലപ്പെട്ടത്. സഹോദരന് പിന്‍റുകുമാറിനെയാണ് ഗുരുതരമായ പരിക്കുകളോടെ ശ്രീനഗറിലെ ആശുപത്രിയില്‍ പ്രവേശിപ്പിച്ചിരിക്കുന്നത്.
ഇന്ന്(ഒക്‌ടോബര്‍ 15) ഷോപ്പിയാനിലെ ചോട്ടിപൊര എന്ന പ്രദേശത്തിലെ ഒരു ആപ്പിള്‍ തോട്ടത്തില്‍ നില്‍ക്കുകയായിരുന്ന സഹോദരങ്ങള്‍ക്ക് നേരെ തീവ്രവാദികള്‍ വെടിവയ്‌ക്കുകയായിരുന്നു. ആക്രമണം നടന്ന പ്രദേശം സുരക്ഷ സേന അടച്ചിരിക്കുകയാണ്.
കഴിഞ്ഞ ഏതാനും ആഴ്‌ചകളായി കശ്‌മീരില്‍ തീവ്രവാദി ആക്രമണങ്ങള്‍ വര്‍ധിച്ച് വരികയാണ്. മറ്റ് സംസ്ഥാനങ്ങളില്‍ നിന്നുള്ള ആളുകള്‍ക്കും പണ്ഡിറ്റ് സമുദായത്തില്‍പ്പെട്ടവര്‍ക്കും നേരെ പല തവണ തീവ്രവാദ ആക്രമണം കശ്‌മീര്‍ താഴ്‌വരയില്‍ ഉണ്ടായിട്ടുണ്ട്.
