അരാരിയ: ബിഹാറില്‍ മാധ്യമപ്രവർത്തകനെ വെടിവച്ചു കൊന്നു. വിമൽ കുമാർ യാദവ് എന്നയാളാണ് കൊല്ലപ്പെട്ടത്. അരാരിയ ജില്ലയിലെ റാണിഗഞ്ച് ബ്ലോക്കില്‍ ഇന്ന് പുലർച്ചെ അഞ്ച് മണിയോടെയാണ് സംഭവം. വിവരമറിഞ്ഞ് പൊലീസ് സംഭവസ്ഥലത്തെത്തി അന്വേഷണം ആരംഭിച്ചു.
ബിഹാറിലെ ദിനപത്രത്തിൽ ബ്ലോക്ക് റിപ്പോർട്ടറായിരുന്നു വിമൽ കുമാർ യാദവ്. നാലംഗ സംഘം ഇന്ന് പുലർച്ചെ വിമൽ കുമാർ യാദവിന്‍റെ വീടിന്‍റെ വാതിലിൽ മുട്ടിയെന്നും വിമൽ യാദവ് വാതിൽ തുറന്നയുടൻ മുന്നിൽ നിന്ന് വെടിയുതിർത്ത ശേഷം ഓടി രക്ഷപ്പെട്ടുവെന്നും നാട്ടുകാർ അറിയിച്ചതായാണ് പൊലീസ് പറയുന്നത്. വെടിയേറ്റയുടൻ ബന്ധുക്കൾ വിമലിനെ റാണിഗഞ്ച് റഫറൽ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.
സംഭവം നടന്നയുടൻ നാട്ടുകാർ ലോക്കൽ പൊലീസ് സ്റ്റേഷനില്‍ വിവരം അറിയിച്ചു. തുടർന്ന് എസ്‌പിയും സ്ഥലത്തെത്തി. അന്വേഷണം പുരോഗമിക്കുകയാണ്, കുറ്റവാളികളെ ഉടൻ പിടികൂടുമെന്ന് ജില്ല പൊലീസ് മേധാവി അറിയിച്ചു. വിവരമറിഞ്ഞ് അരാരിയ എംപി പ്രദീപ് കുമാർ സിംഗും സ്ഥലത്തെത്തി. ബിഹാറിൽ കുറ്റവാളികളുടെ മനോവീര്യം വളരെയധികം വർധിച്ചിട്ടുണ്ടെന്നും സംഭവത്തിന്‍റെ ധാർമിക ഉത്തരവാദിത്തം ഏറ്റെടുത്ത് മുഖ്യമന്ത്രി നിതീഷ് കുമാർ രാജിവെക്കണമെന്നും എംപി ആവശ്യപ്പെട്ടു.
അസിസ്റ്റന്‍റ് സബ് ഇൻസ്‌പെക്‌ടർ മന്ത്രിയെ വെടിവച്ച് കൊലപ്പെടുത്തി : കഴിഞ്ഞ ജനുവരിയിലാണ് ഒഡിഷയിൽ ആരോഗ്യ-കുടുംബക്ഷേമ വകുപ്പ് മന്ത്രി വെടിയേറ്റ് മരിച്ചത്. മന്ത്രി നബ കിഷോർ ദാസ് ആണ് കൊല്ലപ്പെട്ടത്. ജനങ്ങളുടെ പ്രശ്‌നങ്ങൾ കേൾക്കാനും പരിഹരിക്കാനുമുള്ള പുതിയ ഓഫിസ് ഉദ്ഘാടനത്തിനെത്തിയപ്പോഴാണ് മന്ത്രിക്ക് വെടിയേറ്റത്. അസിസ്റ്റന്‍റ് സബ് ഇൻസ്‌പെക്‌ടർ ഗോപാല്‍ ദാസാണ് മന്ത്രിയെ വെടിവച്ച് കൊലപ്പെടുത്തിയത്. ജർസുഗുഡ ജില്ലയിലെ ബ്രജ്‌രാജനഗറിൽ വച്ചാണ് മന്ത്രിക്ക് വെടിയേറ്റത്.
വഴിയില്‍ ജനങ്ങളുടെ സ്വീകരണം ഏറ്റുവാങ്ങാനായി കാറില്‍ നിന്ന് ഇറങ്ങവേ തൊട്ടടുത്ത് നിന്ന പൊലീസ് ഉദ്യോഗസ്ഥൻ വെടിയുതിർക്കുകയായിരുന്നു. മന്ത്രിയുടെ തൊട്ടരികില്‍ നിന്ന് നെഞ്ചിലേക്ക് വെടിയുതിർത്തു എന്നാണ് ദൃക്‌സാക്ഷികളുടെ മൊഴി. സംഭവത്തിന്‍റെ ദൃശ്യങ്ങളും പുറത്ത് വന്നിരുന്നു.
ജനങ്ങളുടെ സ്വീകരണം ഏറ്റുവാങ്ങാനായി കാറിന്‍റെ മുൻ സീറ്റില്‍ നിന്ന് ഇറങ്ങുമ്പോൾ തന്നെ മന്ത്രിക്ക് വെടിയേൽക്കുകയും പിന്നിലേക്ക് വീഴുന്നതുമാണ് ദൃശ്യങ്ങളിൽ ഉള്ളത്. മന്ത്രിയുടെ നെഞ്ചില്‍ നിന്ന് രക്തം വാർന്നൊഴുകുന്നതും ദൃശ്യങ്ങളിൽ വ്യക്തമാണ്.
വെടിയേറ്റ് കാറിന്‍റെ സീറ്റിലേക്ക് വീണ മന്ത്രിയെ ആളുകൾ ചേർന്ന് താങ്ങിയെടുത്തു. ഉടൻ തന്നെ മന്ത്രിയെ ജർസുഗുഡ ജില്ല ആശുപത്രിയിൽ പ്രവേശിപ്പിച്ചു. പിന്നീട് വിദഗ്‌ധ ചികിത്സക്കായി എയർലിഫ്‌റ്റ് ചെയ്‌ത് ഭുവനേശ്വറിലെ ആശുപത്രിയിലേക്ക് മാറ്റി.
ജർസുഗുഡയില്‍ നിന്നുള്ള പ്രബലനായ രാഷ്‌ട്രീയ നേതാവാണ് കൊല്ലപ്പെട്ട നബ കിഷോർ ദാസ്. സംഭവത്തില്‍ ഒഡിഷയിൽ ബിജെഡി പ്രവർത്തകരുടെ പ്രതിഷേധവും ശക്തമായിരുന്നു. മുഖ്യമന്ത്രി നവീൻ പട്‌നായിക്ക് മറ്റ് ബിജെഡി നേതാക്കൾ എന്നിവർ സംഭവത്തില്‍ കടുത്ത പ്രതിഷേധം അറിയിച്ച് രംഗത്തെത്തുകയും ചെയ്‌തു. സംഭവത്തില്‍ വൻ സുരക്ഷ വീഴ്‌ച ഉണ്ടായി എന്നും ആരോപണം ഉയർന്നു.
മുൻപ് കോൺഗ്രസിൽ പ്രവർത്തിച്ചിരുന്ന ദാസ് 2019ലെ തെരഞ്ഞെടുപ്പ് സമയത്താണ് ബിജെഡിയിൽ അംഗമായത്. ബിസിനസ് രംഗത്തും പ്രശസ്‌തനാണ് കൊല്ലപ്പെട്ട മന്ത്രി നബ കിഷോർ ദാസ്.
Read more : VIDEO: മന്ത്രിയെ വെടിവെച്ചത് തൊട്ടരികില്‍ നിന്ന് നെഞ്ചിലേക്ക്, കാരണം അന്വേഷിക്കുന്നു: നില ഗുരുതരം
