കത്ര (ജമ്മു കശ്‌മീർ) : ജമ്മു കശ്‌മീരിലെ കത്ര പട്ടണത്തിൽ ഭൂചലനം. ബുധനാഴ്‌ച പുലർച്ചെ 2.20 ഓടെയാണ് റിക്‌ടർ സ്കെയിലിൽ 4.3 തീവ്രത രേഖപ്പെടുത്തിയ ഭൂചലനമുണ്ടായത്. കത്രയുടെ 81 കിലോമീറ്റർ ചുറ്റളവിൽ ഭൂചലനം അനുഭവപ്പെട്ടതായി നാഷണൽ സെന്‍റർ ഫോർ സീസ്മോളജി (എൻസിഎസ്) അറിയിച്ചു. ആളപായമോ മറ്റ് നാശനഷ്‌ടങ്ങളോ റിപ്പോർട്ട് ചെയ്‌തിട്ടില്ല.
നേരത്തെ ജൂണ്‍ 13 ചൊവ്വാഴ്‌ച ഉച്ചയ്‌ക്ക് 1.33 ഓടെ ഉത്തരേന്ത്യൻ സംസ്ഥാനങ്ങളിൽ ഭൂചലനം ഉണ്ടായിരുന്നു. ഡൽഹി, ഹിമാചൽ പ്രദേശ്, പഞ്ചാബ്, ചണ്ഡീഗഡ് എന്നീ സംസ്ഥാനങ്ങളിലാണ് റിക്‌ടർ സ്കെയിലിൽ 5.4 തീവ്രത രേഖപ്പെടുത്തിയ ഭൂചലനമുണ്ടായത്. ജമ്മു കശ്‌മീരിലെ ദോഡ ജില്ലയിലെ ഗണ്ഡോ ഭലസ എന്ന വിദൂര ഗ്രാമത്തിനടുത്താണ് ഭൂചലനത്തിന്‍റെ പ്രഭവ കേന്ദ്രമെന്നും അധികൃതർ അറിയിച്ചിരുന്നു.
നാഷണൽ സെന്‍റര്‍ ഫോർ സീസ്മോളജി (എന്സിഎസ്) ആണ് ഭൂചലനം സംബന്ധിച്ച് ഔദ്യോഗിക സ്ഥിരീകരണം നടത്തിയത്. 'ഭൂകമ്പം: 5.4, 13-06-2023, 13:33:42 ഐഎസ്‌ടി (India Standard Time), ലാറ്റ്: 33.15 & ദൈർഘ്യം: 75.82, ആഴം: ആറ് കി.മീ, സ്ഥലം: ഡോഡ, ജമ്മു കശ്‌മീർ, ഇന്ത്യ' -എന്സിഎസ് ട്വീറ്റ് ചെയ്‌തു.
അതേസമയം ഭൂചലനത്തിൽ കെട്ടിടങ്ങള്‍ക്ക് നാശനഷ്‌ടമോ ആളപായമോ റിപ്പോർട്ട് ചെയ്‌തിട്ടില്ലെന്നും അധികൃതര്‍ വ്യക്തമാക്കിയിരുന്നു. ജൂണ്‍ 11ന് അരുണാചൽ പ്രദേശിലെ പടിഞ്ഞാറൻ കമെങ് ജില്ലയിലും ഭൂചലനം ഉണ്ടായിരുന്നു. റിക്‌ടർ സ്കെയിലിൽ 3.2 തീവ്രത രേഖപ്പെടുത്തിയ ഭൂചലനമാണുണ്ടായതെന്ന് കേന്ദ്ര ഗവൺമെന്‍റിന്‍റെ ഭൗമശാസ്ത്ര മന്ത്രാലയത്തിന്‍റെ നാഷണൽ സെന്‍റർ ഫോർ സീസ്മോളജി (എൻസിഎസ്) അറിയിച്ചിരുന്നു.
രാവിലെ 6.34നാണ് ഭൂകമ്പം ഉണ്ടായത്. മേഘാലയയിലെ ഷില്ലോങ്ങിൽ നിന്ന് 173 കിലോമീറ്റർ വടക്ക്-കിഴക്കായി സ്ഥിതി ചെയ്യുന്ന പടിഞ്ഞാറൻ കമെങ് ജില്ലയുടെ പല ഭാഗങ്ങളിലും ചെറിയ തോതില്‍ ഭൂചലനം അനുഭവപ്പെട്ടിരുന്നു. ഭൂമിയുടെ ഉപരിതലത്തിൽ നിന്ന് 33 കിലോമീറ്റർ ആഴത്തിൽ 27.02 അക്ഷാംശത്തിലും 92.57 രേഖാംശത്തിലും പ്രകമ്പനം ഉണ്ടായി എന്നാണ് എൻസിഎസ് റിപ്പോർട്ട്.
ALSO READ : ഡല്‍ഹി അടക്കമുള്ള വടക്കേ ഇന്ത്യന്‍ സംസ്ഥാനങ്ങളില്‍ ഭൂചലനം
ജൂലൈ ആദ്യ വാരം അസമിലെ തേസ്‌പൂരിലും ഭൂകമ്പം ഉണ്ടായിരുന്നു. റിക്‌ടർ സ്കെയിലിൽ 3.7 തീവ്രത രേഖപ്പെടുത്തിയ ഭൂകമ്പത്തിന്‍റെ പ്രഭവ കേന്ദ്രം തേസ്‌പൂരിൽ നിന്ന് 37 കിലോമീറ്റർ പടിഞ്ഞാറ് 10 കിലോമീറ്റർ താഴ്‌ചയിലായിരുന്നു. സംഭവത്തിൽ ആളപയാമോ, കെട്ടിടങ്ങൾക്ക് കേടുപാടുകളോ റിപ്പോർട്ട് ചെയ്‌തിരുന്നില്ല.
നേരത്തെ ജൂണ്‍ 9ന് ലഡാക്കിലും ഭൂചലനം റിപ്പോർട്ട് ചെയ്‌തിരുന്നു. റിക്‌ടർ സ്കെയിലിൽ 3.9 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. ഇതിന് മുൻപ് മെയ് 11ന് ഉത്തരാഖണ്ഡിലെ ഭൂകമ്പ സാധ്യതയുള്ള ജില്ലയായ പിത്തോരാഗഢിൽ റിക്‌ടർ സ്കെയിലിൽ 3.1 തീവ്രത രേഖപ്പെടുത്തിയ ഭൂചലനവും അനുഭവപ്പെട്ടിരുന്നു.
എൻസിഎസ് പുറത്തുവിട്ട റിപ്പോർട്ട് പ്രകാരം പിത്തോരഗഡിന് 32 കിലോമീറ്റർ വടക്കായിരുന്നു ഭൂചലനത്തിന്‍റെ പ്രഭവകേന്ദ്രം. ജില്ലയിൽ നിന്ന് അഞ്ച് കിലോമീറ്റർ വരെയുള്ള പ്രദേശങ്ങളിൽ ഭൂകമ്പം അനുഭവപ്പെട്ടിരുന്നു.
