ന്യൂഡൽഹി : നടി ജാക്വിലിൻ ഫെർണാണ്ടസും സുകേഷ് ചന്ദ്രശേഖറിന്‍റെ സഹായി പിങ്കി ഇറാനിയും തമ്മിൽ ചോദ്യം ചെയ്യലിനിടെ വാക്‌പോര്. കള്ളപ്പണം വെളുപ്പിക്കൽ കേസിൽ ചോദ്യം ചെയ്യലിനായി കഴിഞ്ഞ ദിവസം ഡൽഹി പൊലീസിന്‍റെ സാമ്പത്തിക കുറ്റകൃത്യ വിഭാഗത്തിന് മുന്നിൽ ഇരുവരും ഹാജരായിരുന്നു. എട്ട് മണിക്കൂർ നീണ്ട ചോദ്യം ചെയ്യലിൽ രണ്ട് മണിക്കൂറോളം ഇരുവരും പരസ്‌പരം തർക്കിച്ചു.
200 കോടി രൂപ ജനങ്ങളെ വഞ്ചിച്ചെന്ന കേസിനെക്കുറിച്ച് അറിഞ്ഞിട്ടും ജാക്വിലിൻ സുകേഷിൽ നിന്ന് സമ്മാനങ്ങൾ സ്വീകരിച്ചുവെന്ന് പിങ്കി ആരോപിച്ചു. അതേസമയം സുകേഷിന്‍റെ പശ്ചാത്തലത്തെക്കുറിച്ച് തനിക്ക് അറിയില്ലായിരുന്നുവെന്നും പിങ്കി കള്ളം പറയുകയാണെന്നുമായിരുന്നു ജാക്വിലിന്‍റെ വാദം. തര്‍ക്കം കടുത്തപ്പോള്‍ ഉദ്യോഗസ്ഥര്‍ ഇടപെടുകയായിരുന്നു.
രാവിലെ 11.30 ന് ആരംഭിച്ച ചോദ്യം ചെയ്യലിൽ ജാക്വിലിൻ ഫെർണാണ്ടസിനായി 100 ചോദ്യങ്ങളാണ് സാമ്പത്തിക കുറ്റകൃത്യ വിഭാഗം തയ്യാറാക്കിയിരുന്നത്. ഡൽഹി പൊലീസ് ജാക്വിലിന് നൽകിയ മൂന്നാമത്തെ സമൻസ് ആയിരുന്നു ഇത്. കഴിഞ്ഞ രണ്ട് തവണയും താരം ഹാജരായിരുന്നില്ല.
ALSO READ: കള്ളപ്പണം വെളുപ്പിക്കല്‍ കേസ്: ബോളിവുഡ് നടി ജാക്വലിൻ ഫെർണാണ്ടസ് ചോദ്യം ചെയ്യലിന് ഹാജരായി
2021 ഓഗസ്റ്റ് 30, ഒക്‌ടോബർ 20 തീയതികളിൽ ജാക്വിലിന്‍റെ മൊഴി ഇഡി രേഖപ്പെടുത്തിയിരുന്നു. മൊഴിയിൽ സുകേഷിൽ നിന്ന് സമ്മാനങ്ങൾ സ്വീകരിച്ചതായി താരം സമ്മതിച്ചിരുന്നതായി ഇഡി അറിയിച്ചു. ബെംഗളൂരു സ്വദേശിയായ സുകേഷ് ചന്ദ്രശേഖർ നിലവിൽ കള്ളപ്പണം വെളുപ്പിക്കൽ കേസിൽ ഡൽഹി ജയിലിൽ കഴിയുകയാണ്. ഇയാൾക്കെതിരെ പത്തിലധികം ക്രിമിനൽ കേസുകളുണ്ട്.
