ന്യൂഡൽഹി: കൊവിഡ് രണ്ടാം തരംഗത്തിന്‍റെ കടുത്ത വെല്ലുവിളി നേരിടുന്ന ഇന്ത്യയ്ക്ക് സഹായവുമായി സ്വിറ്റ്സർലൻഡും നെതർലൻഡും. ഇന്ത്യയ്ക്കുള്ള വൈദ്യസഹായവുമായി സ്വിറ്റ്സർലൻഡിൽ നിന്നും നെതർലൻഡിൽ നിന്നുമെത്തിയ രണ്ട് വിമാനങ്ങൾ ബുധനാഴ്ച ഡൽഹി വിമാനത്താവളത്തിലെത്തി.
മെയ് 7ന് നെതർലൻഡിൽ നിന്ന് 449 വെന്‍റിലേറ്ററുകളും 100 ഓക്സിജൻ കോൺസൺട്രേറ്ററുകളും മറ്റ് മെഡിക്കൽ സാധനങ്ങളും അടങ്ങിയ ആദ്യ വിമാനം ഇന്ത്യയിലെത്തിയിരുന്നു. നെതർലൻഡിൽ നിന്നുള്ള സഹായത്തെ രാജ്യം വിലമതിക്കുന്നുവെന്ന് പറഞ്ഞ വിദേശകാര്യ മന്ത്രാലയം വക്താവ് അരിന്ദം ബാഗ്ചി ശേഷിക്കുന്ന മെഡിക്കൽ ഉപകരണങ്ങൾ വരും ദിവസങ്ങളിൽ ഇന്ത്യയിലേക്ക് അയക്കുമെന്ന് അറിയിച്ചു.
നേരത്തെ സ്വിറ്റ്സർലൻഡിൽ നിന്ന് 600 ഓക്സിജൻ കോൺസൺട്രേറ്ററുകളും 50 വെന്‍റിലേറ്ററുകളും മറ്റ് മെഡിക്കൽ സാധനങ്ങളും ഇന്ത്യക്ക് ലഭിച്ചിരുന്നു. സാധ്യമായ എല്ലാ സഹായങ്ങളും എത്രയും വേഗം ഇന്ത്യക്ക് നേടിക്കൊടുക്കുക എന്നതാണ് ഞങ്ങളുടെ ലക്ഷ്യമെന്ന് സ്വിസ് അംബാസഡർ ഡോ. റാൽഫ് ഹെക്നർ പറഞ്ഞു.
യുകെ, റഷ്യ, യുഎസ് എന്നിവയുൾപ്പെടെ നിരവധി രാജ്യങ്ങൾ ഇന്ത്യക്ക് നേരെ മെഡിക്കൽ ഉപകരണങ്ങളുടെ രൂപത്തിലും മറ്റും സഹായഹസ്തം നീട്ടിയിരുന്നു. അതേസമയം, കഴിഞ്ഞ 24 മണിക്കൂറിനുള്ളിൽ രാജ്യത്ത് 3,29,942 പുതിയ കൊവിഡ് കേസുകൾ റിപ്പോർട്ട് ചെയ്തതായി ആരോഗ്യ മന്ത്രാലയം അറിയിച്ചു.
