തിരുവണ്ണാമലൈ: തമിഴ്‌നാട്ടില്‍ മദ്യപനെ ടിഎന്‍എസ്‌ടിസി (തമിഴ്‌നാട് സ്റ്റേറ്റ് ട്രാന്‍സ്‌പോര്‍ട്ട് കോര്‍പ്പറഷേന്‍) ബസിന്‍റെ ചവിട്ടുപടിയില്‍ നിന്നും തള്ളിയിട്ട കണ്ടക്‌ടര്‍ക്ക് സസ്‌പെന്‍ഷന്‍. തിരുവണ്ണാമലൈ ജില്ലയിലെ വന്ദവാസി - ബെംഗളൂരു റൂട്ടിലോടുന്ന ടിഎന്‍എസ്‌ടിസി ബസിലെ കണ്ടക്‌ടര്‍ പ്രകാശിനെതിരെയാണ് വകുപ്പുതല നടപടി. ശനിയാഴ്‌ച വൈകിട്ട് ബെംഗളൂരുവില്‍ നിന്നും മടങ്ങവെ വന്ദവാസിയില്‍ വച്ചാണ് സംഭവം.
ബസിന്‍റെ ചവിട്ടുപടിയില്‍ നില്‍ക്കവെ കണ്ടക്‌ടര്‍ പുറകില്‍ നിന്ന് കഴുത്തിലേക്ക് വെള്ളമൊഴിച്ചു. തുടര്‍ന്ന്, ആക്രോശിച്ചുകൊണ്ട് ശക്തിയോടെ റോഡിലേക്ക് തള്ളിയിടുകയായിരുന്നു. ദൃശ്യം സോഷ്യൽ മീഡിയയിൽ വൈറലായതോടെ കണ്ടക്‌ടര്‍ക്കെതിരെ വന്‍ വിമര്‍ശനമാണ് ഉയര്‍ന്നത്. തുടര്‍ന്നാണ്, ഇയാള്‍ക്കെതിരെ വില്ലുപുരം ടിഎന്‍എസ്‌ടിസി സോണൽ ഡയറക്‌ടര്‍ ജോസഫാണ് സസ്‌പെന്‍ഷന്‍ നടപടി സ്വീകരിച്ചത്.
