അന്ധേരി (മഹാരാഷ്‌ട്ര): മയക്കുമരുന്ന് വാങ്ങാനുള്ള പണത്തിനായി കുട്ടികളെ വില്‍പന നടത്തിയ സംഭവത്തില്‍ മാതാപിതാക്കള്‍ ഉള്‍പ്പെടെ മൂന്ന് പേര്‍ അറസ്റ്റില്‍. മഹാരാഷ്‌ട്ര അന്ധേരിയിലാണ് ഞെട്ടിക്കുന്ന സംഭവം. രണ്ട് വയസുള്ള ആണ്‍കുട്ടിയേയും നവജാത ശിശുവിനെയുമാണ് മാതാപിതാക്കള്‍ 60,000 രൂപയ്‌ക്കും 14,000 രൂപയ്‌ക്കും വിറ്റത് (Children sold for money to buy drugs in Maharashtra).
ബുധനാഴ്‌ച രാത്രിയിലാണ് ഡിഎന്‍ നഗര്‍ പൊലീസ് സ്റ്റേഷനില്‍ ഇത് സംബന്ധിച്ച് കേസ് രജിസ്റ്റര്‍ ചെയ്‌തത്. സംഭവത്തില്‍ മൂന്ന് പേര്‍ അറസ്റ്റിലായിട്ടുണ്ട്. രണ്ട് വര്‍ഷം മുന്‍പാണ് മൂത്ത കുട്ടിയെ മാതാപിതാക്കള്‍ വില്‍പന നടത്തിയത്. കുട്ടികള്‍ക്കായുള്ള തെരച്ചില്‍ ആരംഭിച്ചതായി ഡെപ്യൂട്ടി കമ്മിഷണര്‍ രാജ് തിലക് റോഷന്‍ അറിയിച്ചു.
ബന്ധുവാണ് സംഭവത്തില്‍ പൊലീസിനെ സമീപിച്ചത്. പരാതിയെ തുടര്‍ന്ന് പൊലീസ് കുട്ടികളുടെ പിതാവ് ഷബീര്‍ സംഷേര്‍ ഖാന്‍, മാതാവ് സാനിയ ഷബീര്‍ ഖാന്‍, ഉഷ റാത്തോഡ്, ഷക്കീല്‍ മക്രാനി എന്നിവര്‍ക്കെതിരെ കേസ് എടുത്തു. ഷബീറിന്‍റെ സഹോദരി ആണ് പരാതിക്കാരി.
മയക്കുമരുന്നിന് അടിമകളായ മാതാപിതാക്കള്‍ : പരാതിക്കാരിയായ ഷബീറിന്‍റെ സഹോദരി ബാന്ദ്ര പ്രദേശത്താണ് താമസിക്കുന്നത്. സഹോദരിക്കൊപ്പം ആയിരുന്നു ഷബീറും കുടുംബവും കഴിഞ്ഞിരുന്നത്. ഷബീറും സാനിയയും മയക്കുമരുന്നിന് അടിമകളായിരുന്നു. ഇരുവരും തമ്മില്‍ വഴക്ക് പതിവായിരുന്നെന്നും ബന്ധുക്കള്‍ പറഞ്ഞു. ഇതിനിടെ ദമ്പതികള്‍ കുടുംബവീട്ടില്‍ നിന്ന് സാനിയയുടെ വെര്‍സോവയിലെ വീട്ടിലേക്ക് താമസം മാറി. സുബാന്‍ എന്നും ഹുസൈന്‍ എന്നും പേരുള്ള രണ്ട് കുട്ടികളാണ് ദമ്പതികള്‍ക്ക് ഉണ്ടായിരുന്നത്.
മയക്കുമരുന്നിനായി വിറ്റത് സ്വന്തം മക്കളെ: ഇക്കഴിഞ്ഞ ഒക്‌ടോബര്‍ അഞ്ചിന് പണം ആവശ്യപ്പെട്ട് ഷബീറും ഭാര്യയും വീണ്ടും സഹോദരിയുടെ വീട്ടിലെത്തിയിരുന്നു. ആ സമയത്ത് കുട്ടികള്‍ ദമ്പതികള്‍ക്കൊപ്പം ഉണ്ടായിരുന്നില്ല. കുട്ടികളെ കുറിച്ച് സഹോദരി ആവര്‍ത്തിച്ച് ചോദിച്ചിട്ടും ഇരുവരും വ്യക്തമായ മറുപടി നല്‍കിയില്ല.
വീണ്ടും വിവരം തെരക്കിയതോടെ ഇരുവരും സത്യം പറയുകയായിരുന്നു. ഒന്നര വര്‍ഷം മുന്‍പ് മകന്‍ ഹുസൈനെയും ജനിച്ച് ദിവസങ്ങള്‍ക്കുള്ളില്‍ മകളെയും വിറ്റെന്ന് ദമ്പതികള്‍ സമ്മതിച്ചു. മയക്കുമരുന്ന് വാങ്ങാന്‍ പണമില്ലാത്തതിനാലാണ് ഇങ്ങനെ ചെയ്‌തതെന്നും ഇവര്‍ പറഞ്ഞു.
മൂത്ത സഹോദരി ഉഷ റാത്തോഡിന്‍റെ സഹായത്തോടെയാണ് ആദ്യത്തെ കുട്ടിയെ വില്‍പന നടത്തിയത് എന്നും ഇരുവരും സമ്മതിച്ചു. 60,000 രൂപയ്‌ക്കാണ് കുട്ടിയെ വിറ്റതെന്നും 10,000 രൂപ ഉഷയ്‌ക്ക് കമ്മിഷനായി നല്‍കിയെന്നും ഇവര്‍ പറഞ്ഞു. ഇളയ കുട്ടിയെ ഡിഎന്‍ നഗര്‍ ഡോംഗര്‍ മേഖലയില്‍ താമസിക്കുന്ന ഷക്കീല്‍ മക്രാനിക്ക് 14000 രൂപയ്‌ക്ക് വില്‍ക്കുകയായിരുന്നു (parents sold children to buy drugs).
ഒടുവില്‍ അറസ്റ്റ്: ഷബീറിന്‍റെ സഹോദരി ഷബീറിനും ഭാര്യയ്‌ക്കും ഉഷ റാത്തോഡിനും ഷക്കീല്‍ മക്രാനിക്കും എതിരെ ഡിഎന്‍ നഗര്‍ പൊലീസില്‍ പരാതി നല്‍കി. പിന്നാലെ ഷബീറും ഭാര്യയും ഷക്കീലും അറസ്റ്റിലായി. ഒളിവില്‍ കഴിയുന്ന ഉഷ റാത്തോഡിനായി പൊലീസ് അന്വേഷണം നടത്തുകയാണ്.
