റായ്‌പൂര്‍: പത്ത് ഡിആർജി (ഡിസ്‌ട്രിക്‌റ്റ് റിസർവ് ഗാർഡ്) ജവാൻമാർ കൊല്ലപ്പെട്ട ദന്തേവാഡ സ്‌ഫോടനത്തിൽ പുതിയ കണ്ടെത്തല്‍. റോഡ് തുരന്ന് ഉഗ്ര ശേഷിയുള്ള സ്‌ഫോടക വസ്‌തുക്കള്‍ സ്ഥാപിച്ചാണ് മാവോയിസ്റ്റുകള്‍ സ്‌ഫോടനം നടത്തിയത് എന്നാണ് ബസ്‌തര്‍ പൊലീസ് നല്‍കുന്ന വിവരം. മാസങ്ങള്‍ക്ക് മുമ്പ് 'ഫോക്‌സ്‌ഹോൾ മെക്കാനിസം' (തുരങ്കം കുഴിക്കുന്ന രീതി) ഉപയോഗിച്ച് കുഴിച്ച തുരങ്കത്തിലാണ് മാവോയിസ്റ്റുകള്‍ സ്‌ഫോടക വസ്‌തുക്കള്‍ ഘടിപ്പിച്ചത്.
മാസങ്ങള്‍ക്ക് മുമ്പ് റോഡില്‍ തുരങ്കം ഉണ്ടാക്കി സ്‌ഫോടക വസ്‌തു സ്ഥാപിക്കുകയും അതുമായി ബന്ധിപ്പിച്ച വയർ നിലത്തു നിന്ന് 2-3 ഇഞ്ച് അടി താഴ്‌ചയില്‍ ഒളിപ്പിച്ചിരിക്കുകയുമാണ് ചെയ്‌തിരിക്കുന്നത് എന്ന് പൊലീസ് പറഞ്ഞു. കണ്ടെത്തലിന്‍റെ അടിസ്ഥാനത്തിൽ നക്‌സൽ കേഡർമാർക്കെതിരെ ബസ്‌തർ പൊലീസ് കേസെടുത്തിട്ടുണ്ട്.
ബുധനാഴ്‌ച ഛത്തീസ്‌ഗഡിലെ ദന്തേവാഡയിൽ ഉണ്ടായ സ്‌ഫോടനത്തിൽ 10 ജില്ല റിസർവ് ഗാർഡ് (ഡിആർജി) ഉദ്യോഗസ്ഥരും ഒരു സാധാരണക്കാരനും കൊല്ലപ്പെട്ടിരുന്നു. അരന്‍പൂരിന് സമീപം ഡിആര്‍ജി ജവാന്‍മാര്‍ വാനിൽ യാത്ര ചെയ്യുമ്പോഴായിരുന്നു സ്‌ഫോടനം. സ്ഫോടനത്തെ തുടര്‍ന്ന് ഏകദേശം 10 അടി ആഴത്തിലുള്ള ഗർത്തം രൂപപ്പെട്ടതായി സംഭവ സ്ഥലത്ത് നിന്നുള്ള ദൃശ്യങ്ങൾ വ്യക്തമാക്കുന്നു. ഉഗ്ര ശേഷിയുള്ള സ്‌ഫോടക വസ്‌തുക്കള്‍ ഉപയോഗിച്ചു എന്നതിനുള്ള തെളിവുകൂടിയാണ് ആഴത്തിലുള്ള ഗര്‍ത്തം.
മാവോയിസ്റ്റുകളുടെ സാന്നിധ്യത്തെക്കുറിച്ച് വിവരം ലഭിച്ചതിനെ തുടർന്നാണ് ജവാൻമാർ അരൻപൂരിലേക്ക് പോയത്. ഇവർ പ്രദേശത്ത് നിന്ന് മടങ്ങുമ്പോഴായിരുന്നു സ്‌ഫോടനം. ഛത്തീസ്‌ഗഡ് മുഖ്യമന്ത്രി ഭൂപേഷ് ബാഗേൽ വീരമൃത്യു വരിച്ച ജവാന്‍മാരുടെ കുടുംബങ്ങളെ അനുശോചനം അറിയിച്ചു.
