ന്യൂഡൽഹി : ഉറങ്ങിക്കിടക്കവെ ട്രെയിന്‍ യാത്രക്കാരിയുടെ, 2.5 ലക്ഷം മൂല്യം വരുന്ന സ്വർണം കവർന്നു. കൊച്ചുവേളി രപ്‌തിസാഗർ എക്‌സ്പ്രസിൽ യാത്ര ചെയ്യവെ മഹാരാഷ്‌ട്രയിലെ ബൽഹർഷ റെയിൽവേ സ്റ്റേഷനില്‍ വച്ചാണ് സംഭവം. നാല്‍പതുകാരിയായ ബേബി തിവാരിയാണ് കവര്‍ച്ചയ്‌ക്ക് ഇരയായത്.
ഉത്തർപ്രദേശിലെ ഗൊരഖ്‌പൂരിൽ നിന്ന് തമിഴ്‌നാട്ടിലെ സേലത്തേക്ക് പോകുന്നതിനിടെ തിങ്കളാഴ്ച പുലർച്ചെ നാല് മണിയോടെയാണ് സംഭവം. ഉറങ്ങി കിടക്കുന്നതിനിടെ 20 വയസ് തോന്നിക്കുന്നയാള്‍ തന്‍റെ ആഭരണങ്ങള്‍ അടങ്ങിയ ഹാൻഡ് ബാഗ് തട്ടിപ്പറിച്ചെന്നാണ് സ്‌ത്രീയുടെ പരാതി. നാല് വർഷമായി ഭർത്താവ് ജോലി ചെയ്യുന്ന തിരുച്ചിറപ്പള്ളി ലക്ഷ്യമാക്കിയായിരുന്നു സ്‌ത്രീയുടെ യാത്ര.
ഞായറാഴ്‌ചയാണ് ട്രെയിനില്‍ യാത്ര ആരംഭിച്ചത്. എ.സി കോച്ചില്‍ രണ്ട് കുട്ടികള്‍ക്കൊപ്പമായിരുന്നു സഞ്ചരിച്ചിരുന്നത്. മകന്‍റെ ഉപനയനം (ഹിന്ദു വിഭാഗത്തില്‍ ബാലന്മാരുടെ വേദാധ്യയനത്തിന് തുടക്കംകുറിക്കുന്ന ചടങ്ങ്) ഉൾപ്പെടെയുള്ള വിവിധ ചടങ്ങുകൾക്ക് വേണ്ടിയായിരുന്നു യാത്ര.
പിടികൂടാന്‍ ശ്രമിച്ചു, നടന്നില്ല : ട്രെയിനിൽ ഇത്തരത്തിലൊരു മോഷണം നടക്കുമെന്ന് താന്‍ ഒരിക്കലും കരുതിയില്ല. സി.ആര്‍.പി.എഫ് കനത്ത സുരക്ഷ ഉറപ്പാക്കുമെന്ന് ചിന്തിച്ചുവെന്നും സ്‌ത്രീ മാധ്യമങ്ങളോട് പറഞ്ഞു. മോഷ്‌ടാവിനെ പിടികൂടാന്‍ ശ്രമിച്ചെങ്കിലും നടന്നില്ല. അയാള്‍ വളരെ വേഗത്തിൽ ഓടി രക്ഷപ്പെട്ടെന്നും അവര്‍ പറഞ്ഞു.
സാധാരണയായി, താൻ മിക്ക ആഭരണങ്ങളും ധരിക്കുമായിരുന്നു. എന്നാല്‍, ചൂട് കാരണം ബാഗിൽ സൂക്ഷിയ്‌ക്കുകയാണ് ഉണ്ടായത്. ട്രെയിൻ പതുക്കെ നീങ്ങുന്നതിനിടെയാണ് പ്രതി കൃത്യം നിര്‍വഹിച്ചത്. ഉദ്യോഗസ്ഥർ തങ്ങളേക്കാൾ അൽപ്പം വേഗത്തിൽ ശ്രമിച്ചിരുന്നെങ്കില്‍ കള്ളനെ പിടികൂടാന്‍ കഴിയുമായിരുന്നു.
ട്രെയിൻ നിർത്താൻ ആർ.പി.എഫിനോടും മറ്റ് ഉദ്യോഗസ്ഥരോടും നിലവിളിച്ചെങ്കിലും ഉടൻ സഹായം ലഭിച്ചില്ല. ആഭരണങ്ങൾ തിരികെ ലഭിക്കുമെന്നാണ് പ്രതീക്ഷ. ചിലത് അമ്മ സമ്മാനിച്ചതാണ്. മറ്റുള്ളവ തന്‍റെ സമ്പാദ്യം കൊണ്ട് വാങ്ങിയതാണെന്നും അവര്‍ പറഞ്ഞു.
