ഷെയ്ഖ്‌പുര/ ബിഹാർ : അശ്ലീല വീഡിയോകള്‍ കണ്ടശേഷം പ്രായപൂർത്തിയാകാത്ത രണ്ട് പെണ്‍കുട്ടികളെ കൂട്ടബലാത്സംഗത്തിന് ഇരകളാക്കി പ്രായപൂർത്തിയാകാത്ത ഒരു കൂട്ടം ആണ്‍കുട്ടികൾ. ബലാത്സംഗത്തിന് പിന്നാലെ സംഭവം പുറത്തുപറയാതിരിക്കാൻ പ്രതികൾ പെണ്‍കുട്ടികൾക്ക് അഞ്ച് രൂപയും നൽകി. ബിഹാറിലെ ഷെയ്ഖ്‌പുര ജില്ലയിലാണ് സംഭവം. കേസിൽ രണ്ട് പ്രായപൂർത്തിയാകാത്ത ആണ്‍കുട്ടികളെ പൊലീസ് പിടികൂടി.
വയലിൽ നിന്ന് പച്ചക്കറി ശേഖരിക്കാൻ പോയതായിരുന്നു 8, 9 വയസുകളിലുള്ള പെണ്‍കുട്ടികൾ. ഇതിനിടെ പ്രായപൂർത്തിയാകാത്ത ആറ് ആണ്‍കുട്ടികൾ ചേർന്ന് ഇവരെ കൂട്ടബലാത്സംഗം ചെയ്യുകയായിരുന്നു. ശേഷം പെണ്‍കുട്ടികൾ വീട്ടിലേക്ക് മടങ്ങിയെങ്കിലും ഇതിൽ ഒരു പെണ്‍കുട്ടിയുടെ ആരോഗ്യ നില വഷളായി.
തുടർന്ന് വീട്ടുകാർ നടത്തിയ അന്വേഷണത്തിലാണ് ബലാത്സംഗവിവരം അറിയുന്നത്. തുടർന്ന് ആണ്‍കുട്ടികളുടേയും പെണ്‍കുട്ടികളുടേയും കുടുംബാംഗങ്ങൾ തമ്മിൽ വാക്കേറ്റവും ഉണ്ടായി. ഉടൻ തന്നെ പൊലീസ് സ്ഥലത്തെത്തുകയും പ്രായപൂർത്തിയാകാത്ത രണ്ട് പ്രതികളെ കസ്റ്റഡിയിലെടുക്കുകയും ചെയ്‌തു. എന്നാൽ ബാക്കിയുള്ളവർ രക്ഷപ്പെട്ടു.
ALSO READ: കോട്ടയത്ത് ആൾതാമസമില്ലാത്ത വീട്ടിലെ കിണറ്റിൽ മധ്യവയസ്‌കന്‍ മരിച്ച നിലയില്‍
ചോദ്യം ചെയ്യലിൽ പ്രതികൾ കുറ്റം സമ്മതിക്കുകയും ഫോണിൽ അശ്ലീല വീഡിയോ കണ്ടതിന് പിന്നാലെയാണ് ബലാത്സംഗം ചെയ്യാൻ തീരുമാനിച്ചതെന്ന് സമ്മതിക്കുകയും ചെയ്‌തു. സംഭവത്തിൽ എഫ്‌ഐആർ രജിസ്റ്റർ ചെയ്ത ശേഷം രണ്ട് പെൺകുട്ടികളെയും മെഡിക്കൽ പരിശോധനയ്ക്ക് അയച്ചു. അന്വേഷണത്തിന് ശേഷം തുടർനടപടികൾ സ്വീകരിക്കുമെന്ന് പൊലീസ് അറിയിച്ചു.
