അമരാവതി: മൂന്ന് തലസ്ഥാന പദ്ധതി പിൻ‌വലിക്കുകയോ നിയമസഭയെ പിരിച്ചുവിടുകയോ ചെയ്യണമെന്ന് മുഖ്യമന്ത്രി വൈ.എസ്. ജഗൻ‌മോഹൻ റെഡ്ഡിയോട് ആവശ്യപ്പെട്ട് പ്രതിപക്ഷ നേതാവ് എൻ. ചന്ദ്രബാബു നായിഡു. തെരഞ്ഞെടുപ്പിൽ ജനങ്ങൾ വോട്ടുചെയ്ത് വൈ എസ് ആർ കോൺഗ്രസ് പാർട്ടിയെ വീണ്ടും അധികാരത്തിലെത്തിച്ചാൽ അവരുടെ ഉത്തരവ് അംഗീകരിക്കാമെന്നും പിന്നീട് തീരുമാനത്തിനെതിരെ വിയോജിപ്പുയർത്തില്ലെന്നും അദ്ദേഹം പറഞ്ഞു.
അമരാവതി ഏക തലസ്ഥാനനഗരമായി തുടരുമെന്നും അത് പൂർണമായി വികസിക്കുമെന്നും 2019ലെ തെരഞ്ഞെടുപ്പ് പ്രചാരണത്തിൽ മുഖ്യമന്ത്രിയും പാർട്ടി നേതാക്കളും ജനങ്ങൾക്ക് വാഗ്ദാനം നൽകിയിട്ടുണ്ടെന്നും മുൻ മുഖ്യമന്ത്രി ഓർമ്മിപ്പിച്ചു. ഈ വാഗ്ദാനം നൽകിയ ശേഷം സംസ്ഥാനത്തെ അഞ്ച് കോടി ജനങ്ങളുടെ അംഗീകാരമില്ലാതെ തലസ്ഥാനം അമരാവതിയിൽ നിന്ന് മാറ്റാൻ മുഖ്യമന്ത്രിക്ക് അവകാശമില്ലെന്നും അദ്ദേഹം പറഞ്ഞു.
ജഗൻ റെഡ്ഡി മുഖ്യമന്ത്രിയായാലും അമരാവതി നശിപ്പിക്കില്ലെന്ന് വൈഎസ്ആർസിപി നേതാക്കൾ നിരപരാധികളായ വോട്ടർമാരെ വിശ്വസിപ്പിച്ചതെങ്ങനെയെന്ന് നായിഡു ചോദിച്ചു. എപി പുനഃസംഘടന നിയമം 2014 അനുസരിച്ചാണ് അമരാവതിയെ തലസ്ഥാനമായി തെരഞ്ഞെടുത്തത്. ഇത് നശിപ്പിക്കാൻ ഒരു സർക്കാരിനും അവകാശമില്ലെന്നും അത് ഭാവി തലമുറയെ തകർക്കുന്ന വലിയ പ്രശ്നങ്ങൾ സൃഷ്ടിക്കുമെന്നും നായിഡു കൂട്ടിചേർത്തു.
വിശാഖപട്ടണത്തെ ഭരണ തലസ്ഥാനമായും കർനൂലിനെ ജുഡീഷ്യൽ തലസ്ഥാനമായും വികസിപ്പിക്കാൻ വൈ.എസ്.ആർ.സി.പി സർക്കാർ പദ്ധതിയിടുന്നുണ്ട്. ഇതോടെ അമരാവതിയെ നിയമനിർമാണ തലസ്ഥാനമാക്കി ചുരുക്കും.
