ന്യൂഡൽഹി: കൊവിഡ് ബാധിതരുടെ എണ്ണം വർദ്ധിച്ചാൽ ട്രെയിനുകളെ ആശുപത്രികളായും ഐസൊലേഷൻ വാർഡുകളായും ഉപയോഗിക്കുന്നതിനുള്ള പദ്ധതിക്ക് സർക്കാർ തുടക്കമിട്ടു. സൈനിക ട്രെയിൻ ആംബുലൻസുകൾ ഇതിനകം പദ്ധതി ആരംഭിച്ചതായി ഉന്നത ഉദ്യോഗസ്ഥർ പറഞ്ഞു.
രാജ്യവ്യാപകമായി ലോക്ക്ഡൗൺ പ്രഖ്യാപിച്ചതോടെ രാജ്യത്തുടനീളം പാസഞ്ചർ ട്രെയിനുകൾ സേവനം നടത്തുന്നില്ല. ഈ സാഹചര്യത്തിലാണ് ട്രെയിനുകളെ മൊബൈൽ ആശുപത്രികളായി ഉപയോഗിക്കാൻ തീരുമാനിച്ചത്. കൊവിഡ് കേസുകൾ വർദ്ധിക്കുന്ന പക്ഷം സർക്കാർ പദ്ധതി നടപ്പാക്കും. 7,350 സ്റ്റേഷനുകളിലായി 13,452 പാസഞ്ചർ ട്രെയിനുകളാണ് ഇന്ത്യൻ റെയിൽ‌വേക്ക് സ്വന്തമായുള്ളത്. ഒരു ട്രെയിനിൽ കുറഞ്ഞത് 800 കിടക്കകളെങ്കിലും സ്ഥാപിക്കാൻ കഴിയും.
എസി 2 ടയർ കോച്ചുകളിൽ ചെറിയ മാറ്റങ്ങൾ വരുത്തി, തീവ്രപരിചരണ വിഭാഗങ്ങൾ, വെന്‍റിലേറ്ററുകൾ തുടങ്ങിയ മെഡിക്കൽ ഉപകരണങ്ങൾ എന്നിവ സജ്ജമാക്കുമെന്നാണ് വിവരം. വൈറസ് ബാധിതരെ ചികിത്സക്കായി വിവിധ സ്ഥലങ്ങളിലേക്ക് എത്തിക്കാമെന്നതാണ് ട്രെയിൻ ആശുപത്രികളുടെ മറ്റൊരു വലിയ നേട്ടം.
അടിയന്തിര ഘട്ടങ്ങളിൽ യുദ്ധത്തിൽ പരിക്കേറ്റവരെ ചികിത്സിക്കുന്നതിനും കൊണ്ടുപോകുന്നതിനുമായി സൈന്യത്തിൽ നിന്നാണ് ഈ ആശയം ഉണ്ടായത്. 2001-2002 ലെ ‘ഓപ്പറേഷൻ പരാക്രം’ വേളയിൽ ഇത്തരം സൈനിക റെയിൽ ആംബുലൻസുകൾ വലിയ തോതിൽ സർവീസ് നടത്തിയിരുന്നു.
