മുംബൈ: കൊവിഡിനെതിരായ പോരാട്ടത്തില്‍ ആവശ്യമായ മെഡിക്കല്‍ ഉപകരണങ്ങള്‍ വാങ്ങാന്‍ മുംബൈ സിവിൽ ബോഡിയിൽ നിന്നും എംഎംആർഡിഎയിൽ നിന്നും പണം കടം വാങ്ങണമെന്ന് ഉദ്ദവ് താക്കറെയുടെ നേതൃത്വത്തിലുള്ള സംസ്ഥാന സർക്കാരിനോട് മഹാരാഷ്ട്ര മുൻ മുഖ്യമന്ത്രി ദേവേന്ദ്ര ഫഡ്‌നാവിസ് ആവശ്യപ്പെട്ടു. അത്തരം വസ്തുക്കൾ വാങ്ങുന്നതിൽ കാലതാമസമുണ്ടാകാൻ പണം ഒരു ഒഴികഴിവായിരിക്കരുതെന്നും മറാത്തി വാർത്താ ചാനലിനോട് സംസാരിക്കുമ്പോള്‍ അദ്ദേഹം പറഞ്ഞു.
കൊറോണ വൈറസ് വ്യാപനത്തെത്തുടര്‍ന്നുള്ള പ്രതിരോധത്തില്‍ പണം സ്വരൂപിക്കാൻ ഉപയോഗപ്പെടുത്താവുന്ന ആയിരക്കണക്കിന് കോടി രൂപയുടെ ബാങ്ക് നിക്ഷേപമാണ് ബ്രിഹൻ മുംബൈ മുനിസിപ്പൽ കോർപ്പറേഷനും (ബിഎംസി) മുംബൈ മെട്രോപൊളിറ്റൻ റീജിയൺ ഡെവലപ്‌മെന്റ് അതോറിറ്റിക്കും (എംഎംആർഡിഎ) ഉള്ളതെന്ന് ബിജെപി മുതിർന്ന നേതാവ് പറഞ്ഞു.
മുഖ്യമന്ത്രി ഉദ്ദവ് താക്കറെയുടെ നേതൃത്വത്തിലുള്ള ശിവസേനക്കാണ് ബിഎംസിയുടെ നിയന്ത്രണം. കൂടുതൽ ടെസ്റ്റിംഗ് കിറ്റുകൾ, വ്യക്തിഗത സംരക്ഷണ ഉപകരണങ്ങൾ (ആരോഗ്യ ഉദ്യോഗസ്ഥർക്ക് ആവശ്യമായ പിപിഇ), മറ്റ് ആവശ്യമായ ഉപകരണങ്ങൾ എന്നിവ വാങ്ങുന്നതിന് സംസ്ഥാനത്തിന് ഈ ഫണ്ടുകൾ ഉപയോഗിക്കാൻ കഴിയുമെന്ന് ഫഡ്‌നാവിസ് പറഞ്ഞു. കാര്യങ്ങള്‍ പഴയ പടിയാകുമ്പോള്‍ കടമെടുത്ത പണം തിരികെ നല്‍കാം. സമൂഹ വ്യാപനമെന്ന മൂന്നാം ഘട്ടത്തിലേക്ക് കടക്കുന്നതിന് മുമ്പ് കണ്ടെയ്‌നര്‍ സോണ്‍ സിസ്റ്റം മികച്ച രീതിയില്‍ പ്രവര്‍ത്തിക്കുന്നുണ്ട്.
ലോക്ക്‌ഡൗണ്‍ സമയത്ത് ആളുകളെ വീടിനുള്ളിൽ നിർത്താൻ സംസ്ഥാന റിസർവ് പൊലീസ് സേനയെ കൂടുതൽ ഫലപ്രദമായി ഉപയോഗിക്കാമെന്ന് അദ്ദേഹം പറഞ്ഞു. കൊറോണ വൈറസ് കേസുകൾ റിപ്പോർട്ട് ചെയ്യപ്പെടാത്ത പ്രദേശങ്ങളിൽ ചില ഇളവുകൾ നൽകാനുതകുന്ന കേന്ദ്രം തയ്യാറാക്കിയ എക്സിറ്റ് പോളിസിയുടെ ശുപാർശകൾക്കായി സംസ്ഥാനം പ്രവർത്തിക്കേണ്ടതുണ്ടെന്നും അദ്ദേഹം പറഞ്ഞു.
