ഡൽഹി: പശ്ചിമ ബംഗാളിൽ 2021ൽ നടക്കാനിരിക്കുന്ന നിയമസഭാ തെരഞ്ഞെടുപ്പിൽ തൃണമൂൽ കോൺഗ്രസിനെ അട്ടിമറിച്ച് 200 സീറ്റുകൾ നേടാൻ ലക്ഷ്യമിട്ട് ബി.ജെ.പി. ഇതിന്‍റെ ഭാഗമായി ആഭ്യന്തരമന്ത്രിയും ബിജെപി ദേശീയ അധ്യക്ഷനുമായ അമിത് ഷാ സംസ്ഥാന പാർട്ടി നേതാക്കളുമായും പ്രാദേശിക സംഘടനാ മേധാവികളുമായി കൂടിക്കാഴ്ച നടത്തി. തെരഞ്ഞെടുപ്പിന് മുന്നോടിയായി ഓരോ നിയമസഭയിലും നാലുപേരടങ്ങുന്ന ഒരു ടീമിനെ രൂപീകരിക്കാനും തീരുമാനമായി. ഒക്ടോബർ എട്ടുമുതൽ ടീമുകൾ ഔദ്യോഗികമായി പ്രവർത്തിച്ച് തുടങ്ങണമെന്നും റിപ്പോർട്ട് നൽകണമെന്നും നിർദേശമുണ്ട്.
2019 ലെ ലോക്‌സഭാ തെരഞ്ഞെടുപ്പിൽ ആറ് സീറ്റുകളിൽ നിന്ന് 18 സീറ്റുകളിലേക്ക് ഉയർന്ന ബി.ജെ.പി പുതിയ രാഷ്ട്രീയ സാഹചര്യത്തിൽ കൂടുതൽ പ്രതീക്ഷയിലാണ്. ദേശീയ പൗരന്മാരുടെ രജിസ്റ്ററിന്‍റെ പ്രാധാന്യത്തെക്കുറിച്ച് അവബോധം സൃഷ്ടിക്കുന്നതിനുള്ള പരിപാടി ആരംഭിക്കാനും പദ്ധതിയുണ്ട്.
