അയല്‍വാസിയുടെ അമേരിക്കന്‍ ബുള്‍ഡോഗ് ആക്രമിച്ചു ; ഏഴ് വയസുകാരിക്ക് ഗുരുതര പരിക്ക്

American bull dog attacks 7year old : അമേരിക്കന്‍ ബുള്‍ഡോഗിന്‍റെ ആക്രമണത്തില്‍ പരിക്കേറ്റ ഏഴുവയസുകാരി ഗുരുതരാവസ്ഥയില്‍. പ്രതിഷേധവുമായി നാട്ടുകാര്‍

ന്യൂഡല്‍ഹി : അമേരിക്കന്‍ ബുള്‍ഡോഗിന്‍റെ ആക്രമണത്തില്‍ ഏഴ് വയസുകാരിക്ക് ഗുരുതര പരിക്ക്. ശരീരത്തില്‍ പതിനഞ്ച് മുറിവുകളാണ് കുട്ടിക്ക് ഏറ്റത്. ഡല്‍ഹിയിലെ രോഹിണിയിലാണ് സംഭവം (Bull dog attacks 7year old girl). അയല്‍വാസിയുടെ നായയാണ് കുഞ്ഞിനെ ആക്രമിച്ചത്. ഹൗസിംഗ് സൊസൈറ്റിയില്‍ കൂട്ടുകാര്‍ക്കൊപ്പം കളിക്കുകയായിരുന്ന കുഞ്ഞിനെ നായ ആക്രമിക്കുകയായിരുന്നു. ഈ മാസം 9നാണ് സംഭവം.

ആളുകള്‍ ഓടിക്കൂടി നായയെ അകറ്റുകയായിരുന്നു. കുട്ടിയുടെ കൈയിലും കാലിലും ചെവിയിലും കണ്ണിലും മറ്റുമാണ് മുറിവേറ്റിട്ടുള്ളതെന്ന് പിതാവ് പറഞ്ഞു. ശ്രീകാന്ത് ഭഗത് എന്നയാളുടെ മകളാണ് നായയുടെ ആക്രമണത്തിന് ഇരയായത്. കുട്ടി നായയോട് ചെറുത്തുനിന്നിരുന്നു. അവളുടെ കരച്ചില്‍ കേട്ടാണ് തങ്ങള്‍ ഓടിയെത്തിയതെന്നും പിതാവ് വ്യക്തമാക്കി.

ഉടന്‍ തന്നെ ആശുപത്രിയിലെത്തിക്കാനും ജീവന്‍ രക്ഷിക്കാനുമായി. പക്ഷേ കുട്ടി കടുത്ത മാനസിക സംഘര്‍ഷത്തിലാണ്. മൂന്ന് ദിവസമായി കുഞ്ഞിന് ഉറങ്ങാനായിട്ടില്ല. നായയുടെ ഉടമയ്‌ക്കെതിരെ കേസ് കൊടുത്തിട്ടുണ്ടെന്നും അദ്ദേഹം അറിയിച്ചു. മുഖര്‍ജി നഗറില്‍ പരിശീലന സ്ഥാപനം നടത്തുന്ന ആളാണ് ഭഗത്. കുട്ടിക്ക് വാക്സിന്‍ നല്‍കിയിട്ടുണ്ട്. ഹൗസിംഗ് സൊസൈറ്റിയിലെ ആളുകള്‍ നായയുടെ ആക്രമണത്തില്‍ പ്രതിഷേധിച്ച് പന്തം കൊളുത്തി പ്രകടനം നടത്തി.

ഞങ്ങളുടെ കുഞ്ഞുങ്ങള്‍ അപകടത്തിലാണ്, തെരുവ് നായകള്‍ക്ക് ഭക്ഷണം നല്‍കുന്നത് അവസാനിപ്പിക്കൂ, തുടങ്ങിയ മുദ്രാവാക്യങ്ങളുമായാണ് ഇവര്‍ പ്രകടനത്തില്‍ അണിചേര്‍ന്നത്. തങ്ങള്‍ നായകളെ പരിപാലിക്കുന്നതിന് എതിരല്ലെന്നും എന്നാല്‍ ഇത്തരം ജീവികള്‍ തങ്ങളുടെ കുഞ്ഞുങ്ങള്‍ക്ക് അപകടമുണ്ടാക്കുന്നുവെന്നും ഇവര്‍ ചൂണ്ടിക്കാട്ടി.

സംഭവത്തില്‍ പൊലീസ് കേസെടുത്തിട്ടുണ്ട്. മൃഗങ്ങളെ, മറ്റുള്ളവരുടെ ജീവനും സുരക്ഷയും ബാധിക്കും വിധം അലക്ഷ്യമായി വിടുക, എന്നതുള്‍പ്പടെയുള്ള വകുപ്പുകള്‍ ചുമത്തിയാണ് കേസെടുത്തിട്ടുള്ളത്. സംഭവത്തില്‍ അന്വേഷണം ആരംഭിച്ചതായും പൊലീസ് അറിയിച്ചു. കുറ്റാരോപിതനെ അന്വേഷണത്തിനായി വിളിച്ചുവരുത്തുമെന്നും മുതിര്‍ന്ന ഉദ്യോഗസ്ഥന്‍ അറിയിച്ചു.

ലിഫ്റ്റിനുള്ളിൽ നായയുടെ കടിയേറ്റു : ഗ്രേറ്റർ നോയിഡയിലെ ലാ റെസിഡൻഷ്യ സൊസൈറ്റിയിലെ ടവർ 7ൽ ആണ് സംഭവം. സ്‌കൂളിൽ പോകുന്ന കുട്ടി അമ്മയുമായി ലിഫ്റ്റിൽ നിൽക്കുമ്പോൾ ഒരു യുവാവ് തന്‍റെ വളർത്തുനായയ്‌ക്കൊപ്പം കയറുകയായിരുന്നു. തുടർന്നാണ് നായ കുട്ടിയുടെ കൈയ്യിൽ കടിച്ച് പരിക്കേൽപ്പിച്ചത്.

ഉടൻ തന്നെ നായയെ ഉടമ പിടിച്ചുമാറ്റിയെങ്കിലും കുട്ടിയുടെ കൈക്ക് ഗുരുതരമായി പരിക്കേറ്റു. നായയുടെ ആക്രമണത്തെ തുടർന്ന് കുട്ടിയെ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. സംഭവത്തിന്‍റെ ദൃശ്യങ്ങൾ സമൂഹ മാധ്യമങ്ങളിൽ പ്രചരിച്ചിരുന്നു.