മുംബൈ : മഹാരാഷ്‌ട്രയിൽ നാഷണലിസ്റ്റ് കോൺഗ്രസ് പാർട്ടി പിളർന്നതോടെ പേരിനും ചിഹ്നത്തിനുമായി കടുത്ത പോര്. എൻസിപി എന്ന പേരിനും പാർട്ടി ചിഹ്നത്തിനും അവകാശവാദം ഉന്നയിച്ച് അജിത് പവാർ തെരഞ്ഞെടുപ്പ് കമ്മിഷന് അപേക്ഷ നൽകി. അതേസമയം ജൂലൈ രണ്ടിന് സത്യപ്രതിജ്‌ഞ ചെയ്‌ത മഹാരാഷ്‌ട്ര നിയമസഭയിലെ ഒൻപത് വിമത അംഗങ്ങളെ അയോഗ്യരാക്കണമെന്നാവശ്യപ്പെട്ട് മഹാരാഷ്‌ട്ര എൻസിപി അധ്യക്ഷൻ ജയന്ത് പാട്ടീല്‍ കത്ത് നല്‍കിയതായും തെരഞ്ഞെടുപ്പ് കമ്മിഷൻ അറിയിച്ചു.
പരസ്യ യോഗം വിളിച്ച് പവാർ : എംഎൽഎ, എംപി, എംഎൽസി തുടങ്ങി 40 അംഗങ്ങളുടെ പിന്തുണാ സത്യവാങ്‌മൂലവും പ്രസിഡന്‍റായി അവര്‍ ഐകകണ്ഠേന അജിത് പവാറിനെ തെരഞ്ഞെടുത്തതായുള്ള പ്രമേയവും ലഭിച്ചതായും തെരഞ്ഞെടുപ്പ് കമ്മിഷൻ അറിയിച്ചു. പോരാട്ടം ചൂടുപിടിക്കുന്നതിനിടയിൽ അജിത് പവാർ വിഭാഗവും ശരദ് പവാർ വിഭാഗവും ഇന്ന് വെവ്വേറെ യോഗങ്ങള്‍ വിളിച്ചിരുന്നു. എൻസിപിയുടെ 53 എംഎൽഎമാരിൽ 35 പേര്‍ തങ്ങൾക്കൊപ്പമാണെന്ന് അജിത് പവാർ അവകാശപ്പെട്ടു.
ഇതിന് പുറമെ എട്ട് എംഎൽസിമാരിൽ അഞ്ച് പേര്‍ തങ്ങൾക്കൊപ്പമാണെന്നും അജിത് പവാർ വിഭാഗം പറയുന്നു. ഇവരിൽ നിന്ന് അദ്ദേഹം സത്യവാങ്‌മൂലം എഴുതി വാങ്ങുകയും ചെയ്‌തിരുന്നു. അതേസമയം ശരദ് പവാർ വിളിച്ച യോഗത്തിൽ 13 എംഎൽഎമാർ പങ്കെടുത്തെന്നാണ് വിവരം. അജിത് വിഭാഗം ബാന്ദ്രയിലെ ബുജ്‌ബൽ നോളജ് സിറ്റിയിലും ശരദ് പവാര്‍ വിഭാഗം ദക്ഷിണ മുംബൈയിലെ യശ്വന്ത്‌റാവു ചവാൻ സെന്‍ററിലുമാണ് യോഗം ചേർന്നത്.
also read : 35 എംഎല്‍എമാർ ഒപ്പമുണ്ടെന്ന് അജിത് പവാർ പക്ഷം, സുപ്രിയ സുലെ വിളിച്ച യോഗത്തില്‍ 13 പേർ
പാർട്ടി പിളർപ്പും സത്യപ്രതിജ്‌ഞയും : ജൂൺ രണ്ടിനാണ് എൻസിപി പിളർന്ന് അജിത്തിനൊപ്പം 29 എംഎൽഎമാർ ഏക്‌നാഥ് ഷിൻഡെയുടെ സർക്കാരിനെ പിന്തുണച്ചത്. ഇതിൽ അജിത് പവാർ അന്ന് തന്നെ മഹാരാഷ്‌ട്ര ഉപമുഖ്യമന്ത്രിയായും മറ്റ് എട്ട് എംഎൽഎമാർ മന്ത്രിമാരായും സത്യപ്രതിജ്‌ഞ ചെയ്‌തു. ഇതിന് ശേഷം ആദ്യമായാണ് രണ്ട് പവാർ വിഭാഗവും പരസ്യയോഗം ചേരുന്നത്. എന്നാൽ അയോഗ്യതയിൽ നിന്ന് ഒഴിവാകാൻ 36 എംഎൽഎമാരുടെ പിന്തുണയാണ് ഇരുവിഭാഗത്തിനും വേണ്ടത്.
ശരദ് പവാർ വിരമിക്കണമെന്ന് അജിത് : സംസ്ഥാനത്ത് എൻസിപിയുടെ ഔദ്യോഗിക നേതൃത്വം ആർക്കെന്നത് ചോദ്യചിഹ്നമായിരിക്കെ പാർട്ടിയ്‌ക്ക് മഹാരാഷ്‌ട്രയിൽ മുഖ്യമന്ത്രിയെ സാധ്യമാക്കുമെന്ന് അജിത് പവാർ ഇന്ന് ചേർന്ന യോഗത്തിൽ പറഞ്ഞിരുന്നു. അതിന് പുറമെ ശരദ് പവാറിന്‍റെ പ്രായം പരാമർശിച്ച് രാഷ്‌ട്രീയത്തിൽ നിന്ന് അദ്ദേഹം വിരമിക്കാൻ സമയമായെന്നും പ്രവർത്തകരെ അഭിസംബോധന ചെയ്‌ത് അജിത് കൂട്ടിച്ചേർത്തു.
also read : NCP Split | കളം മാറി വന്നവർക്ക് മുന്തിയ പരിഗണന, അജിത് പവാറിന് ധനകാര്യ വകുപ്പ് ലഭിച്ചേക്കും
