ഡല്‍ഹി : ഏകീകൃത സിവില്‍ കോഡ്(ucc) രാജ്യത്ത് നടപ്പാക്കുന്നതിന് പ്രധാനമന്ത്രി നരേന്ദ്രമോദിക്ക് പിന്തുണയറിയിച്ച് ആം ആദ്‌മി പാര്‍ട്ടി(Aam Aadmi party). ഇന്ത്യന്‍ ഭരണഘടനയുടെ(indian constitution) അനുച്ഛേദം 44ല്‍ ഏകീകൃത സിവില്‍ കോഡിനെ കുറിച്ച് പരാമര്‍ശിക്കുന്നുണ്ടെന്നും എന്നാല്‍ ഇത് നടപ്പിലാക്കുന്നതിന് മുമ്പ് വിശദമായ ചര്‍ച്ച ആവശ്യമാണെന്നും എഎപിയുടെ രാജ്യസഭ എംപിയും പാര്‍ട്ടി ജനറല്‍ സെക്രട്ടറിയുമായ സന്ദീപ് പഥക്(sandeep pathak) മാധ്യമങ്ങളോട് പറഞ്ഞു. എന്നാല്‍ എഎപിയുടെ പരമാര്‍ശം പ്രതിപക്ഷ പാര്‍ട്ടികള്‍ക്കിടയില്‍ തുറന്ന ചര്‍ച്ചയ്‌ക്കും വിമര്‍ശനങ്ങള്‍ക്കും വഴിവച്ചിരിക്കുകയാണ്.
എഎപി പാര്‍ട്ടി നേതാവ് അരവിന്ദ് കെജ്‌രിവാളിന്‍റെ(arvind kejriwal) യഥാര്‍ഥ മുഖമാണ് ഇതിലൂടെ പ്രകടമായതെന്ന് ശിരോമണി അകാലിദള്‍ നേതാവ് ഡോ. ദല്‍ജിത്ത് സിങ് ചീമ പറഞ്ഞു. ഭരണഘടന രൂപീകരിക്കുമ്പോള്‍, ഏകീകൃത സിവില്‍ കോഡ് സംസ്ഥാന നയത്തിന്‍റെ നിര്‍ദേശക തത്വങ്ങളിലായിരുന്നു, അല്ലാതെ മൗലിക അവകാശങ്ങളില്‍ ആയിരുന്നില്ല. രാജ്യത്തിന് ഏകീകൃത ക്രിമിനല്‍ നിയമങ്ങള്‍ ഉള്ളപ്പോള്‍ വ്യത്യസ്‌ത സമുദായങ്ങള്‍ക്കായി വ്യക്തിനിയമങ്ങള്‍ തയ്യാറാക്കിയത് ഏവരെയും ഒരുമിച്ചുചേര്‍ക്കാന്‍ വേണ്ടിയാണെന്നും അകാലിദള്‍ നേതാവ് അഭിപ്രായപ്പെട്ടു.
യുയുസി വീണ്ടും ഉയര്‍ത്തി പ്രധാനമന്ത്രി : ഭോപ്പാലിലെ പൊതുപരിപാടിയില്‍ പ്രധാനമന്ത്രി നരേന്ദ്ര മോദി, ഏകീകൃത സിവില്‍ കോഡിനെ കുറിച്ച് വീണ്ടും പരമാര്‍ശിച്ചതിനെ തുടര്‍ന്നാണ് രാജ്യത്ത് വലിയ ചര്‍ച്ചയും എഎപിയുടെ പിന്തുണയും. ലോക്‌സഭ തെരഞ്ഞെടുപ്പ് അടുത്തിരിക്കെയാണ് ഏകീകൃത സിവില്‍ കോഡിനെ ചര്‍ച്ചാവിഷയമാക്കി പ്രധാന മന്ത്രി മുഖ്യധാരയിലേയ്‌ക്ക് ഉയര്‍ത്തിയത്. ഇന്ത്യന്‍ ഭരണഘടന എല്ലാവരുടെയും തുല്യതയെക്കുറിച്ച് സംസാരിക്കുമ്പോള്‍ രണ്ട് നിയമങ്ങള്‍ ഉപയോഗിച്ച് രാജ്യത്തെ നയിക്കാനാവില്ലെന്ന് പ്രധാന മന്ത്രി വ്യക്തമാക്കിയിരുന്നു.
'ഒരു കുടുംബത്തിന് വ്യത്യസ്‌ത നിയമങ്ങള്‍ എങ്ങനെയാണ് ബാധകമാവുക. ആളുകള്‍ക്ക് രണ്ട് വ്യത്യസ്‌ത നിയമങ്ങള്‍ ഉണ്ടെങ്കില്‍ ഒരു കുടുംബമായി മുന്നോട്ട് പോകാനാകുമോ? പിന്നെ എങ്ങനെയാണ് ഒരു രാജ്യം മുന്നോട്ട് നീങ്ങുക' - എന്നും അദ്ദേഹം ചോദിച്ചു.
'നമ്മുടെ ഭരണഘടന എല്ലാ ജനങ്ങള്‍ക്കും തുല്യ അവകാശങ്ങള്‍ ഉറപ്പുനല്‍കുന്നു. സുപ്രീം കോടതിയും ഏക സിവില്‍ കോഡ് നടപ്പാക്കാനാണ് ആവശ്യപ്പെടുന്നതെന്നും' പ്രധാന മന്ത്രി പറഞ്ഞിരുന്നു.
എതിര്‍പ്പ് പ്രകടമാക്കി അഖിലേന്ത്യ മുസ്‌ലിം വ്യക്തി നിയമ ബോർഡ്: അതേസമയം, രാജ്യത്ത് ഏകീകൃത സിവിൽ കോഡിനായി പ്രധാനമന്ത്രി നരേന്ദ്ര മോദി രംഗത്തെത്തിയതിന് പിന്നാലെ അഖിലേന്ത്യ മുസ്‌ലിം വ്യക്തി നിയമ ബോർഡ് (All India Muslim Personal Law Board) കനത്ത എതിര്‍പ്പ് പ്രകടിപ്പിച്ചിരിക്കുകയാണ്. യുസിസിയോടുള്ള എതിർപ്പ് നിയമ കമ്മിഷനെ അറിയിക്കാൻ എഐഎംപിഎൽബി ഇന്നലെ രാത്രി ഓൺലൈനായി അടിയന്തര യോഗം ചേർന്നിരുന്നു. ഏകീകൃത സിവിൽ കോഡിന് സ്വന്തം കരട് തയ്യാറാക്കാനും മുസ്‌ലിം വ്യക്തി നിയമ ബോർഡ് തീരുമാനിച്ചു.
എന്താണ് യുസിസി: പാരമ്പര്യം, ദത്തെടുക്കല്‍, പിന്തുടര്‍ച്ചാവകാശം എന്നിവയുമായി ബന്ധപ്പെട്ട മതാധിഷ്‌ഠിത വ്യക്തി നിയമങ്ങളെ അസാധുവാക്കിക്കൊണ്ട് രാജ്യത്തെ എല്ലാ വ്യക്തികള്‍ക്കും ബാധകമായ സമഗ്രമായ നിയമത്തെയാണ് ഏകീകൃത സിവില്‍ കോഡ് എന്നതുകൊണ്ട് അര്‍ഥമാക്കുന്നത്. ഇന്ത്യന്‍ ഭരണഘടനയുടെ 44ാം അനുച്ഛേദം ഏകീകൃത സിവില്‍ കോഡ് നടപ്പിലാക്കുന്നതിനായി സംസ്ഥാനം പ്രവര്‍ത്തിക്കണമെന്ന് നിര്‍ദേശിക്കുന്നുണ്ട്. എങ്കിലും വളരെക്കാലമായി ഈ വിഷയം ചര്‍ച്ചയില്‍ മാത്രം ഒതുങ്ങുകയായിരുന്നു.
