ಸ್ಯಾನ್ ಫ್ರಾನ್ಸಿಸ್ಕೋ: ಸದ್ಯ ಗೂಗಲ್ ಪ್ರಾಬಲ್ಯ ಹೊಂದಿರುವ ಸರ್ಚ್ ಎಂಜಿನ್ ಮಾರುಕಟ್ಟೆಗೆ ಪ್ರವೇಶಿಸುವುದಾಗಿ ಚಾಟ್ ಜಿಪಿಟಿ ತಯಾರಕ ಕಂಪನಿ ಓಪನ್ ಎಐ ಘೋಷಿಸಿದೆ. ಇಂಟರ್ನೆಟ್ನಲ್ಲಿ ನೈಜ ಸಮಯದಲ್ಲಿ ಮಾಹಿತಿಗಳನ್ನು ಹುಡುಕಾಡಲು ನೆರವಾಗುವ ಎಐ ಸಾಮರ್ಥ್ಯದ ಸರ್ಚ್ ಜಿಪಿಟಿ (SearchGPT) ಹೆಸರಿನ ಸರ್ಚ್ ಎಂಜಿನ್ ಅನ್ನು ಲಾಂಚ್ ಮಾಡುವುದಾಗಿ ಅದು ಹೇಳಿದೆ.
ಸ್ಪಷ್ಟವಾದ ಮತ್ತು ಸಂಬಂಧಿತ ಮೂಲಗಳಿಂದ ವೇಗವಾಗಿ ಹಾಗೂ ಸಮಯೋಚಿತವಾಗಿ ಹುಡುಕಾಟದ ಫಲಿತಾಂಶಗಳನ್ನು ನೀಡಬಲ್ಲ ಎಐ ಸಾಮರ್ಥ್ಯದ ಸರ್ಚ್ ಜಿಪಿಟಿಯ ತಾತ್ಕಾಲಿಕ ಮೂಲಮಾದರಿಯನ್ನು ಪ್ರಸ್ತುತ ಪರೀಕ್ಷಿಸುತ್ತಿರುವುದಾಗಿ ಸ್ಯಾಮ್ ಆಲ್ಟ್ಮನ್ ನೇತೃತ್ವದ ಚಾಟ್ ಜಿಪಿಟಿ ಹೇಳಿದೆ.
ಸರ್ಚ್ ಜಿಪಿಟಿಯನ್ನು ಅದರ ಎಐ ಮಾದರಿಗಳ ಸಾಮರ್ಥ್ಯವನ್ನು ಮತ್ತು ಇಂಟರ್ನೆಟ್ನಲ್ಲಿನ ಮಾಹಿತಿಗಳನ್ನು ಸಂಯೋಜಿಸುವಂತೆ ವಿನ್ಯಾಸಗೊಳಿಸಲಾಗಿದ್ದು, ಇದು ಬಳಕೆದಾರರಿಗೆ ಸ್ಪಷ್ಟ ಮತ್ತು ಸಂಬಂಧಿತ ಮೂಲಗಳಿಂದ ವೇಗದ ಮತ್ತು ಸಮಯೋಚಿತ ಉತ್ತರಗಳನ್ನು ನೀಡುತ್ತದೆ. ಇದು ಹೇಗೆ ಕೆಲಸ ಮಾಡಲಿದೆ ಎಂಬುದರ ಬಗ್ಗೆ ಪ್ರತಿಕ್ರಿಯೆಗಳನ್ನು ಪಡೆದುಕೊಳ್ಳಲು ಆರಂಭದಲ್ಲಿ ಇದನ್ನು ಸಣ್ಣ ಸಂಖ್ಯೆಯ ಬಳಕೆದಾರರು ಮತ್ತು ಪಬ್ಲಿಷರ್ಗಳಿಗೆ ಬಳಸಲು ಬಿಡುಗಡೆ ಮಾಡುತ್ತಿರುವುದಾಗಿ ಓಪನ್ ಎಐ ಹೇಳಿದೆ.
"ಈ ಮೂಲಮಾದರಿ ತಾತ್ಕಾಲಿಕವಾಗಿದ್ದರೂ, ಭವಿಷ್ಯದಲ್ಲಿ ಅತ್ಯುತ್ತಮವಾದ ಎಲ್ಲ ವೈಶಿಷ್ಟ್ಯಗಳನ್ನು ನೇರವಾಗಿ ಚಾಟ್ ಜಿಪಿಟಿಗೆ ಸಂಯೋಜಿಸಲು ನಾವು ಯೋಜಿಸಿದ್ದೇವೆ" ಎಂದು ಕಂಪನಿ ಹೇಳಿದೆ. ಸರ್ಚ್ ಮಾಡುವಾಗ ಪ್ರಮುಖವಾಗಿ ಉಲ್ಲೇಖಿಸುವ ಮತ್ತು ಲಿಂಕ್ ಮಾಡುವ ಮೂಲಕ ಬಳಕೆದಾರರು ಪಬ್ಲಿಷರ್ಗಳೊಂದಿಗೆ ಸಂಪರ್ಕ ಸಾಧಿಸಲು ಸಹಾಯ ಮಾಡುವಂತೆ ಸರ್ಚ್ ಜಿಪಿಟಿಯನ್ನು ವಿನ್ಯಾಸಗೊಳಿಸಲಾಗಿದೆ.
ನೀವು ಓರ್ವ ವ್ಯಕ್ತಿಯೊಂದಿಗೆ ಸಂಭಾಷಣೆಯಲ್ಲಿ ಮಾಡಿದಂತೆ, ಪ್ರತಿ ಪ್ರಶ್ನೆಯೊಂದಿಗೆ ಆಯಾ ಸಂದರ್ಭಗಳಿಗೆ ತಕ್ಕಂತೆ ಅನುಸರಣಾ ಪ್ರಶ್ನೆಗಳನ್ನು ಕೇಳಲು ನಿಮಗೆ ಸಾಧ್ಯವಾಗುತ್ತದೆ.
"ಪ್ರತಿಕ್ರಿಯೆಗಳು ಸ್ಪಷ್ಟವಾಗಿದ್ದು, ಇನ್-ಲೈನ್, ಹೆಸರಿಸಲಾದ ಗುಣಲಕ್ಷಣ ಮತ್ತು ಲಿಂಕ್ಗಳನ್ನು ಹೊಂದಿರಲಿವೆ. ಹೀಗಾಗಿ ಮಾಹಿತಿ ಎಲ್ಲಿಂದ ಬರುತ್ತಿದೆ ಎಂಬುದು ಬಳಕೆದಾರರಿಗೆ ಗೊತ್ತಾಗಲಿದೆ ಮತ್ತು ಸೈಡ್ ಬಾರ್ನಲ್ಲಿ ಮೂಲ ಲಿಂಕ್ಗಳೊಂದಿಗೆ ಇನ್ನೂ ಹೆಚ್ಚಿನ ಫಲಿತಾಂಶಗಳು ಕಾಣಿಸಿಕೊಳ್ಳಲಿದ್ದು, ತ್ವರಿತವಾಗಿ ಇವುಗಳನ್ನು ಕೂಡ ಹುಡುಕಾಡಬಹುದು" ಎಂದು ಓಪನ್ಎಐ ಹೇಳಿದೆ. ಸ್ಥಳೀಯ ಮಾಹಿತಿ ಮತ್ತು ವಾಣಿಜ್ಯದಂಥ ಕ್ಷೇತ್ರಗಳಲ್ಲಿ ಸರ್ಚ್ ಫಲಿತಾಂಶಗಳನ್ನು ನಿರಂತರವಾಗಿ ಸುಧಾರಿಸುತ್ತಲೇ ಇರುವುದಾಗಿ ಕಂಪನಿ ಹೇಳಿದೆ. ಚಾಟ್ ಜಿಪಿಟಿಯ ಈ ಹೊಸ ಸರ್ಚ್ ಎಂಜಿನ್ ಗೂಗಲ್ಗೆ ಪೈಪೋಟಿ ನೀಡಲಿದೆಯಾ ಎಂಬುದನ್ನು ಕಾದುನೋಡಬೇಕಿದೆ.
ಇದನ್ನೂ ಓದಿ: ಮತ್ತಷ್ಟು ಸ್ಮಾರ್ಟ್ ವೈಶಿಷ್ಟ್ಯಗಳೊಂದಿಗೆ ಮೆಟಾ ಎಐ ಈಗ ಹಿಂದಿಯಲ್ಲೂ ಲಭ್ಯ - Meta AI
