ಹುಬ್ಬಳ್ಳಿ: ಜಿಲ್ಲೆಯಲ್ಲಿ ಸುರಿಯುತ್ತಿರುವ ನಿರಂತರ ಮಳೆಯಿಂದಾಗಿ ವಿದ್ಯುತ್ ಸಂಪರ್ಕ ಕಡಿತ, ವಿದ್ಯುತ್ ಕಂಬಗಳು ಧರೆಗೆ ಉರುಳುವುದು, ಇಲ್ಲ ತಂತಿ ತುಂಡಾಗಿ ಬೀಳುವುದು, ಟ್ರಾನ್ಸ್ಫಾರ್ಮರ್ ವೈಪಲ್ಯದಂತೆ ಸಮಸ್ಯೆಗಳು ಸಾಮಾನ್ಯವಾಗಿ ಕಂಡು ಬರುತ್ತದೆ. ಇದರಿಂದ ಜನ ಸಾಮಾನ್ಯರು ಪರದಾಡುವಂತೆ ಆಗುತ್ತದೆ. ಜೊತೆಗೆ, ಈ ಸಂಬಂಧ ಯಾರನ್ನು, ಯಾವ ಸಂಖ್ಯೆಗೆ ಸಂಪರ್ಕಿಸಿ ದೂರು ನೀಡಬೇಕು ಎಂಬ ಗೊಂದಲಕ್ಕೆ ಒಳಗಾಗುತ್ತಾರೆ. ಈ ನಿಟ್ಟಿನಲ್ಲಿ ಗ್ರಾಹಕರ ಸ್ನೇಹಿ ಆಗಲು ಮುಂದಾಗಿರುವ ಹುಬ್ಬಳ್ಳಿ ವಿದ್ಯುತ್ ಸರಬರಾಜು ಕಂಪನಿ (ಹೆಸ್ಕಾಂ) ವಾಟ್ಸಾಪ್ ಸಹಾಯವಾಣಿಯನ್ನು ತೆರೆದಿದೆ.
ಈ ಸಹಾಯವಾಣಿಯಲ್ಲಿ ಮೇಲೆ ತಿಳಿಸಿದ ಸಂಬಂಧಿತ ವಿದ್ಯುತ್ ಸಮಸ್ಯೆಗಳ ಕುರಿತು ಜನರು ಫೋಟೋ ಮತ್ತು ವಿಡಿಯೋವನ್ನು ಜನರು ಹಂಚಿಕೊಳ್ಳಬಹುದಾಗಿದೆ. ಇದರಿಂದ ಎಲ್ಲಿ ಏನು ಸಮಸ್ಯೆ ಇದೆ. ತಕ್ಷಣಕ್ಕೆ ಹೇಗೆ ಕಾರ್ಯ ಪ್ರವೃತ್ತರಾಗಬಹುದು ಎಂಬ ಕುರಿತು ಸಿದ್ಧತೆ ನಡೆಸಲು ಹಾಗೂ ಸ್ಥಳದ ಗಂಭೀರತೆ ಅರಿಯಲು ಹೆಸ್ಕಾಂಗೆ ಸಹಾಯವಾಗಲಿದೆ.
ಗ್ರಾಹಕರು ತಾವು ಅನುಭವಿಸುತ್ತಿರುವ ವಿದ್ಯುತ್ ಸಮಸ್ಯೆ, ದೂರು ದುಮ್ಮಾನವನ್ನು ಫೋಟೋ, ವಿಡಿಯೋ ಸಮೇತ ಹೆಸ್ಕಾಂ ಸಹಾಯವಾಣಿ 1912 ಜತೆಗೆ ವಾಟ್ಸಾಪ್ ಗ್ರಾಹಕ ಸೇವಾ ಸಂಖ್ಯೆ 9480883899ಗೆ ಸಂಪರ್ಕಿಸಬಹುದು. ನೀಡಲಾಗಿರುವ ವಾಟ್ಸಾಪ್ ನಂಬರ್ಗೆ ಸಮಸ್ಯೆ ಕುರಿತು ಫೋಟೋ, ವಿಡಿಯೋ ಹಂಚಿಕೊಳ್ಳುವುದರಿಂದ ಕಾರ್ಯಾಚರಣೆಗೆ ನೆರವಾಗಲಿದೆ ಎಂದು ಹೆಸ್ಕಾಂ ತಿಳಿಸಿದೆ.
ಅಲ್ಲದೇ, ಹೆಸ್ಕಾಂ ತನ್ನ ಗ್ರಾಹಕರ ಅನುಕೂಲಕ್ಕಾಗಿ ಈಗಾಗಲೇ 24*7 ಕೇಂದ್ರಿಕೃತ ಗ್ರಾಹಕ ಸೇವಾ ಕೇಂದ್ರವನ್ನು ನಿಗಮದ ಕೇಂದ್ರ ಕಚೇರಿಯಲ್ಲಿ ಸ್ಥಾಪಿಸಿದೆ. ಇದು ಗ್ರಾಹಕರ ದೂರುಗಳ ನೋಂದಣಿ ಮತ್ತು ತ್ವರಿತ ಪರಿಹಾರದಂತಹ ಕಾರ್ಯಗಳಿಗಾಗಿ ಮತ್ತು ಸರಿಯಾದ ಮೇಲ್ವಿಚಾರಣೆಗಾಗಿ ಕಾರ್ಯನಿರ್ವಹಿಸುತ್ತದೆ. ಹೆಸ್ಕಾಂ ವ್ಯಾಪ್ತಿಗೆ ಬರುವ ವಿದ್ಯುತ್ ಗ್ರಾಹಕರು ತಮ್ಮ ವಿದ್ಯುತ್ ಸಂಬಂಧಿತ ದೂರು - ದುಮ್ಮಾನಗಳನ್ನು ಸಹಾಯವಾಣಿ 1912 ಗೆ ಉಚಿತ ಕರೆ ಮಾಡಬಹುದು. ತಮ್ಮಲ್ಲಿ ದಾಖಲಾದ ದೂರುಗಳಿಗೆ ಹೆಸ್ಕಾಂ ತಕ್ಷಣವೇ ಸ್ಪಂದಿಸಲಿದ್ದು, ಗ್ರಾಹಕರ ಸಮಸ್ಯೆ ಬಗೆಹರಿಸಲಿದೆ ಎಂದು ತಿಳಿಸಿದೆ.
ಇದಲ್ಲದೆ, ಗ್ರಾಹಕರು ಇ- ಮೇಲ್ customercare@hescom.co.in, ಫೇಸ್ ಬುಕ್ ಖಾತೆ https://www.facebook.com/hescomhbl, ಹಾಗೂ ಎಕ್ಸ್ ಖಾತೆ https://twitter.com/HubliHescom ಮೂಲಕವೂ ದೂರುಗಳನ್ನು ಸಲ್ಲಿಸಬಹುದು. ಇದರ ಜತೆಗೆ ಟ್ರಾನ್ಸ್ ಫಾರ್ಮರ್ ವೈಫಲ್ಯ ಸಂಬಂಧಿತ ದೂರುಗಳಿದ್ದಲ್ಲಿ ಟೋಲ್ ಫ್ರೀ ಸಂಖ್ಯೆ 1800-425-4754 ಗೆ ನೀಡಬಹುದು ಎಂದು ಹೆಸ್ಕಾಂ ಪ್ರಕಟಣೆ ತಿಳಿಸಿದೆ.
ಇದನ್ನೂ ಓದಿ: ಕಾರವಾರದಲ್ಲಿ ವ್ಯಾಪಕ ಮಳೆ: ಕೃತಕ ನೆರೆಗೆ ಮುಳುಗಿದ ಇಡೂರು ಗ್ರಾಮ!
