Maiden super over in T20:ಕ್ರಿಕೆಟ್ ಜಗತ್ತಿನಲ್ಲಿ ದಾಖಲೆಗಳನ್ನು ನಿರ್ಮಿಸುವುದು ಮತ್ತು ಆ ದಾಖಲೆಗಳನ್ನು ಬೇರೊಂದು ತಂಡ ಅಥವಾ ಆಟಗಾರರು ಮುರಿಯುವುದು ಸಹಜವಾಗಿದೆ. ಆದರೆ ಇದೇ ಕ್ರಿಕೆಟ್ನಲ್ಲಿ ಇಂದಿಗೂ ಯಾರಿಂದಲೂ ಮುರಿಯಲು ಸಾಧ್ಯವಾಗದಂತಹ ಹಲವಾರು ಅಪರೂಪದ ದಾಖಲೆಗಳು ಕೂಡ ನಿರ್ಮಾಣವಾಗಿವೆ. ಅವುಗಳಲ್ಲಿ 'ಮೇಡನ್ ಸೂಪರ್ ಓವರ್' ಕೂಡ ಒಂದಾಗಿದೆ.
ಹೌದು, ಈ ದಾಖಲೆ ನಿರ್ಮಾಣವಾಗಿ ಇಂದಿಗೆ 10 ವರ್ಷಗಳು ಕಳೆದಿವೆ. ಆದರೆ ಇದನ್ನು ಮುರಿಯಲು ಯಾರಿಗೂ ಸಾಧ್ಯವಾಗಿಲ್ಲ. ಅಲ್ಲದೇ ಇದನ್ನು ಮುರಿಯುವುದು ಕೂಡ ಸುಲಭದ ಮಾತಾಗಿಲ್ಲ. ಹಾಗಾದ್ರೆ ಬನ್ನಿ ಯಾವ ಆಟಗಾರ ಮೇಡನ್ ಸೂಪರ್ ಓವರ್ ದಾಖಲೆ ಬರೆದಿದ್ದು ಮತ್ತು ಯಾವ ಲೀಗ್ನಲ್ಲಿ ಇದು ಸಂಭವಿಸಿತು ಎಂದು ತಿಳಿದುಕೊಳ್ಳೋಣ.
2014ರಲ್ಲಿ ನಡೆದ ಕೆರೆಬಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ರೆಡ್ ಸ್ಟೀಲ್ ಮತ್ತು ಗಯಾನ ಅಮೇಜಾನ್ ವಾರಿಯರ್ಸ್ ನಡುವೆ ಪಂದ್ಯ ನಡೆದಿತ್ತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ರೆಡ್ ಸ್ಟೀಲ್ ತಂಡ ಎವಿನ್ ಲೇವಿಸ್ (39), ನಿಕೋಲಸ್ ಪೂರನ್ (37) ಬ್ಯಾಟಿಂಗ್ ನೆರವಿನಿಂದ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 118 ಕಲೆಹಾಕಿತ್ತು. ಇದಕ್ಕುತ್ತರವಾಗಿ ಗಯಾನ ವಾರಿಯರ್ಸ್ ಕೂಡ 20 ಓವರ್ಗಳಲ್ಲಿ 118 ರನ್ಗಳಿಸಿದ ಕಾರಣ ಪಂದ್ಯ ಟೈನಲ್ಲಿ ಅಂತ್ಯ ಕಂಡಿತ್ತು. ನಂತರ ಪಂದ್ಯದ ಫಲಿತಾಂಶಕ್ಕಾಗಿ ಉಭಯ ತಂಡಗಳ ನಡುವೆ ಸೂಪರ್ ಓವರ್ ಆಡಿಸಲಾಯಿತು.
ಸೂಪರ್ ಓವರ್ನಲ್ಲಿ ಮೊದಲು ಬ್ಯಾಟ್ ಮಾಡಿದ ಗಯಾನ ವಾರಿಯರ್ಸ್ 6 ಎಸೆತಗಳಲ್ಲಿ 11 ರನ್ ಕಲೆಹಾಕಿತು. ಈ ಪಂದ್ಯವನ್ನು ಗೆಲ್ಲಲು ರೆಡ್ ಸ್ಟೀಲ್ಗೆ 12 ರನ್ಗಳು ಬೇಕಿತ್ತು. ಈ ವೇಳೆ ವಾರಿಯರ್ಸ್ ತಂಡ ಸ್ಪಿನ್ನರ್ ಸುನಿಲ್ ನರೈನ್ ಅವರನ್ನು ಬೌಲಿಂಗ್ ಮಾಡಲು ಕಣಕ್ಕಿಳಿಸಿತು. ಗೆಲ್ಲಲು 12ರನ್ ಗಳಿಸಿಬೇಕಿದ್ದ ರೆಡ್ ಸ್ಟೀಲ್ ನರೈನ್ ಅವರ ಸ್ಪಿನ್ ದಾಳಿಗೆ ಸಿಲುಕಿ ಈ ಓವರ್ನಲ್ಲಿ ಒಂದೇ ಒಂದು ರನ್ ಗಳಿಸಲು ಸಾಧ್ಯವಾಗಲಿಲ್ಲ.
ಅಲ್ಲದೇ ಈ ಸೂಪರ್ ಓವರ್ನಲ್ಲಿ ಸುನೀಲ್ ನರೈನ್ ತಮ್ಮ 6 ಎಸೆತಗಳಲ್ಲಿ ಒಂದು ವಿಕೆಟ್ ಕೂಡ ಪಡೆದರು. ಇದರಿಂದಾಗಿ ವಾರಿಯರ್ಸ್ ತಂಡ ರೋಚಕ ಗೆಲುವು ಸಾಧಿಸಿತು. ಇದರೊಂದಿಗೆ ಸುನೀಲ್ ನರೈನ್ ಕೂಡ ಸೂಪರ್ ಓವರ್ ಮೇಡನ್ ಮಾಡಿದ ವಿಶ್ವದ ಮೊದಲ ಬೌಲರ್ ಎಂಬ ದಾಖಲೆ ಬರೆದರು. ಅಂದೂ ನಿರ್ಮಾಣವಾಗಿರುವ ಈ ದಾಖಲೆ ಇಂದಿಗೂ ಯಾರಿಂದ ಮುರಿಯಲು ಸಾಧ್ಯವಾಗದೆ ಹಾಗೆ ಉಳಿದುಕೊಂಡಿದೆ.
ಇದಕ್ಕೂ ಮುನ್ನ ಈ ಪಂದ್ಯದಲ್ಲಿ 4 ಓವರ್ ಬೌಲಿಂಗ್ ಮಾಡಿದ್ದ ನರೈನ್ 23 ರನ್ಗಳನ್ನು ನೀಡಿ 2 ವಿಕೆಟ್ ಕೂಡ ಉರುಳಿಸಿದ್ದರು. ಬ್ಯಾಟಿಂಗ್ನಲ್ಲಿ 9 ಎಸೆತಗಳಲ್ಲಿ 16 ರನ್ಗಳನ್ನು ಚಚ್ಚಿದ್ದರು.
ಇದನ್ನೂ ಓದಿ: 'ಕೊಹ್ಲಿ ಬ್ಯಾಟ್ ನನ್ನ ಇಮೇಜ್ ಡ್ಯಾಮೇಜ್ ಮಾಡಿತು, ಇನ್ಮುಂದೆ ಯಾರಿಗೂ ಬ್ಯಾಟ್ ಕೇಳಲ್ಲ': ರಿಂಕು ಹೀಗೆ ಹೇಳಿದ್ದು ಏಕೆ?
