15 ವರ್ಷಗಳ ನಂತರ ನ್ಯೂಜಿಲೆಂಡ್ ​ಮಣಿಸಿ ಟೆಸ್ಟ್​ ಸರಣಿ ಗೆದ್ದ ಶ್ರೀಲಂಕಾ - Sri Lanka Won Test Series

ನ್ಯೂಜಿಲೆಂಡ್​ ವಿರುದ್ಧ ನಡೆದ ಎರಡನೇ ಟೆಸ್ಟ್​ ಪಂದ್ಯವನ್ನು ಶ್ರೀಲಂಕಾ ಇನ್ನಿಂಗ್ಸ್​ ಸಮೇತ ಗೆದ್ದುಕೊಂಡಿದೆ. ಇದರೊಂದಿಗೆ ಕ್ಲೀನ್​ಸ್ವೀಪ್ ಮಾಡಿ ಸರಣಿ ವಶಪಡಿಸಿಕೊಂಡಿದೆ.​

ಗಾಲೆ(ಶ್ರೀಲಂಕಾ): ನ್ಯೂಜಿಲೆಂಡ್​​ ವಿರುದ್ಧ ನಡೆದ ಎರಡು ಪಂದ್ಯಗಳ ಟೆಸ್ಟ್​ ಸರಣಿಯನ್ನು ಕ್ಲೀನ್​ ಸ್ವೀಪ್​ ಮಾಡುವ ಮೂಲಕ ಶ್ರೀಲಂಕಾ ಸರಣಿ ಗೆದ್ದುಕೊಂಡಿದೆ. 15 ವರ್ಷಗಳ ಬಳಿಕ ಲಂಕನ್ನರು ಕಿವೀಸ್​ ವಿರುದ್ಧ ಗೆಲುವು ಸಾಧಿಸಿದರು.

ಗಾಲೆ ಅಂತಾರಾಷ್ಟ್ರೀಯ ಮೈದಾನದಲ್ಲಿ ನಡೆದ 2ನೇ ಟೆಸ್ಟ್​ ಪಂದ್ಯದದಲ್ಲಿ ಸಿಂಹಳೀಯರು ಅದ್ಭುತ ಪ್ರದರ್ಶನ ತೋರಿದರು. ಈ ಪಂದ್ಯದಲ್ಲಿ ಟಾಸ್​ ಗೆದ್ದ ಲಂಕಾ ನಾಯಕ ಧನಂಜಯ ಡಿ ಸಿಲ್ವಾ ಮೊದಲಿಗೆ ಬ್ಯಾಟಿಂಗ್​ ಮಾಡಲು ನಿರ್ಧರಿಸಿದರು. ಅದರಂತೆ, ಮೊದಲ ಇನ್ನಿಂಗ್ಸ್‌ನಲ್ಲಿ ಲಂಕಾ ಬ್ಯಾಟರ್‌ಗಳು ಅತ್ಯುತ್ತಮ ಪ್ರದರ್ಶನ ತೋರಿದರು. ದಿನೇಶ್​ ಚಂಡಿಮಾಲ್​ (116), ಏಂಜೆಲೊ ಮ್ಯಾಥ್ಯೂಸ್​ (88) ಭರ್ಜರಿ ಬ್ಯಾಟಿಂಗ್​ ಪ್ರದರ್ಶಿಸಿದ್ದರು. ಐದನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗಿಳಿದ ಕಮಿಂದು ಮೆಂಡಿಸ್​ ಅಜೇಯವಾಗಿ 182 ರನ್​ಗಳಿಸಿದರು. ಉಳಿದಂತೆ ವಿಕೆಟ್​ ಕೀಪರ್​ ಕುಸಾಲ್​ ಮೆಂಡಿಸ್​ ಕೂಡ (106) ಶತಕ ಸಿಡಿಸಿದರು. ಇದರಿಂದಾಗಿ ಶ್ರೀಲಂಕಾ ಮೊದಲ ಇನ್ನಿಂಗ್ಸ್​ನಲ್ಲಿ 5 ವಿಕೆಟ್​ ನಷ್ಟಕ್ಕೆ 602 ರನ್​ಗಳ ಬೃಹತ್​ ಮೊತ್ತ ಪೇರಿಸಿತು.

Sri Lanka clinch the series in style! 🏆🇱🇰 #SLvNZ

Dominant performance sees them win the second Test by an innings and 154 runs, taking the series 2-0.

Congratulations to the team on a fantastic series win! 🎉 pic.twitter.com/XbbAdlvo7k

— Sri Lanka Cricket 🇱🇰 (@OfficialSLC) September 29, 2024

ಎರಡಂಕಿಗೆ ಕಿವೀಸ್​ ಸರ್ವಪತನ: ಇದಕ್ಕುತ್ತರವಾಗಿ ಕಿವೀಸ್​ ಮೊದಲ ಇನ್ನಿಂಗ್ಸ್​ನಲ್ಲಿ ಕೇವಲ 88 ರನ್‌ಗಳಿಗೆ ತನ್ನೆಲ್ಲ ವಿಕೆಟ್​ ಕಳೆದುಕೊಂಡಿತು. ತಂಡದ ಪರ ಯಾವೊಬ್ಬ ಬ್ಯಾಟರ್​ ಅರ್ಧಶತಕ ಗಳಿಸಲು ಸಾಧ್ಯವಾಗದೇ ಪೆವಿಲಿಯನ್​ ಸೇರಿದರು.

ಇದರೊಂದಿಗೆ 514 ರನ್​ಗಳ ಹಿನ್ನಡೆ ಸಾಧಿಸಿದ್ದ ಕಿವೀಸ್​ ಮೇಲೆ ಲಂಕನ್ನರು ಫಾಲೋಆನ್​ ಹೇರಿದರು. ಅದರಂತೆ, ಎರಡನೇ ಇನ್ನಿಂಗ್ಸ್​ನಲ್ಲಿ ಮತ್ತೆ ಬ್ಯಾಟಿಂಗ್​ ಆರಂಭಿಸಿದ ನ್ಯೂಜಿಲೆಂಡ್​ ಪರ ಡೆವೋನ್​ ಕಾನ್ವೆ (61) ಮತ್ತು ವಿಯಮ್ಸನ್​ (46) ಉತ್ತಮ ಇನ್ನಿಂಗ್ಸ್​ ಆಡಿದರೆ, ಮಧ್ಯಮ ಕ್ರಮಾಂಕದಲ್ಲಿ ಟಾಮ್​ ಬ್ಲಂಡೆ (60), ಗ್ಲೆನ್​ ಫಿಲಿಫ್​ (78), ಮಿಚೆಲ್​ ಸ್ಯಾಂಟ್ನರ್​ (67) ಉತ್ತಮ ಬ್ಯಾಟಿಂಗ್​ ಪ್ರದರ್ಶಿಸಿದರು.

ಟಾಮ್​ ಮತ್ತು ಗ್ಲೆನ್​ ಫಿಲಿಪ್​ ಕೆಲಕಾಲ ಕ್ರೀಸ್​ನಲ್ಲಿ ಗಟ್ಟಿ ನೆಲೆಯೂರಿ ಭರ್ಜರಿ ಬ್ಯಾಟಿಂಗ್​ ನಡೆಸಿದರು. ಈ ಇಬ್ಬರು ಪೆವಿಲಿಯನ್​ ಸೇರುತ್ತಿದ್ದಂತೆ ಮತ್ತೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ಲಂಕನ್ನರು ಬ್ಯಾಕ್​ ಟು ಬ್ಯಾಕ್​ ವಿಕೆಟ್​ಗಳನ್ನು ಉರುಳಿಸಿದರು. ಇದರಿಂದಾಗಿ ಶ್ರೀಲಂಕಾ ಇನ್ನಿಂಗ್ಸ್ ಸಮೇತ 154 ರನ್‌ಗಳಿಂದ ಪಂದ್ಯ ಗೆದ್ದುಕೊಂಡಿತು.

ಮೊದಲ ಇನ್ನಿಂಗ್ಸ್​ನಲ್ಲಿ ಲಂಕಾ ಪರ ಪ್ರಭಾತ್​ ಜಯಸೂರ್ಯ 6 ವಿಕೆಟ್​ಗಳನ್ನು ಪಡೆದು ಮಿಂಚಿದರೆ, ಎರಡನೇ ಇನ್ನಿಂಗ್ಸ್​ನಲ್ಲಿ ನಿಶಾನ್​ ಪಿರಿಸ್​ 6 ವಿಕೆಟ್​ ಕಿತ್ತು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಇದನ್ನೂ ಓದಿ: ಕ್ರಿಕೆಟ್​ ಪಂದ್ಯದ ವೇಳೆ ಮೈದಾನ ಪ್ರವೇಶಿಸಿದ ಶ್ವಾನ: ಫನ್ನಿ ವಿಡಿಯೋ ನೋಡಿ - Dog Entered Cricket Ground