ನವದೆಹಲಿ: ಜೋ ಬೈಡನ್ ಎರಡನೇ ಬಾರಿಗೆ ಅಧ್ಯಕ್ಷ ಸ್ಥಾನದ ಅಭ್ಯರ್ಥಿಯಾಗಿ ತಮ್ಮ ಪ್ರಚಾರವನ್ನು ಮುಂದುವರಿಸಬೇಕಾ ಅಥವಾ ಬೇಡವಾ ಎಂಬ ಚರ್ಚೆ ಸದ್ಯ ಅವರ ಡೆಮೊಕ್ರಾಟ್ ಪಕ್ಷದಲ್ಲಿ ಜೋರಾಗಿ ನಡೆಯುತ್ತಿದೆ. ಭಾರತೀಯ ಮೂಲದ ವ್ಯಕ್ತಿ ಹಾಗೂ ವೈಸ್ ಪ್ರೆಸಿಡೆಂಟ್ ಕಮಲಾ ಹ್ಯಾರಿಸ್ ಅವರನ್ನು ಅಧ್ಯಕ್ಷೀಯ ಅಭ್ಯರ್ಥಿಯನ್ನಾಗಿಸಿದರೆ ಡೆಮಾಕ್ರಟಿಕ್ ಪಕ್ಷವು ಮತ್ತೊಮ್ಮೆ ಅಧಿಕಾರಕ್ಕೇರುವ ಸಾಧ್ಯತೆಗಳಿವೆ ಎಂದು ಅಮೆರಿಕದ ಖ್ಯಾತ ರಾಜಕೀಯ ವಿಶ್ಲೇಷಕ ಅಲನ್ ಲಿಚ್ಮನ್ ಹೇಳಿದ್ದಾರೆ. ಈ ಹಿಂದೆ ಅನೇಕ ಬಾರಿ ಅಲನ್ ಲಿಚ್ಮನ್ ಅವರ ರಾಜಕೀಯ ಊಹೆಗಳು ಸತ್ಯವಾಗಿವೆ.
"ಜೋ ಬೈಡನ್ ಗೆಲ್ಲುವ ಸಾಕಷ್ಟು ಅವಕಾಶ ಹೊಂದಿದ್ದರೂ ಡೆಮಾಕ್ರಟಿಕ್ ಪಕ್ಷ ಅವರನ್ನು ಹೊರಹಾಕಿದರೆ, ಅವರು ಅಧ್ಯಕ್ಷೀಯ ಅಭ್ಯರ್ಥಿಯ ರೇಸ್ನಿಂದ ಹಿಂದೆ ಸರಿಯಬೇಕು. ಕಮಲಾ ಹ್ಯಾರಿಸ್ ಅವರನ್ನು ಒಮ್ಮತದ ಅಧ್ಯಕ್ಷೀಯ ಅಭ್ಯರ್ಥಿಯನ್ನಾಗಿಸಲು ಅವರು ಮುಂದಿನ ಹಂತದ ಚುನಾವಣಾ ಯೋಜನೆಯನ್ನು ರೂಪಿಸಬೇಕು. ಹೀಗೆ ಮಾಡಿದಲ್ಲಿ ಡೆಮಾಕ್ರಟಿಕ್ ಪಕ್ಷವು ಮತ್ತೆ ಗೆಲ್ಲಲಿದೆ" ಎಂದು ಅಲನ್ ಲಿಚ್ಮನ್ ಗುರುವಾರ ಸಂಜೆ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಕಳೆದ ಶನಿವಾರ ಪೆನ್ಸಿಲ್ವೇನಿಯಾದಲ್ಲಿ ರಿಪಬ್ಲಿಕನ್ ಪ್ರತಿಸ್ಪರ್ಧಿ ಮತ್ತು ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮೇಲೆ ಕೊಲೆ ಯತ್ನ ನಡೆದಿತ್ತು. ಇದರ ನಂತರ ಚುನಾವಣಾ ಪ್ರಚಾರದಲ್ಲಿ ಟ್ರಂಪ್ ಮುನ್ನಡೆ ಸಾಧಿಸಿದ್ದಾರೆ ಎಂದು ವರದಿಗಳು ಹೇಳಿವೆ. ಏತನ್ಮಧ್ಯೆ ಬೈಡನ್ ಅಧ್ಯಕ್ಷೀಯ ಅಭ್ಯರ್ಥಿಯಾಗಿ ಮುಂದುವರೆದಿದ್ದಾರೆ.
ಬೈಡನ್ಗೆ 81 ವರ್ಷ ವಯಸ್ಸಾಗಿರುವುದರಿಂದ ಮತ್ತು ಟ್ರಂಪ್ ವಿರುದ್ಧದ ಟಿವಿ ಚರ್ಚೆಯಲ್ಲಿ ಅವರ ಕಳಪೆ ಪ್ರದರ್ಶನಕ್ಕಾಗಿ ತಮ್ಮ ಉಮೇದುವಾರಿಕೆಯನ್ನು ಹಿಂತೆಗೆದುಕೊಳ್ಳಬೇಕೆಂದು ಡೆಮಾಕ್ರಟಿಕ್ ಪಕ್ಷದೊಳಗೆ ಒತ್ತಡ ಹೆಚ್ಚಾಗುತ್ತಿದೆ. ಪ್ರಸ್ತುತ ಬೈಡನ್ಗೆ ಮತ್ತೆ ಕೋವಿಡ್ -19 ಸೋಂಕು ತಗುಲಿದೆ ಎಂದು ವೈದ್ಯರು ಹೇಳಿದ್ದಾರೆ. ಈ ಎಲ್ಲ ಕಾರಣಗಳಿಗಾಗಿ ಲಿಚ್ಮನ್ ಅವರ ಹೇಳಿಕೆ ಮಹತ್ವ ಪಡೆದುಕೊಂಡಿದೆ.
ಅಮೆರಿಕದ ರಾಜಕೀಯ ವಿಶ್ಲೇಷಕ ಅಲನ್ ಲಿಚ್ಮನ್ ತಮ್ಮದೇ ಆದ ಒಂದು ಮಾದರಿಯನ್ನು ತಯಾರಿಸಿದ್ದು, ಅದರ ಆಧಾರದ ಮೇಲೆ ಅವರು ಅಧ್ಯಕ್ಷೀಯ ಚುನಾವಣೆಯ ಫಲಿತಾಂಶಗಳ ಬಗ್ಗೆ ತಮ್ಮ ಭವಿಷ್ಯವಾಣಿಗಳನ್ನು ಮಾಡುತ್ತಾರೆ. ಅವರು ತಮ್ಮ ಪುಸ್ತಕಗಳಾದ ದಿ ಥರ್ಟೀನ್ ಕೀಸ್ ಟು ದಿ ಪ್ರೆಸಿಡೆನ್ಸಿ ಮತ್ತು ದಿ ಕೀಸ್ ಟು ದಿ ವೈಟ್ ಹೌಸ್ ನಲ್ಲಿ ಪ್ರಸ್ತುತಪಡಿಸಿದ "ಕೀಸ್" (Keys) ವ್ಯವಸ್ಥೆಗೆ ಹೆಸರುವಾಸಿಯಾಗಿದ್ದಾರೆ. ಈ ವ್ಯವಸ್ಥೆಯ 13 ಐತಿಹಾಸಿಕ ಅಂಶಗಳ ಆಧಾರದ ಮೇಲೆ, ಪ್ರಸ್ತುತ ಅಧ್ಯಕ್ಷ ಸ್ಥಾನವನ್ನು ಹೊಂದಿರುವ ಪಕ್ಷವು ಮತ್ತೆ ಚುನಾವಣೆಯಲ್ಲಿ ಗೆಲ್ಲುತ್ತದೆಯೇ ಎಂಬುದನ್ನು ಊಹಿಸಲಾಗುತ್ತದೆ.
ಈಟಿವಿ ಭಾರತ್ನೊಂದಿಗೆ ಮಾತನಾಡಿದ ಸ್ವತಂತ್ರ ಥಿಂಕ್ ಟ್ಯಾಂಕ್ ಸಂಸ್ಥೆಯಾಗಿರುವ ಐಮ್ಯಾಗ್ ಇಂಡಿಯಾದ ಅಧ್ಯಕ್ಷ ರಾಬಿಂದರ್ ಸಚದೇವ್, ಬೈಡನ್ ಅಧ್ಯಕ್ಷ ಸ್ಥಾನಕ್ಕೆ ಡೆಮಾಕ್ರಟಿಕ್ ಅಭ್ಯರ್ಥಿ ಸ್ಥಾನದಿಂದ ಕೆಳಗಿಳಿದು ಹ್ಯಾರಿಸ್ ಅವರ ಉಮೇದುವಾರಿಕೆಯನ್ನು ಅನುಮೋದಿಸಿದರೆ, ಮೂರು ಪ್ರಮುಖ ಅಂಶಗಳು ಅವರ ಪರವಾಗಿ ಕೆಲಸ ಮಾಡಲಿವೆ. ಇದು ಡೆಮಾಕ್ರಟಿಕ್ ಪಕ್ಷದೊಳಗೆ ಸುಗಮ ಪರಿವರ್ತನೆಯನ್ನು ತರುತ್ತದೆ ಎಂದು ಹೇಳಿದರು. ರಾಬಿಂದರ್ ಸಚದೇವ್ ಅಮೆರಿಕನ್ ವಿಶ್ವವಿದ್ಯಾಲಯದಲ್ಲಿ ಲಿಚ್ಮನ್ ಅವರ ಮಾಜಿ ವಿದ್ಯಾರ್ಥಿಯಾಗಿದ್ದಾರೆ.
ಬೈಡನ್ ಅವರ ಬಳಿ ಪ್ರಚಾರಕ್ಕಾಗಿ 220 ಮಿಲಿಯನ್ ಡಾಲರ್ ಹಣವಿದೆ. ಬೈಡನ್ ಹ್ಯಾರಿಸ್ ಅವರನ್ನು ಅನುಮೋದಿಸಿದರೆ, ಅವರು ಸ್ವತಂತ್ರ ವೆಚ್ಚ-ಮಾತ್ರ ರಾಜಕೀಯ ಸಮಿತಿಗಳಾದ ಸೂಪರ್ ಪಿಎಸಿಗಳನ್ನು ಬಳಸಬಹುದು. ಅದು ಸ್ವತಂತ್ರ ವೆಚ್ಚಗಳು ಮತ್ತು ಇತರ ಸ್ವತಂತ್ರ ರಾಜಕೀಯ ಚಟುವಟಿಕೆಗಳಿಗೆ ಹಣಕಾಸು ಒದಗಿಸುವ ಉದ್ದೇಶಕ್ಕಾಗಿ ವ್ಯಕ್ತಿಗಳು, ನಿಗಮಗಳು, ಕಾರ್ಮಿಕ ಸಂಘಗಳು ಮತ್ತು ಇತರ ರಾಜಕೀಯ ಕ್ರಿಯಾ ಸಮಿತಿಗಳಿಂದ ಅನಿಯಮಿತ ಕೊಡುಗೆಗಳನ್ನು ಪಡೆಯಬಹುದು. ಆದಾಗ್ಯೂ, ಅವರನ್ನು ಅನುಮೋದಿಸದಿದ್ದರೆ ಮತ್ತು ಇತರ ಡೆಮೋಕ್ರಾಟ್ಗಳು ಬೈಡನ್ಗೆ ಸವಾಲು ಹಾಕಿದರೆ, ಹೊಸ ಅಧ್ಯಕ್ಷೀಯ ಅಭ್ಯರ್ಥಿ ಮತ್ತು ಅಭ್ಯರ್ಥಿಯ ಸಹವರ್ತಿಯು ಅನುಮೋದಿಸಿದರೆ ಆ ಹಣವನ್ನು ಡೆಮಾಕ್ರಟಿಕ್ ಪಕ್ಷಕ್ಕೆ ಇತರ ಪ್ರಚಾರ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ ಎಂದು ಸಚದೇವ್ ತಿಳಿಸಿದರು.
ಮಹಿಳೆಯರ ಸಂತಾನೋತ್ಪತ್ತಿ ಹಕ್ಕುಗಳ ಪರವಾಗಿ ಹೋರಾಡುವ ಹ್ಯಾರಿಸ್ ಅವರಿಗೆ ಈ ವಿಷಯ ಕೂಡ ಚುನಾವಣೆಯಲ್ಲಿ ಲಾಭದಾಯಕವಾಗಬಹುದು. ಪ್ರಸ್ತುತ ಚುನಾವಣೆಯಲ್ಲಿ ಈ ವಿಚಾರ ಪ್ರಾಮುಖ್ಯತೆ ಪಡೆದಿದೆ ಎಂದು ಸಚದೇವ ಅಭಿಪ್ರಾಯ ಪಟ್ಟರು. ಕಮಲಾ ಹ್ಯಾರಿಸ್ ಅವರ ತಾಯಿ ಭಾರತೀಯರಾಗಿದ್ದರೆ, ಅವರ ತಂದೆ ಜಮೈಕಾದವರು.
ಇದನ್ನೂ ಓದಿ : ಟ್ರಂಪ್ಗೆ 45 ಮಿಲಿಯನ್ ಡಾಲರ್ ನೀಡುವ ವಾಗ್ದಾನ ಮಾಡಿಲ್ಲ: ಎಲೋನ್ ಮಸ್ಕ್ ಸ್ಪಷ್ಟೀಕರಣ - US Elections
