ಬ್ಲಾಂಟೈರ್(ಮಲಾವಿ): ಮಲಾವಿ ಸೇನಾ ವಿಮಾನ ಪತನವಾಗಿದ್ದು, ದೇಶದ ಉಪಾಧ್ಯಕ್ಷ ಸೌಲೋಸ್ ಚಿಲಿಮಾ ಹಾಗೂ ಇತರ 9 ಜನರು ಸಾವನ್ನಪ್ಪಿದ್ದಾರೆ. ಸೋಮವಾರ ಚಿಲಿಮಾ ಅವರನ್ನು ಹೊತ್ತೊಯ್ಯುತ್ತಿದ್ದ ವಿಮಾನ ನಾಪತ್ತೆಯಾಗಿತ್ತು. ಶೋಧ ಕಾರ್ಯಾಚರಣೆ ವೇಳೆ ಇಂದು ವಿಮಾನ ಪತನವಾಗಿರುವುದು ಖಚಿತವಾಗಿದೆ ಎಂದು ಅಧ್ಯಕ್ಷ ಲಾಜರಸ್ ಚಕ್ವೇರಾ ತಿಳಿಸಿದ್ದಾರೆ.
51 ವರ್ಷದ ಚಿಲಿಮಾ ಅವರಿದ್ದ ವಿಮಾನವು ರಾಷ್ಟ್ರ ರಾಜಧಾನಿ ಲಿಲೋಂಗ್ವೆಯಿಂದ ಸೋಮವಾರ ಬೆಳಗ್ಗೆ 9.17ಕ್ಕೆ ಹೊರಟಿತ್ತು. ಸುಮಾರು 45 ನಿಮಿಷಗಳ ನಂತರ, ಅಂದಾಜು 370 ಕಿಲೋಮೀಟರ್ ಕ್ರಮಿಸಿ ಮಜುಜು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿಯಬೇಕಾಗಿತ್ತು. ಆದರೆ, ಇದಕ್ಕೂ ಮುನ್ನವೇ ರಾಡಾರ್‌ ಸಂಪರ್ಕ ಕಳೆದುಕೊಂಡಿತ್ತು. ನಂತರದಲ್ಲಿ ವಿಮಾನವನ್ನು ಸಂಪರ್ಕಿಸುವ ಎಲ್ಲ ಪ್ರಯತ್ನಗಳು ನಡೆಸಲಾಗಿತ್ತು. ಆದರೂ, ಯಾವುದೇ ಸಂಪರ್ಕ ಸಾಧ್ಯವಾಗಿರಲಿಲ್ಲ.
ಚಿಲಿಮಾ ಹೊರಟಿದ್ದ ಮಜುಜು ನಗರವು ಮಲಾವಿಯ ಮೂರನೇ ದೊಡ್ಡ ನಗರ ಮತ್ತು ಉತ್ತರ ಪ್ರಾಂತ್ಯದ ರಾಜಧಾನಿಯಾಗಿದೆ. ಇದು ವಿಫ್ಯಾ ಪರ್ವತ ಶ್ರೇಣಿಗಳ ಗುಡ್ಡಗಾಡು, ಅರಣ್ಯ ಪ್ರದೇಶದಲ್ಲಿದೆ. ಕಣ್ಮರೆಯಾದ ವಿಮಾನ ಪತ್ತೆಗಾಗಿ ಸೈನಿಕರು, ಪೊಲೀಸ್ ಅಧಿಕಾರಿಗಳು, ತಜ್ಞರು ಸೇರಿದಂತೆ 600 ಸಿಬ್ಬಂದಿಯನ್ನೊಳಗೊಂಡ ತಂಡಗಳು ಅರಣ್ಯ ಪ್ರದೇಶಗಳಲ್ಲಿ ಶೋಧ ಕಾರ್ಯಾಚರಣೆ ಕೈಗೊಂಡಿದ್ದವು.
ಇದೀಗ ಸೇನಾ ವಿಮಾನದ ಅವಶೇಷಗಳು ಪರ್ವತ ಪ್ರದೇಶದಲ್ಲಿ ಪತ್ತೆಯಾಗಿವೆ. ಈ ಅಪಘಾತದಲ್ಲಿ ಯಾರೂ ಬದುಕುಳಿದಿಲ್ಲ ಎಂದು ಅಧ್ಯಕ್ಷ ಚಕ್ವೇರಾ ಸರ್ಕಾರಿ ದೂರದರ್ಶನದಲ್ಲಿ ತಮ್ಮ ನೇರ ಪ್ರಸಾರದ ಭಾಷಣದಲ್ಲಿ ಖಚಿತಪಡಿಸಿದ್ದಾರೆ. ಈ ವಿಮಾನದಲ್ಲಿ ದೇಶದ ಮಾಜಿ ಪ್ರಥಮ ಮಹಿಳೆಯೂ ಇದ್ದರು. ಒಟ್ಟಾರೆ ಏಳು ಜನ ಪ್ರಯಾಣಿಕರು ಹಾಗೂ ಮೂವರು ಸಿಬ್ಬಂದಿ ಪ್ರಯಾಣಿಸುತ್ತಿದ್ದರು ಎಂದು ವರದಿಯಾಗಿದೆ.
ಉಪಾಧ್ಯಕ್ಷರಿದ್ದ ವಿಮಾನ ನಾಪತ್ತೆಯಾದ ಸುದ್ದಿ ತಿಳಿದ ಕೂಡಲೇ ಅಧ್ಯಕ್ಷ ಚಕ್ವೇರಾ ತಕ್ಷಣವೇ ವಿಮಾನದ ಶೋಧ ಕಾರ್ಯಾಚರಣೆಗೆ ಆದೇಶಿಸಿದ್ದರು. ಜೊತೆಗೆ ತಮ್ಮ ಬಹಾಮಾಸ್ ಪ್ರವಾಸವನ್ನೂ ರದ್ದುಗೊಳಿಸಿದ್ದರು. ಮೃತ ಚಿಲಿಮಾ ಅವರು 2019ರ ಮಲವಿಯನ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸ್ಪರ್ಧಿಸಿ ಮೂರನೇ ಸ್ಥಾನ ಪಡೆದಿದ್ದರು. ಉಪಾಧ್ಯಕ್ಷರಾದ ಬಳಿಕ ಸರ್ಕಾರಿ ಗುತ್ತಿಗೆಗಳ ಸಂಬಂಧ ಭ್ರಷ್ಟಾಚಾರ ಆರೋಪಗಳನ್ನು ಎದುರಿಸುತ್ತಿದ್ದರು. ಕಳೆದ ತಿಂಗಳಷ್ಟೇ ಆರೋಪಗಳನ್ನು ಕೈಬಿಡಲಾಗಿತ್ತು. ಇದರಿಂದ ಚಕ್ವೇರಾ ಆಡಳಿತವು ಭ್ರಷ್ಟಾಚಾರದ ವಿರುದ್ಧ ಕಠಿಣ ನಿಲುವು ತೆಗೆದುಕೊಳ್ಳುತ್ತಿಲ್ಲ ಎಂಬ ಟೀಕೆಯೂ ವ್ಯಕ್ತವಾಗಿತ್ತು.
ಇದನ್ನೂ ಓದಿ: ಹೆಲಿಕಾಪ್ಟರ್ ಪತನ; ಇರಾನ್ ಅಧ್ಯಕ್ಷ ಇಬ್ರಾಹಿಂ ರೈಸಿ ಸೇರಿ 9 ಮಂದಿ ದುರ್ಮರಣ
