ಕ್ಯಾಲಿಫೋರ್ನಿಯಾ ಕಾಳ್ಗಿಚ್ಚು; ಸುಟ್ಟು ಬೂದಿಯಾದ ಸ್ಥಳದಲ್ಲಿ ಮನೆಗಳ ಅಸ್ತಿತ್ವ ಹುಡುಕುತ್ತಿರುವ ಲಾಸ್​ ಏಂಜಲೀಸ್​ ಜನರು

ಕಳೆದ ಏಂಟು ತಿಂಗಳಿನಿಂದ ಮಳೆ ಕಾಣದ ಲಾಸ್​ ಏಂಜಲೀಸ್​ನಲ್ಲಿ ಶುಕ್ರವಾರ ಬೆಂಕಿ ಆರಿಸುವ ಪ್ರಕ್ರಿಯೆಗೆ ಗಾಳಿ ಶಾಂತವಾಗುವ ಮೂಲಕ ಸಹಾಯ ಮಾಡಿತು.

ಲಾಸ್​ ಏಂಜಲೀಸ್, ಅಮೆರಿಕ​: ಯುನೈಟೆಡ್​ ಸ್ಟೇಟ್​ನ ಎರಡನೇ ಅತಿದೊಡ್ಡ ನಗರ ಲಾಸ್​ ಏಂಜಲೀಸ್​ನಲ್ಲಿ ಹರಡುತ್ತಿರುವ ಕಾಳ್ಗಿಚ್ಚಿಗೆ ತಮ್ಮ ಮನೆಗಳು ಆಹುತಿಯಾಗುತ್ತಿರುವುದನ್ನು ಕಂಡ ಅನೇಕರು ಆಘಾತಕ್ಕೆ ಒಳಗಾಗಿದ್ದಾರೆ. ಈ ದುರಂತದಲ್ಲಿ 13 ಮಿಲಿಯನ್​ ಜನರು ಸ್ಥಳಾಂತಗೊಂಡಿದ್ದು, ಇದೀಗ ಬೆಂಕಿಯಲ್ಲಿ ಸುಟ್ಟು ಕರಕಲಾದ ಮನೆಗಳನ್ನು ಕಂಡು ಮರಗುತ್ತಿದ್ದು, ಹೊಸ ಬದುಕು ಕಟ್ಟಿಕೊಳ್ಳುವ ಸವಾಲನ್ನು ಎದುರಿಸುತ್ತಿದ್ದಾರೆ.

ಕಳೆದ ಏಂಟು ತಿಂಗಳಿನಿಂದ ಮಳೆ ಕಾಣದ ಲಾಸ್​ ಏಂಜಲೀಸ್​ನಲ್ಲಿ ಶುಕ್ರವಾರ ಬೆಂಕಿ ಆರಿಸುವ ಪ್ರಕ್ರಿಯೆಗೆ ಗಾಳಿ ಶಾಂತವಾಗುವ ಮೂಲಕ ಕೊಂಚ ಸಹಾಯ ಮಾಡಿತು. ಪಾಲಿಸೇಡ್​ನ ಪೂರ್ವ ಭಾಗದಲ್ಲಿ ಬೆಂಕಿ ಕೆನ್ನಾಲಿಗೆ ಹರಡಿದ್ದು ಶುಕ್ರವಾರ ಸಂಜೆ ಕೂಡ ಸ್ಥಳಾಂತರ ಕೆಲಸ ಮುಂದುವರೆದಿದೆ.

ಕಾಡ್ಗಿಚ್ಚಿನ ಭೀಕರತೆ (ಎಪಿ)

ಅಲ್ಟಡೆನಾನಲ್ಲಿ ಬೆಂಕಿ ಕೆನ್ನಾಲಿಗೆ ಕಾಣಿಸಿಕೊಂಡು ತಮ್ಮ ಮನೆ ಕೂಡ ಆಹುತಿಯಾಗುವುದನ್ನು ಕಂಡ ಬ್ರಿಡ್ಗೆಟ್​ ಬರ್ಗ್​​, ಎರಡು ದಿನದ ಬಳಿಕ ಕುಟುಂಬದೊಂದಿಗೆ ಮನೆಯಿದ್ದ ಸ್ಥಳಕ್ಕೆ ಮರಳಿದ್ದಾರೆ. ಇಲ್ಲಿ ಆಕೆ ತನ್ನ ಮನೆಯ ನೆನಪುಗಳನ್ನು ಮೆಲುಕು ಹಾಕಿದ್ದು, ಕಂಬನಿ ಮಿಡಿದಿದ್ದಾರೆ.

ಎಲ್​ಎಯಿಂದ 25 ಮೈಲಿವರೆಗೆ ಹರಡಿರುವ ಕಾಳ್ಗಿಚ್ಚಿನಿಂದ ಮನೆ, ಅಪಾರ್ಟ್​ಮೆಂಟ್​ ಕಟ್ಟಡ, ಉದ್ಯಮ ಸೇರಿದಂತೆ 12,000ಕ್ಕೂ ಹೆಚ್ಚು ಕಟ್ಟಡಗಳು, ಹಲವು ಕಾರುಗಳು ಸುಟ್ಟು ಕರಕಲಾಗಿದ್ದು, ಈ ಭೀಕರ ಕಾಳ್ಗಿಚ್ಚಿಗೆ ಕಾರಣವನ್ನು ಯಾರು ಕೂಡ ಪತ್ತೆ ಮಾಡಿಲ್ಲ.

ಕಾಡ್ಗಿಚ್ಚಿನ ಜ್ವಾಲೆಗೆ ಆಹುತಿಯಾದ ನಗರ (ಎಪಿ)

ನಾಯಕತ್ವದ ವೈಫಲ್ಯದ ಕುರಿತು ಆರೋಪ ಕೇಳಿ ಬಂದಿದ್ದು, ರಾಜಕೀಯ ಟೀಕೆಗಳಿಗೆ ಕಾರಣವಾಗಿರುವ ಘಟನೆಗೆ ಸಂಬಂಧಿಸಿದಂತೆ ತನಿಖೆ ಸಾಗಿದೆ. ಗವರ್ನರ್​ ಗವಿನ್​ ನ್ಯೂಸಮ್​ ಶುಕ್ರವಾರ, ದೀರ್ಘ ತೊಂದರೆಗೆ ಕಾರಣವಾಗುತ್ತಿರುವ ಈ ಕಾಳ್ಗಿಚ್ಚನ್ನು ನಂದಿಸಲು ಸುಮಾರು 117 ಮಿಲಿಯನ್​ ಗ್ಯಾಲನ್​ ನೀರನ್ನು ಅಣೆಕಟ್ಟುಗಳಿಂದ ಬಳಸುವಂತೆ ಆದೇಶಿಸಿದ್ದಾರೆ.

ಈ ನಡುವೆ ಲಾಸ್​ ಏಜಂಲೀಸ್​ ಅಗ್ನಿ ಶಾಮಕದಳದ ಮುಖ್ಯಸ್ಥ ಕ್ರಿಸ್ಟಿನ ಕ್ರೌಲಿ, ಅಗ್ನಿಶಾಮಕದಳದ ಸಿಬ್ಬಂದಿಗೆ ಸಾಕಷ್ಟು ಹಣ ನೀಡಿಲ್ಲ ಎಂದು ಆರೋಪಿಸಿದ್ದು, ನೀರಿನ ಬಿಕ್ಕಟ್ಟಿನ ಕುರಿತು ಕೂಡ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಈ ಕಾಳ್ಗಿಚ್ಚಿಗೆ ಪಾಲಿಸಡೇಸ್​​ನಲ್ಲಿ 11 ಜನರು ಸಾವನ್ನಪ್ಪಿದ್ದು, ಈಟೊನ್​ ಫೈರ್​ನಲ್ಲಿ ಆರು ಮಂದಿ ಮೃತಪಟ್ಟಿದ್ದಾರೆ ಎಂದು ಎಲ್​ಎ ಕಂಟ್ರಿ ಮೆಡಿಕಲ್​ ಪರೀಕ್ಷಕ ಅಧಿಕಾರಿ ತಿಳಿಸಿದ್ದಾರೆ. ಈ ನಡುವೆ ಕಣ್ಮರೆಯಾಗಿರುವವರ ಕುರಿತು ವರದಿ ನೀಡುವಂತೆ ತಿಳಿಸಲಾಗಿದ್ದು, ಇನ್ನೂ 10 ಸಾವಿರ ಮಂದಿ ಸ್ಥಳಾಂತರವಾಗಬೇಕಿದೆ.

ಈ ದುರಂತವೂ ಹೋಟೆಲ್​ ವೈಟರ್​ರಿಂದ ಸಿನಿಮಾ ತಾರೆಯರವರೆಗೆ ಪ್ರತಿಯೊಬ್ಬರ ಮನೆಯನ್ನು ಕಿತ್ತುಕೊಂಡಿದ್ದು, ಸರ್ಕಾರ ಇದರ ಹಾನಿಯನ್ನು ಇನ್ನು ಅಂದಾಜಿಸಬೇಕಿದೆ. ಖಾಸಗಿ ಘಟಕಗಳು ಅಂದಾಜಿಸಿದಂತೆ 10 ಬಿಲಿಯನ್ ಡಾಲರ್​​ ನಷ್ಟವಾಗಿದೆ. ಈ ನಡುವೆ, ವಾಲ್ಟ್​​ ಡಿಸ್ನಿ ಕಾಳ್ಗಿಚ್ಚಿನ ಸಂತ್ರಸ್ತರಿಗೆ 15 ಮಿಲಿಯನ್​ ಡಾಲರ್​ ನೆರವು ನೀಡಿದ್ದು, ಪುನರ್​ ನಿರ್ಮಾಣದಲ್ಲಿ ಸಹಾಯ ಮಾಡುವುದಾಗಿ ತಿಳಿಸಿದೆ.

ಶಾಲೆಗಳು, ಚರ್ಚ್‌ಗಳು, ಲೈಬ್ರರಿಗಳು, ಬೂಟೀಕ್‌ಗಳು, ಬಾರ್‌ಗಳು, ರೆಸ್ಟೋರೆಂಟ್‌ಗಳು, ಬ್ಯಾಂಕ್‌ಗಳು, ಇಲ್ಲಿನ ಇತಿಹಾಸ ಸಾರುತ್ತಿದ್ದ ಸ್ಥಳೀಯ ಗುರುತುಗಳು ಬೆಂಕಿಗೆ ಆಹುತಿಯಾಗಿದೆ.

ಇದನ್ನೂ ಓದಿ: ಲಾಸ್​ ಏಂಜಲೀಸ್​ನಲ್ಲಿ ಭೀಕರ ಕಾಡ್ಗಿಚ್ಚು; ಹಾಲಿವುಡ್ ಹಿಲ್ಸ್‌ನಲ್ಲಿ ಸೆಲಿಬ್ರಿಟಿಗಳ ಮನೆಗಳು ಸುಟ್ಟು ಭಸ್ಮ