ಸ್ಟಾಕ್ ಹೋಮ್: ಗೂಗಲ್ ಡೀಪ್ ಮೈಂಡ್ ಕಂಪನಿಯ ಇಬ್ಬರು ವಿಜ್ಞಾನಿಗಳಾದ ಡೆಮಿಸ್ ಹಸ್ಸಾಬಿಸ್ ಮತ್ತು ಜಾನ್ ಎಂ.ಜಂಪರ್ ಸೇರಿದಂತೆ ವಾಷಿಂಗ್ಟನ್ ವಿಶ್ವವಿದ್ಯಾಲಯದ ಪ್ರೊಫೆಸರ್ ಡೇವಿಡ್ ಬೇಕರ್ ಅವರು 2024ರ ರಸಾಯನಶಾಸ್ತ್ರದ ನೊಬೆಲ್ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಪ್ರೋಟಿನ್ ವಿನ್ಯಾಸ ಮತ್ತು ರಚನೆಯ ಸಂಶೋಧನೆಗಾಗಿ ಈ ವಿಜ್ಞಾನಿಗಳಿಗೆ ಪ್ರತಿಷ್ಠಿತ ನೊಬೆಲ್ ಪ್ರಶಸ್ತಿ ನೀಡಲಾಗಿದೆ.
"ರಾಯಲ್ ಸ್ವೀಡಿಷ್ ಅಕಾಡೆಮಿ ಆಫ್ ಸೈನ್ಸಸ್ 2024ರ ರಸಾಯನಶಾಸ್ತ್ರದ ನೊಬೆಲ್ ಪ್ರಶಸ್ತಿಯನ್ನು ಡೇವಿಡ್ ಬೇಕರ್ ಅವರಿಗೆ 'ಕಂಪ್ಯೂಟೇಶನಲ್ ಪ್ರೋಟಿನ್ ವಿನ್ಯಾಸಕ್ಕಾಗಿ' ಮತ್ತು ಇನ್ನರ್ಧವನ್ನು ಜಂಟಿಯಾಗಿ ಡೆಮಿಸ್ ಹಸ್ಸಾಬಿಸ್ ಮತ್ತು ಜಾನ್ ಎಂ.ಜಂಪರ್ ಅವರಿಗೆ 'ಪ್ರೋಟಿನ್ ರಚನೆಯ ಮುನ್ಸೂಚನೆಗಾಗಿ' ನೀಡಲು ನಿರ್ಧರಿಸಿದೆ" ಎಂದು ಅಕಾಡೆಮಿ ಸಾಮಾಜಿಕ ಮಾಧ್ಯಮ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದೆ.
ಹಸ್ಸಾಬಿಸ್ ಪ್ರಸ್ತುತ ಯುಕೆಯಲ್ಲಿ ಗೂಗಲ್ ಡೀಪ್ ಮೈಂಡ್ ನ ಸಿಇಒ ಆಗಿದ್ದಾರೆ ಮತ್ತು ಜಂಪರ್ ಗೂಗಲ್ ಡೀಪ್ ಮೈಂಡ್ನಲ್ಲಿ ಹಿರಿಯ ಸಂಶೋಧನಾ ವಿಜ್ಞಾನಿಯಾಗಿದ್ದಾರೆ.
ಯುಎಸ್ನ ಬೇಕರ್ ಸಂಪೂರ್ಣವಾಗಿ ಹೊಸ ರೀತಿಯ ಪ್ರೋಟೀನ್ಗಳನ್ನು ನಿರ್ಮಿಸುವ ಅಸಾಧ್ಯವಾದುದನ್ನು ಸಾಧಿಸಿದ್ದರೆ, ಯುಕೆಯ ಹಸ್ಸಾಬಿಸ್ ಮತ್ತು ಜಂಪರ್ ಪ್ರೋಟೀನ್ಗಳ ಸಂಕೀರ್ಣ ರಚನೆಗಳನ್ನು ಊಹಿಸುವಂಥ ಎಐ ಮಾದರಿಯನ್ನು ತಯಾರಿಸಿದ್ದು, 50 ವರ್ಷಗಳ ಹಳೆಯ ಸಮಸ್ಯೆಯನ್ನು ಪರಿಹರಿಸಲು ನೆರವಾಗಿದ್ದಾರೆ.
"ಈ ವರ್ಷ ಗುರುತಿಸಲಾಗುತ್ತಿರುವ ಆವಿಷ್ಕಾರಗಳ ಪೈಲಿ ಒಂದು ಅದ್ಭುತ ಪ್ರೋಟೀನ್ಗಳ ನಿರ್ಮಾಣಕ್ಕೆ ಸಂಬಂಧಿಸಿದೆ. ಎರಡನೆಯದು 50 ವರ್ಷಗಳ ಕನಸನ್ನು ಈಡೇರಿಸುವ ಬಗ್ಗೆ: ಪ್ರೋಟೀನ್ಗಳನ್ನು ಅಮೈನೋ ಆಮ್ಲದ ಅನುಕ್ರಮಗಳಿಂದ ಆ ಪ್ರೋಟೀನ್ ರಚನೆಗಳನ್ನು ಊಹಿಸುವುದು. ಈ ಎರಡೂ ಆವಿಷ್ಕಾರಗಳು ವಿಶಾಲ ಸಾಧ್ಯತೆಗಳನ್ನು ನಮ್ಮ ಮುಂದೆ ತೆರೆದಿಟ್ಟಿವೆ" ಎಂದು ರಸಾಯನಶಾಸ್ತ್ರದ ನೊಬೆಲ್ ಸಮಿತಿಯ ಅಧ್ಯಕ್ಷ ಹೈನರ್ ಲಿಂಕ್ ಹೇಳಿದರು.
ಬೇಕರ್, 2003ರಲ್ಲಿ ಹೊಸ ಪ್ರೋಟೀನ್ ಅನ್ನು ವಿನ್ಯಾಸಗೊಳಿಸಲು 20 ವಿಭಿನ್ನ ಅಮೈನೋ ಆಮ್ಲಗಳನ್ನು ಬಳಸುವಲ್ಲಿ ಯಶಸ್ವಿಯಾದರು. ಅಂದಿನಿಂದ ಅವರ ಸಂಶೋಧನಾ ತಂಡವು ಔಷಧಿಗಳು, ಲಸಿಕೆಗಳು, ನ್ಯಾನೊ ವಸ್ತುಗಳು ಮತ್ತು ಸಣ್ಣ ಸಂವೇದಕಗಳಾಗಿ ಬಳಸಬಹುದಾದ ಪ್ರೋಟೀನ್ಗಳನ್ನು ಒಳಗೊಂಡಂತೆ ಒಂದರ ನಂತರ ಒಂದರಂತೆ ಕಾಲ್ಪನಿಕ ಪ್ರೋಟೀನ್ ಸೃಷ್ಟಿಯನ್ನು ಉತ್ಪಾದಿಸಿದೆ.
ಈ ವಿಜ್ಞಾನಿಗಳು ಮಾಡಿದ ಆವಿಷ್ಕಾರಗಳು ಅಗಾಧ ಸಾಮರ್ಥ್ಯವನ್ನು ಹೊಂದಿವೆ ಎಂದು ಅಕಾಡೆಮಿ ಹೇಳಿದೆ. 11 ಮಿಲಿಯನ್ ಸ್ವೀಡಿಷ್ ಕ್ರೋನರ್ ($ 1.1 ಮಿಲಿಯನ್) ಬಹುಮಾನದ ಮೊತ್ತದ ಅರ್ಧದಷ್ಟನ್ನು ಬೇಕರ್ಗೆ ನೀಡಲಾಗುವುದು. ಉಳಿದ ಅರ್ಧವನ್ನು ಹಸ್ಸಾಬಿಸ್ ಮತ್ತು ಜಂಪರ್ ನಡುವೆ ವಿಂಗಡಿಸಲಾಗುವುದು.
ಇದನ್ನೂ ಓದಿ: ಪಾಕಿಸ್ತಾನದಲ್ಲಿ 4 ಹೊಸ ಪೋಲಿಯೊ ಪ್ರಕರಣ ಪತ್ತೆ, 32ಕ್ಕೇರಿದ ಸಂಖ್ಯೆ
