2022ರ ಬ್ಲಾಕ್ಬಸ್ಟರ್ ಸಿನಿಮಾ 'ಆರ್ಆರ್ಆರ್' ಮೂಲಕ ಜಗತ್ತಿನಾದ್ಯಂತ ಜನಪ್ರಿಯತೆ ಸಂಪಾದಿಸಿರುವ ಸೌತ್ ಸೂಪರ್ ಸ್ಟಾರ್ ರಾಮ್ಚರಣ್ ಸದ್ಯ 'ಗೇಮ್ ಚೇಂಜರ್' ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಬಹುಬೇಡಿಕೆ ತಾರೆ ಮುಂದಿನ ಚಿತ್ರ 'ಆರ್ಸಿ 16'. ಇದು ತಾತ್ಕಾಲಿಕ ಶೀರ್ಷಿಕೆಯಷ್ಟೇ. ಈ ಚಿತ್ರಕ್ಕೆ 'ಪೆದ್ದಿ' (Peddi) ಎಂದು ಹೆಸರಿಡುವ ಸಾಧ್ಯತೆಗಳಿದ್ದು, ಅಧಿಕೃತ ಮಾಹಿತಿ ಶೀಘ್ರವೇ ಹೊರ ಬೀಳಲಿದೆ.
ಉಪ್ಪೇನಾ ಖ್ಯಾತಿಯ ಬುಚ್ಚಿ ಬಾಬು ಸನಾ ನಿರ್ದೇಶನದ 'ಆರ್ಸಿ 16' ಸುತ್ತ ಸಾಕಷ್ಟು ಕುತೂಹಲ ವ್ಯಕ್ತವಾಗಿದೆ. ಆದರೆ, ಚಿತ್ರ ತಯಾರಕರಿನ್ನೂ ಈ ಯೋಜನೆ ಬಗ್ಗೆ ಯಾವುದೇ ಹೆಚ್ಚಿನ ಮಾಹಿತಿ ಬಿಟ್ಟುಕೊಟ್ಟಿಲ್ಲ. ಅಪಾರ ಸಂಖ್ಯೆಯ ಅಭಿಮಾನಿಗಳು 'RC16'ರ ಅಧಿಕೃತ ಶೀರ್ಷಿಕೆ ಏನೆಂದು ತಿಳಿಯಲು ಕಾತರರಾಗಿದ್ದಾರೆ. ಚಿತ್ರದ ಸುತ್ತಲಿರುವ ಸದ್ಯದ ಮಾಹಿತಿ ಪ್ರಕಾರ, ಚಿತ್ರಕ್ಕೆ ಪೆದ್ದಿ ಎಂದು ಹೆಸರಿಸಲು ಯೋಜಿಸಿದ್ದಾರಂತೆ. ಯಾವುದಕ್ಕೂ ಅಧಿಕೃತ ಮಾಹಿತಿ ಬರಬೇಕಿದೆ.
ಈ ವಿಚಾರವನ್ನು ಅಧಿಕೃತವಾಗಿ ಘೋಷಣೆ ಮಾಡದಿದ್ದರೂ ಕೂಡ 'ಪೆದ್ದಿ' ಶೀರ್ಷಿಕೆ ಚಿತ್ರತಂಡಕ್ಕೆ ಹಿಡಿಸಿದೆಯಂತೆ. ಇತರ ಸಂಭವನೀಯ ಶೀರ್ಷಿಕೆಗಳ ಕಡೆಗೂ ಗಮನ ಹರಿಸಿದ್ದಾರೆ. ಅದಾಗ್ಯೂ, ಪೆದ್ದಿ 'RC16'ರ ಅಧಿಕೃತ ಶೀರ್ಷಿಕೆಯಾಗೋ ಸಾಧ್ಯತೆಗಳು ಹೆಚ್ಚಿವೆ. ಈ ಮೊದಲೇ ವರದಿ ಮಾಡಿದಂತೆ, ಇದೇ ಮಾರ್ಚ್ 20ರಂದು ಪೂಜಾ ಸಮಾರಂಭದೊಂದಿಗೆ ಈ ಬಹುನಿರೀಕ್ಷಿತ ಸಿನಿಮಾದ ಚಿತ್ರೀಕರಣ ಪ್ರಾರಂಭವಾಗುವ ಸಾಧ್ಯತೆ ಇದೆ. ಬಳಿಕ ಚಿತ್ರಕ್ಕೆ ಸಂಬಂಧಿಸಿದಂತೆ ಇನ್ನಷ್ಟು ಮಾಹಿತಿ ತಿಳಿದುಕೊಳ್ಳಬಹುದು. ಈ ಚಿತ್ರ ಸ್ಪೋರ್ಟ್ಸ್ ಡ್ರಾಮಾ ಆಗಲಿದೆ ಅನ್ನೋದಷ್ಟೇ ಸದ್ಯಕ್ಕಿರುವ ಮಾಹಿತಿ.
ಇದನ್ನೂ ಓದಿ: RC16: ರಾಮ್ ಚರಣ್ ಸಿನಿಮಾ ಸೆಟ್ಟೇರೋದು ಯಾವಾಗ? ಡೀಟೆಲ್ಸ್ ಇಲ್ಲಿದೆ
ಸಿನಿಮಾ ಸೆಟ್ಟೇರೋ ದಿನದಂದು ಅಧಿಕೃತ ಶೀರ್ಷಿಕೆ ಬಹಿರಂಗಗೊಳ್ಳುವ ನಿರೀಕ್ಷೆಯಿದೆ. ಅಂದು ಎಲ್ಲ ಊಹಾಪೋಹಗಳಿಗೆ ತೆರೆ ಬೀಳಲಿದೆ. ಮಾರ್ಚ್ 27ರಂದು ರಾಮ್ ಚರಣ್ 39ನೇ ಜನ್ಮದಿನ ಆಚರಿಸಿಕೊಳ್ಳಲಿದ್ದಾರೆ. ಹಾಗಾಗಿ ಮಾರ್ಚ್ 20ರ ಬದಲು 27ರಂದು ಟೈಟಲ್ ರಿವೀಲ್ ಮಾಡೋ ಸಾಧ್ಯತೆಗಳೂ ಸಹ ಇವೆ ಎಂದು ಚಿತ್ರತಂಡದ ಹತ್ತಿರದ ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: 'RCB'ಗಾಗಿ ಲಾಂಗ್ ಹಿಡಿದ ಶಿವಣ್ಣ: ಜಬರ್ದಸ್ತ್ ವಿಡಿಯೋ 'ಅರ್ಥ ಆಯ್ತಾ'?
ಬಾಲಿವುಡ್ ಬೆಡಗಿ ಜಾಹ್ನವಿ ಕಪೂರ್ ಇದೇ ಮೊದಲ ಬಾರಿ ರಾಮ್ ಚರಣ್ ಜೊತೆ ತೆರೆಹಂಚಿಕೊಳ್ಳುತ್ತಿದ್ದಾರೆ. ಜೂನಿಯರ್ ಎನ್‌ಟಿಆರ್ ಜೊತೆಗಿನ 'ದೇವರ' ಬಳಿಕ ಸೆಟ್ಟೇರುತ್ತಿರೋ ನಟಿಯ ಎರಡನೇ ತೆಲುಗು ಚಿತ್ರ. ಆರ್ಸಿ16ಗೆ ಎ ಆರ್ ರೆಹಮಾನ್ ಸಂಗೀತ ಸಂಯೋಜನೆ ಮಾಡಲಿದ್ದಾರೆ. ಅಲ್ಲದೇ ಶಿವರಾಜ್‌ಕುಮಾರ್ ಕೂಡ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಎಲ್ಲದರ ಹಿನ್ನೆಲೆ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ. ರಾಮ್ ಚರಣ್ ಸದ್ಯ ಗೇಮ್ ಚೇಂಜರ್ ಚಿತ್ರದಲ್ಲಿ ಬ್ಯುಸಿಯಾಗಿದ್ದು, ಈ ವರ್ಷವೇ ತೆರೆಕಾಣಲಿದೆ. ಕಿಯಾರಾ ಅಡ್ವಾಣಿ ಜೊತೆ ಆಂಧ್ರಪ್ರದೇಶದ ವಿಶಾಖಪಟ್ಟಣಂನಲ್ಲಿ ಚಿತ್ರೀಕರಣ ನಡೆಸುತ್ತಿದ್ದಾರೆ.
