ನವದೆಹಲಿ: ಇಂಟರ್ ನೆಟ್ ಬೆಲೆಗಳನ್ನು ನಿಯಂತ್ರಿಸುವಂತೆ ಕೋರಿ ಸಲ್ಲಿಸಲಾದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ಇಂದು (ಫೆಬ್ರವರಿ 24) ವಜಾಗೊಳಿಸಿದೆ. ಸಿಜೆಐ ಸಂಜೀವ್ ಖನ್ನಾ ಮತ್ತು ನ್ಯಾಯಮೂರ್ತಿ ಸಂಜಯ್ ಕುಮಾರ್ ಅವರ ನ್ಯಾಯಪೀಠವು ಅರ್ಜಿದಾರರಾದ ರಜತ್ ಎಂಬುವರು ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆ ನಡೆಸಿತು.
ಇಂಟರ್ ನೆಟ್ ಸೇವೆಗಳನ್ನು ಪಡೆಯಲು ಗ್ರಾಹಕರಿಗೆ ಹಲವಾರು ಆಯ್ಕೆಗಳಿವೆ ಎಂದು ಸಿಜೆಐ ಆರಂಭದಲ್ಲಿ ಗಮನ ಸೆಳೆದರು.
"ನಮ್ಮದು ಮುಕ್ತ ಮಾರುಕಟ್ಟೆಯಾಗಿದೆ. ದೇಶದಲ್ಲಿ ಲ್ಯಾನ್ ಇದೆ, ವೈರ್ಡ್ ಇಂಟರ್ ನೆಟ್ ಇದೆ, ಇತರ ಇಂಟರ್ ನೆಟ್ಗಳೂ ಇವೆ. ಬಿಎಸ್ಎನ್ಎಲ್ ಮತ್ತು ಎಂಟಿಎನ್ಎಲ್ ಸಹ ಇಂಟರ್ ನೆಟ್ ಸೇವೆ ನೀಡುತ್ತಿವೆ." ಎಂದು ಸಿಜೆಐ ಹೇಳಿದರು.
ಕೆಲ ಆಯ್ಕೆಗಳು ಲಭ್ಯವಿದ್ದರೂ ಮಾರುಕಟ್ಟೆಯ ಬಹುಪಾಲು ಭಾಗವು ಪ್ರಸ್ತುತ ಜಿಯೋ, ರಿಲಯನ್ಸ್ ಬಳಿ ಇದೆ ಎಂದು ಅರ್ಜಿದಾರರು ನ್ಯಾಯಾಲಯದ ಮುಂದೆ ಒತ್ತಿ ಹೇಳಿದರು. ಆದರೆ ನ್ಯಾಯಾಲಯ ಅರ್ಜಿದಾರರ ವಾದವನ್ನು ಒಪ್ಪಲಿಲ್ಲ.
"ನೀವು ಏಕಸ್ವಾಮ್ಯದ ಬಗ್ಗೆ ಆರೋಪ ಮಾಡುತ್ತಿದ್ದರೆ, ಭಾರತೀಯ ಸ್ಪರ್ಧಾ ಆಯೋಗಕ್ಕೆ ದೂರು ನೀಡಿ" ಎಂದು ನ್ಯಾಯಪೀಠ ಅರ್ಜಿದಾರರಿಗೆ ಸಲಹೆ ನೀಡಿತು. ಅಲ್ಲದೇ ಪರ್ಯಾಯ ಶಾಸನಬದ್ಧ ಪರಿಹಾರಗಳನ್ನು ಪಡೆಯಲು ನ್ಯಾಯಾಲಯವು ಅರ್ಜಿದಾರರಿಗೆ ಸ್ವಾತಂತ್ರ್ಯವನ್ನು ನೀಡಿತು.
ಇದನ್ನೂ ಓದಿ : ರಾಜ್ಯದಲ್ಲೂ ಕಿರು ಆಹಾರ ಸಂಸ್ಕರಣಾ ಉದ್ದಿಮೆಗಳ ಅಭಿವೃದ್ಧಿ : ಸರ್ಕಾರದಿಂದ ಸಿಗುತ್ತೆ ಸಹಾಯಧನ - SMALL FOOD PROCESSING ENTERPRISES
