'ರಾಮಾಯಣ' ನಾಟಕದ ವೇಳೆ ವೇದಿಕೆಯಲ್ಲೇ ಜೀವಂತ ಹಂದಿ ಕೊಂದು ಮಾಂಸ ಭಕ್ಷಿಸಿದ ರಾಕ್ಷಸ ಪಾತ್ರಧಾರಿ!

ರಾಮಾಯಣ ಕಥಾಹಂದರದ ನಾಟಕದ ವೇಳೆ ರಾಕ್ಷಸ ಪಾತ್ರಧಾರಿಯೊಬ್ಬ ವೇದಿಕೆ ಮೇಲೆ ಜೀವಂತ ಹಂದಿಯನ್ನು ಕೊಂದು, ಅದರ ಮಾಂಸ ತಿಂದ ಭಯಾನಕ ಘಟನೆ ಒಡಿಶಾದಲ್ಲಿ ನಡೆದಿದೆ.

ಗಂಜಾಮ್​(ಒಡಿಶಾ): ರಾಮಾಯಣ ಆದರ್ಶ ಮಹಾಕಾವ್ಯ. ಸಮಾಜದ ಅಂಕುಡೊಂಕುಗಳನ್ನು ತಿದ್ದುವ ನೀತಿ ಪಾಠಗಳು ಅದರಲ್ಲಿವೆ. ಇಂತಹ ಮಹಾನ್​ ತಿರುಳಿನ ನಾಟಕದ ವೇಳೆ ಪಾತ್ರಧಾರಿಯೊಬ್ಬ ಹಂದಿಯನ್ನು ವೇದಿಕೆ ಮೇಲೆಯೇ ಕೊಂದು, ಹಸಿ ಮಾಂಸವನ್ನು ಭಕ್ಷಿಸಿದ ಆಘಾತಕಾರಿ ಘಟನೆ ಒಡಿಶಾದ ಗಂಜಾಮ್​ ಜಿಲ್ಲೆಯಲ್ಲಿ ನಡೆದಿದೆ.

ಗಂಜಾಂ ಜಿಲ್ಲೆಯ ರಾಲಾಬ್ ಗ್ರಾಮದಲ್ಲಿ ನವೆಂಬರ್​ 25ರಂದು ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ‘ರಾಮಾಯಣ ನಾಟಕ’ದ ವೇದಿಕೆಯಲ್ಲಿ ಜೀವಂತ ಹಂದಿಯನ್ನು ಕೊಂದು ತಿಂದಿದ್ದಲ್ಲದೇ, ಹಾವಿಗೆ ಕಿರುಕುಳ ನೀಡಲಾಗಿದೆ. ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಇದು ಪ್ರಾಣಿ ಪ್ರೇಮಿಗಳ ಕೆಂಗಣ್ಣಿಗೆ ಗುರಿಯಾಗಿದೆ.

ಘಟನೆಯ ವಿವರ: ರಾಲಾಬ್ ಗ್ರಾಮದಲ್ಲಿ ರಾಮಾಯಣ ಕಥಾಹಂದರದ ನಾಟಕ ನಡೆಯುತ್ತಿತ್ತು. ಈ ವೇಳೆ ರಾಕ್ಷಸ ಪಾತ್ರಧಾರಿಯೊಬ್ಬ ಕಥಾವಸ್ತುವಾಗಿ ತಂದಿದ್ದ ಜೀವಂತ ಹಂದಿಯನ್ನು ವೇದಿಕೆ ಮೇಲೆಯೇ ಕೊಂದು, ಅದರ ಮಾಂಸವನ್ನು ಭಕ್ಷಿಸಿದ್ದಾನೆ. ಇದನ್ನು ಕತೆಯ ಗಾಢತೆ, ಪ್ರಭಾವ ಹೆಚ್ಚಿಸಲು ಮಾಡಲಾಗಿತ್ತು. ಆದರೆ, ರಾಕ್ಷಸ ಪಾತ್ರಧಾರಿಯ ಈ 'ರಾಕ್ಷಸೀತನ' ವೀಕ್ಷಕರಲ್ಲಿ ಗಾಬರಿ ಹುಟ್ಟಿಸಿದೆ.

ಬಳಿಕ ಕಲಾವಿದ ಹಾವಿನ ಜೊತೆ ಆಟವಾಡಿದ್ದಾನೆ. ಈ ಭಯಾನಕ ದೃಶ್ಯಗಳ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ವಿರೋಧ ವ್ಯಕ್ತವಾಗಿದೆ. ಪ್ರಾಣಿಪ್ರಿಯರು ಮತ್ತು ಪ್ರಾಣಿ ದಯಾ ಸಂಘ ನಾಟಕಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಕಲಾವಿದ, ನಿರ್ದೇಶಕನ ಬಂಧನ: ಜೀವಂತ ಹಂದಿಯನ್ನು ಕೊಂದು ತಿಂದು, ವೇದಿಕೆಯ ಮೇಲೆ ವಿಷಕಾರಿ ಹಾವಿಗೆ ನೋವುಂಟು ಮಾಡಿದ ದೃಶ್ಯ ಹೊರಬಿದ್ದ ಬಳಿಕ ಇದರ ವಿರುದ್ಧ ಪ್ರಾಣಿ ಹಿಂಸೆ ಮತ್ತು ವನ್ಯಜೀವಿ ಕಾಯ್ದೆ ಉಲ್ಲಂಘನೆಯಡಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ರಾಕ್ಷಸ ಪಾತ್ರಧಾರಿ ಮತ್ತು ನಿರ್ದೇಶಕನನ್ನು ಬಂಧಿಸಲಾಗಿದೆ. ಈ ಕುರಿತು ಪೊಲೀಸರು ಮತ್ತು ಅರಣ್ಯ ಇಲಾಖೆ ಜಂಟಿ ತನಿಖೆ ಆರಂಭಿಸಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬರ್ಹಾಂಪುರದ ಪ್ರಾದೇಶಿಕ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಸಂಜಯ್ ಕುಮಾರ್, "ನಾಟಕದ ವೇಳೆ ಹಂದಿಯನ್ನು ಕೊಂದು, ಹಾವಿಗೆ ನೋವುಂಟು ಮಾಡಲಾಗಿದೆ. ಪ್ರಾಣಿ ಹಿಂಸೆ ಮತ್ತು ವನ್ಯಜೀವಿ ಕಾಯ್ದೆಯಡಿ ಆರೋಪಿಗಳನ್ನು ಬಂಧಿಸಲಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿರುವ ದೃಶ್ಯಾವಳಿಗಳನ್ನು ಪರಿಶೀಲಿಸಲಾಗುತ್ತಿದೆ. ಈ ಕುರಿತು ತನಿಖೆ ನಡೆಯುತ್ತಿದ್ದು, ತಪ್ಪಿತಸ್ಥರಿಗೆ ಶಿಕ್ಷೆಯಾಗಲಿದೆ" ಎಂದು ಅವರು ಭರವಸೆ ನೀಡಿದರು.

ಇದನ್ನೂ ಓದಿ: ಮಧ್ಯ ಪ್ರದೇಶ: ರತಪಾನಿ ಅರಣ್ಯ ಪ್ರದೇಶ ದೇಶದ 57ನೇ ಹುಲಿ ಸಂರಕ್ಷಣಾ ವಲಯವಾಗಿ ಘೋಷಣೆ