ಅತಿ ವೇಗ, ಅಜಾಗರೂಕತೆಯೇ ಒಆರ್​ಆರ್​ನಲ್ಲಿ ಅಪಘಾತ ಹೆಚ್ಚಳಕ್ಕೆ ಕಾರಣ: ಈ ಸ್ಪೀಡೇ ಯುವ ಶಾಸಕಿ ಜೀವಕ್ಕೆ ಎರವಾಯ್ತೇ?

ಯುವ ಶಾಸಕಿ ಲಾಸ್ಯಾ ನಂದಿತಾ ಸಾವಿನ ಬೆನ್ನಲ್ಲೇ ಇದೀಗ ಹೈದರಾಬಾದ್​ ಹೊರ ವರ್ತುಲ ರಸ್ತೆಯ ಅತಿವೇಗದ ವಾಹನ ಚಾಲನೆ ವಿಚಾರ ಚರ್ಚೆಗೆ ಬಂದಿದೆ.

ಹೈದರಾಬಾದ್​: ಬೆಳೆಯುತ್ತಿರುವ ನಗರ, ವಾಹನಗಳ ಸಂಖ್ಯೆಯ ಅಗತ್ಯತೆಯನ್ನು ಗಮನದಲ್ಲಿರಿಸಿಕೊಂಡು ಅತ್ಯಾಧುನಿಕವಾಗಿ ನಿರ್ಮಿಸಲಾಗಿರುವ ಹೈದರಾಬಾದ್​ ಹೊರ ವರ್ತುಲ ರಸ್ತೆ (ಒಆರ್​ಆರ್​​) ಪ್ರಯಾಣಿಕರಿಗೆ ಮಾರಕವಾಗಿ ಪರಿಣಮಿಸುತ್ತಿದೆ. ಅತಿ ವೇಗದ ರಸ್ತೆಯಲ್ಲಿ ವಾಹನಗಳ ಸಂಖ್ಯೆ ಹೆಚ್ಚಿದ್ದು, ಅಪಾಯ ಕೂಡ ಹೆಚ್ಚಿದೆ. ಇದರಿಂದ ಕ್ಷಣಾರ್ಧದಲ್ಲಿ ಸಾವುಗಳು ಸಂಭವಿಸುತ್ತಿವೆ. ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದಾಗ 2023ರಲ್ಲಿ ಅಪಘಾತದ ದರ ಶೇ 127ರಷ್ಟು ಹೆಚ್ಚಿದೆ. ಇದೀಗ ಕಂಟೋನ್ಮೆಟ್​ ಶಾಸಕಿ ಲಾಸ್ಯಾ ನಂದಿತಾ ಸಾವಿನ ಹಿನ್ನೆಲೆ ಇದೀಗ ಮತ್ತೆ ಒಆರ್​ಆರ್​​ ಚರ್ಚೆ ಮುನ್ನಲೆಗೆ ಬಂದಿದೆ.

ನಿತ್ಯ 1.5 ಲಕ್ಷ ವಾಹನ: ಹೈದರಾಬಾದ್​​ ಸುತ್ತ 158 ಕಿ.ಮೀ ಉದ್ದದ ಒಆರ್​ಆರ್​ ನಿರ್ಮಿಸಲಾಗಿದ್ದು, ಇದು ಸಂಪೂರ್ಣ ರಾಜ್ಯದ ಬೆನ್ನೆಲುಬು ಆಗಿದೆ. ಈ ರಸ್ತೆಯಲ್ಲಿ ವಾಹನಗಳು ರಾಜ್ಯದ ಇತರ 8 ಲೇನ್​ ರಸ್ತೆಗಳಿಗಿಂತ ವೇಗವಾಗಿ ಅಂದರೆ ಗಂಟೆಗೆ 120 ಕಿ.ಮೀ ವೇಗದಲ್ಲಿ ಸಾಗುತ್ತದೆ. ನಿತ್ಯ 1.5 ಲಕ್ಷ ವಾಹನಗಳ ಸಂಚರಿಸುತ್ತದೆ. ಅನೇಕ ಮಂದಿ ಅತಿ ವೇಗ ಮತ್ತು ಅಜಾಗರೂಕತೆಯಿಂದಾಗಿ ಚಲಿಸುವುದರಿಂದ ಇಲ್ಲಿ ಅಪಘಾತಗಳ ಸಂಖ್ಯೆ ಹೆಚ್ಚಿದೆ.

ಜೀವ ತೆಗೆದುಕೊಳ್ಳುವ ವೇಗ: ಒಆರ್​ಆರ್​ನಲ್ಲಿ ಅಪಘಾತವಾಗುವುದಕ್ಕೆ ಮುಖ್ಯ ಕಾರಣ ಅತಿಯಾದ ವೇಗವಾಗಿದೆ. ಇಲ್ಲಿ ಹೆಚ್ಚು ಎಂದರೆ ಗಂಟೆಗೆ 120 ಕಿ.ಮೀ ವೇಗದಲ್ಲಿ ಸಂಚರಿಸಬಹುದು. ಆದರೆ, ಇಲ್ಲಿ 140-150 ಕಿ.ಮೀ ವೇಗದಲ್ಲಿ ವಾಹನಗಳು ಸಾಗುತ್ತಿವೆ ಎಂದು ಪೊಲೀಸರು ತಿಳಿಸುತ್ತಾರೆ. 200 ಕಿ.ಮೀ ವೇಗದಲ್ಲಿ ವಾಹನಗಳು ಚಲಿಸಿರುವುದು ಕೂಡಾ ಪತ್ತೆಯಾಗಿದೆ ಅಂತಾರೆ ಪೊಲೀಸರು. ಇಷ್ಟು ವೇಗವಾಗಿ ವಾಹನಗಳು ಹೋಗುತ್ತಿದ್ದಾಗ ತುರ್ತು ಸಂದರ್ಭದಲ್ಲಿ ಅದನ್ನು ನಿಯಂತ್ರಿಸುವುದು ಕಷ್ಟವಾಗುತ್ತದೆ. ಶಾಸಕಿ ಲಾಸ್ಯ ನಂದಿತಾ ಸಾವಿಗೂ ಇದೇ ವೇಗವೇ ಕಾರಣವಾಗಿದೆ. ಈ ರಸ್ತೆಯಲ್ಲಿ ಅಪಘಾತ ಮತ್ತು ಸಾವು ಹೆಚ್ಚುತ್ತಿರುವುದು ನಿಜಕ್ಕೂ ಕಾಳಜಿ ವಿಚಾರವಾಗಿದೆ. 2022ರಲ್ಲಿ ಈ ಒಆರ್​ಆರ್​ನಲ್ಲಿ 170 ಮಂದಿ ಸಾವನ್ನಪ್ಪಿದರೆ, 2023ರಲ್ಲಿ 216 ಮಂದಿ ಸಾವನ್ನಪ್ಪಿದ್ದಾರೆ.

ಇತರ ಕಾರಣ: ಒಆರ್​ಆರ್​ ನಿರ್ಮಾಣದ ವೇಳೆ ಅನೇಕ ರಾಜಕೀಯನ ನಾಯಕರು ತಮ್ಮ ಭೂಮಿ ರಕ್ಷಣೆ ಮಾಡುವ ಉದ್ದೇಶದಿಂದ ಈ ಯೋಜನೆಯಲ್ಲಿ 100 ಕ್ಕೂ ಹೆಚ್ಚು ಬಾರಿ ಬದಲಾವಣೆ ಮಾಡಿದ್ದಾರೆ. ಇದರ ಪರಿಣಾಮವಾಗಿ ರಸ್ತೆಯಲ್ಲಿ ಅನೇಕ ತಿರುವುಗಳು ಇದೆ. ಇಂತಹ ತಿರುವಿನಲ್ಲಿ ಅನೇಕ ಮೋಟರ್​ಸೈಕಲ್​ಗಳು ತಮ್ಮ ನಿಯಂತ್ರಣ ಕಳೆದುಕೊಳ್ಳುತ್ತಿವೆ. ಇದರಿಂದ ಅನೇಕ ಮಂದಿ ಜೀವ ಕಳೆದುಕೊಳ್ಳುತ್ತಿದ್ದಾರೆ.

ಒಆರ್​ಆರ್​ನ ಒಂದು ಬದಿಯಲ್ಲಿ ನಾಲ್ಕು ಮತ್ತೊಂದು ಬದಿಯಲ್ಲಿ ನಾಲ್ಕು ಸಾಲುಗಳಿವೆ. ಮತ್ತೊಂದೆಡೆ ಮೊದಲ ಎರಡು ಸಾಲಿನಲ್ಲಿ ವಾಹನಗಳು 120 ಕಿ.ಮೀ ವೇಗದಲ್ಲಿ ಚಲಿಸುತ್ತಿದ್ದರೆ, ನಂತರದ ಎರಡು ಸಾಲಿನಲ್ಲಿ 80 ಕಿ.ಮೀ ವೇಗದಲ್ಲಿ ಸಂಚರಿಸುತ್ತವೆ. ಅನೇಕ ಬಾರಿ ಈ ಸಾಲುಗಳಿಂದ ಗೊಂದಲವಾಗಿ ಕೂಡಾ ಅಪಘಾತವಾದ ಉದಾಹರಣೆಗಳಿವೆ. 120 ಕಿ.ಮೀ ವೇಗದಲ್ಲಿ ಸಾಗುವ ಲೇನ್​​ನ​ ವಾಹನಗಳು 80 ಕಿ.ಮೀ ವೇಗದ ಲೇನ್​ಗೆ ಬಂದಾಗ ಅದು ಬೇರೆ ವಾಹನಗಳಿಗೆ ಗುದ್ದುತ್ತದೆ. ಇದರಿಂದ ಅಪಘಾತ ಉಂಟಾಗುತ್ತದೆ. 80 ಕಿ.ಮೀ ಸಾಲಿನಲ್ಲಿ ಲಾರಿಗಳು ಸಾಗುತ್ತಿರುತ್ತವೆ. ಕೆಲವು 120 ಕಿ.ಮೀ ವೇಗದ ವಾಹನಗಳು ಬಂದಾಗ ಲಾರಿಗಳು ಬ್ರೇಕ್​ ಹಾಕುವುದರಿಂದಲೂ ಆ್ಯಕ್ಸಿಡೆಂಟ್​ಗಳು ಆಗುತ್ತವೆ.

ಕೆಲವು ಜನರು ಗಚಿಬೌಲಿಯಿಂದ ಶಂಶಾಬಾದ್ ವಿಮಾನ ನಿಲ್ದಾಣಕ್ಕೆ ಓಆರ್‌ಆರ್‌ನಲ್ಲಿ ವೇಗವಾಗಿ ವಾಹನಗಳನ್ನು ಚಲಾಯಿಸಿ ಅಪಘಾತ ಉಂಟಾಗುತ್ತದೆ. ಕೆಲವೆಡೆ ಸಿಗ್ನಲ್ ವ್ಯವಸ್ಥೆ ಬಳಸದೇ ಸರ್ವಿಸ್ ರಸ್ತೆಯಿಂದ ಒಆರ್​ಆರ್ ಗೆ ಬರುವ ವಾಹನಗಳಿಂದ ಮತ್ತು ಚಾಲಕರ ನಿದ್ರಾಹೀನತೆಯಿಂದ ಅಪಘಾತಗಳೂ ಸಂಭವಿಸುತ್ತಿವೆ. ಅಷ್ಟೇ ಅಲ್ಲದೇ, ಒಆರ್​​ಆರ್​ನಲ್ಲಿ ರಸ್ತೆ ಬದಿ ಮರ ಕತ್ತರಿಸುವಾಗಲೂ ಸರಿಯಾದ ಮುನ್ನೆಚ್ಚರಿಕೆ ವಹಿಸುತ್ತಿಲ್ಲ ಜೊತೆಗೆ ರಸ್ತೆ ಬದಿಯಲ್ಲಿ ವಾಹನ ನಿಲ್ಲಿಸುವುದು ಅನೇಕ ವೇಳೆ ಅಪಘಾತಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ: ಭೀಕರ ಅಪಘಾತದಲ್ಲಿ ಯುವ ಶಾಸಕಿ ಲಾಸ್ಯ ನಂದಿತಾ ಸಾವು: ಸಿಎಂ, ಬಿಆರ್‌ಎಸ್ ನಾಯಕರು ಸೇರಿ ಹಲವರಿಂದ ಸಂತಾಪ