ನವದೆಹಲಿ: ಭಾರತದ ನ್ಯಾಯಾಂಗ ವ್ಯವಸ್ಥೆಯ ವೇಗ ಕಡಿಮೆ ಎಂಬ ಅಪಸ್ವರಕ್ಕೆ ಇಂಬು ನೀಡುವಂತ ಅಚ್ಚರಿಯ ಅಂಶವೊಂದು ಹೊರಬಿದ್ದಿದೆ. ದೇಶದ ವಿವಿಧ ಹೈಕೋರ್ಟ್ಗಳಲ್ಲಿ 30 ವರ್ಷಕ್ಕಿಂತ ಹಳೆಯದಾದ 62 ಸಾವಿರಕ್ಕೂ ಅಧಿಕ ಕೇಸ್ಗಳು ಇನ್ನೂ ವಿಲೇವಾರಿಯಾಗಿಲ್ಲ. 1952 ರಲ್ಲಿ ದಾಖಲಾದ ಮೂರು ಪ್ರಕರಣಗಳು ಈವರೆಗೂ ಚುಕ್ತಾ ಆಗಿಲ್ಲ. ಅಂದರೆ, 72 ವರ್ಷಗಳಿಂದ ಅವು ಬಾಕಿ ಉಳಿದುಕೊಂಡಿದೆ.
ಇಂಥದ್ದೊಂದು ಅಂಶವು ರಾಷ್ಟ್ರೀಯ ನ್ಯಾಯಾಂಗ ದತ್ತಾಂಶ ಗ್ರಿಡ್ (ಎನ್ಜೆಡಿಜಿ) ವರದಿಯಲ್ಲಿದೆ. ಹೈಕೋರ್ಟ್ಗಳಲ್ಲಿ ಅತ್ಯಂತ ಹಳೆಯ ಪ್ರಕರಣಗಳು ಅಂತ್ಯಕಂಡಿಲ್ಲ ಎಂಬುದನ್ನು ಅದರಲ್ಲಿ ವಿವರಿಸಲಾಗಿದೆ. 1952 ರಿಂದ ಮೂರು ದಾವೆಗಳು ವಿಲೇವಾರಿಗೆ ಕಾಯುತ್ತಿವೆ. 1954 ರಿಂದ ನಾಲ್ಕು, 1955 ರಿಂದ ಒಂಬತ್ತು ಕೇಸ್ಗಳು ಹೈಕೋರ್ಟ್ಗಳಲ್ಲಿ ಕೊಳೆಯುತ್ತಿವೆ ಎಂದು ವರದಿ ಹೇಳಿದೆ.
1952 ರಿಂದ ಬಾಕಿ ಉಳಿದಿರುವ ಮೂರು ಪ್ರಕರಣಗಳ ಪೈಕಿ ಎರಡು ಪಶ್ಚಿಮ ಬಂಗಾಳದ ಕೋಲ್ಕತ್ತಾ ಹೈಕೋರ್ಟ್‌ನಲ್ಲಿ ಮತ್ತು ಇನ್ನೊಂದು ಮದ್ರಾಸ್ ಹೈಕೋರ್ಟ್‌ನಲ್ಲಿ ಇತ್ಯರ್ಥವಾಗದೆ ಉಳಿದಿದೆ. ಹೈಕೋರ್ಟ್ಗಳಲ್ಲಿ ಬಾಕಿ ಉಳಿದಿರುವ ಒಟ್ಟು 58.59 ಲಕ್ಷ ಪ್ರಕರಣಗಳ ಪೈಕಿ 42.64 ಲಕ್ಷ ಸಿವಿಲ್ ಕೇಸ್ ಆಗಿದ್ದರೆ, 15.94 ಲಕ್ಷ ಕ್ರಿಮಿನಲ್ ಪ್ರಕರಣಗಳಾಗಿವೆ. 20 ರಿಂದ 30 ವರ್ಷಗಳಷ್ಟು ಹಳೆಯದಾದ ಸುಮಾರು 2.45 ಲಕ್ಷ ಪ್ರಕರಣಗಳು ಹೈಕೋರ್ಟ್ಗಳಲ್ಲಿ ಬಾಕಿ ಉಳಿದಿವೆ ಎಂದು ರಾಷ್ಟ್ರೀಯ ನ್ಯಾಯಾಂಗ ದತ್ತಾಂಶ ಗ್ರಿಡ್ ತಿಳಿಸಿದೆ.
ಮುಂದೂಡಿಕೆಗೆ ರಾಷ್ಟ್ರಪತಿ ಬೇಸರ: ಇತ್ತೀಚೆಗೆ ನಡೆದ ಕಾರ್ಯಕ್ರಮದಲ್ಲಿ ನ್ಯಾಯಾಂಗ ವ್ಯವಸ್ಥೆಯ ನಿಧಾನಗತಿಯ ಬಗ್ಗೆ ಮಾತನಾಡಿದ್ದ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು, ಕೋರ್ಟ್ಗಳಲ್ಲಿ ಪ್ರಕರಣಗಳನ್ನು ಮುಂದೂಡುವ ಸಂಸ್ಕೃತಿಯನ್ನು ಬದಲಿಸಬೇಕಿದೆ. ದೀರ್ಘಕಾಲದಿಂದ ಬಾಕಿ ಉಳಿದ ಪ್ರಕರಣಗಳ ವಿಲೇವಾರಿ ದೊಡ್ಡ ಸವಾಲಾಗಿದೆ. ಈ ಸಮಸ್ಯೆಗೆ ನ್ಯಾಯಾಲಯಗಳು ಮತ್ತು ಕಾನೂನು ಇಲಾಖೆ ಪರಿಹಾರ ಕಂಡುಕೊಳ್ಳಬೇಕಿದೆ. ಕೇಸ್ಗಳ ವಿಚಾರಣೆಯ ವೇಳೆ ಮುಂದೂಡುವ ಪದ್ಧತಿಯಲ್ಲಿ ಮಾರ್ಪಾಡಾಗಬೇಕಿದೆ ಎಂದು ಹೇಳಿದ್ದರು.
ಕಾನೂನು ಸಚಿವ ಅರ್ಜುನ್ ರಾಮ್ ಮೇಘವಾಲ್ ಮಾತನಾಡಿ, ದೇಶದ ನ್ಯಾಯಾಲಯಗಳು ದಿನಾಂಕದ ಬಳಿಕ ದಿನಾಂಕ ಪದ್ಧತಿಯನ್ನು ಅನುಸರಿಸುತ್ತವೆ. 20 ರಿಂದ 30 ವರ್ಷಗಳ ಕಾಲ ಬಾಕಿ ಉಳಿದಿರುವ ಪ್ರಕರಣಗಳಿವೆ. ದೂರುದಾರರು, ಕಕ್ಷಿದಾರರ ಹಾಜರಾತಿ ಕೊರತೆಯಿಂದಾಗಿ ಪ್ರಕರಣಗಳು ಹಾಗೆಯೇ ಉಳಿದುಕೊಳ್ಳುತ್ತಿವೆ. ಬಾಕಿ ಕೇಸ್ಗಳಲ್ಲಿ ಶೇ.25ರಿಂದ 30ರಷ್ಟನ್ನು ಒಂದೇ ಹಂತದಲ್ಲಿ ಚುಕ್ತಾ ಮಾಡಬೇಕಿದೆ ಎಂದರು.
ಜಿಲ್ಲಾ ನ್ಯಾಯಾಲಯಗಳು, ಹೈಕೋರ್ಟ್‌ಗಳು ಮತ್ತು ಸುಪ್ರೀಂ ಕೋರ್ಟ್ ಸೇರಿದಂತೆ ದೇಶದ ಎಲ್ಲ ಸ್ತರದ ನ್ಯಾಯಾಲಯಗಳಲ್ಲಿ 5 ಕೋಟಿಗೂ ಹೆಚ್ಚು ಪ್ರಕರಣಗಳು ಬಾಕಿ ಉಳಿದಿವೆ.
ಇದನ್ನೂ ಓದಿ: 6,900 ಸಿಬಿಐ ಪ್ರಕರಣಗಳು ವಿಚಾರಣೆಗೆ ಬಾಕಿ: 361 ಕೇಸ್ 20 ವರ್ಷ ಹಳೆಯವು! - CBI Cases Pending Trial
