ಸೋಲಾಪುರ (ಮಹಾರಾಷ್ಟ್ರ): ಉಜನಿ ಅಣೆಕಟ್ಟೆಯಲ್ಲಿ ಪ್ರಯಾಣಿಕರನ್ನು ಹೊತ್ತೊಯ್ಯುತ್ತಿದ್ದ ದೋಣಿಯೊಂದು ಮಗುಚಿ ಬಿದ್ದಿದ್ದು, ಭಾರಿ ದುರಂತ ಸಂಭವಿಸಿದೆ. ಆರು ಮಂದಿ ಪ್ರಯಾಣಿಕರು ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದಾರೆ. ಇದರಲ್ಲಿ ಇಬ್ಬರು ಮಕ್ಕಳು ಸೇರಿದ್ದಾರೆ. ಅಣೆಕಟ್ಟೆಯಲ್ಲಿ ಮುಳುಗಿದ ಆರು ಜನರ ಪತ್ತೆಗಾಗಿ ರಾತ್ರಿಯಿಡೀ ಶೋಧ ಕಾರ್ಯಾಚರಣೆ ಮುಂದುವರೆದಿತ್ತು.
ಸತತ ಎರಡನೇ ದಿನವೂ ಇಂದು ಶೋಧ ಕಾರ್ಯ ನಡೆಯುತ್ತಿದೆ. ಪೊಲೀಸ್ ಸಬ್ಇನ್ಸ್ ಪೆಕ್ಟರ್ ರಾಹುಲ್ ಡೋಂಗ್ರೆ ದೋಣಿಯಲ್ಲಿದ್ದರು. ಬೋಟ್ ಮಗುಚಿ ಬಿದ್ದ ನಂತರ ನೀರಿನಲ್ಲಿ ಈಜಿ ದಡ ಸೇರಿ ತಮ್ಮ ಪ್ರಾಣ ಉಳಿಸಿಕೊಂಡರು. ದೋಣಿಯಲ್ಲಿ ಬದುಕುಳಿದ ಯುವ ಪೊಲೀಸ್ ಅಧಿಕಾರಿ ಗ್ರಾಮಸ್ಥರು ಮತ್ತು ಸ್ಥಳೀಯ ಆಡಳಿತಕ್ಕೆ ಮಾಹಿತಿ ನೀಡಿದ ನಂತರ ಘಟನೆ ಬೆಳಕಿಗೆ ಬಂದಿದೆ.
ಇಬ್ಬರು ಮಕ್ಕಳು ಸೇರಿದಂತೆ ಆರು ಜನ ಸಾವು: ಉಜನಿ ಅಣೆಕಟ್ಟೆಯಲ್ಲಿ ಮುಳುಗಿದ ಪೊಲೀಸ್ ಅಧಿಕಾರಿ ಪವಾಡಸದೃಶವಾಗಿ ಬದುಕುಳಿದಿದ್ದಾರೆ. ಡ್ಯಾಂನ ನೀರಿನಲ್ಲಿ ದೋಣಿ ಮುಳುಗಿದೆ ಎಂದು ಅವರು ಮಾಹಿತಿ ನೀಡಿದಾಗ ಪ್ರಕರಣ ಬೆಳಕಿಗೆ ಬಂದಿದೆ. ನಂತರ ಸೋಲಾಪುರ ಮತ್ತು ಪುಣೆ ಜಿಲ್ಲೆಗಳ ಆಡಳಿತಗಳು ಉಜನಿ ಡ್ಯಾಂನಲ್ಲಿ ಮಂಗಳವಾರ ಸಂಜೆಯಿಂದ ಪ್ರಯಾಣಿಕರಿಗಾಗಿ ಹುಡುಕಾಟ ನಡೆಸುತ್ತಿವೆ. ಮೃತರನ್ನು ಗೋಕುಲ್ ದತ್ತಾತ್ರೆ ಜಾಧವ್ (ವಯಸ್ಸು.30), ಕೋಮಲ್ ಗೋಕುಲ್ ಜಾಧವ್ (ವಯಸ್ಸು 25), ಶುಭಂ ಗೋಕುಲ್ ಜಾಧವ್ (ವಯಸ್ಸು 1.5 ವರ್ಷ), ಮಹಿ ಗೋಕುಲ್ ಜಾಧವ್ (ವಯಸ್ಸು 3), ಕುಗಾಂವ್ ನಿವಾಸಿಗಳಾದ ಅನುರಾಗ್ ಅವಗಡೆ (35 ವರ್ಷ) ಮತ್ತು ಗೌರವ್ ಡೋಂಗ್ರೆ (16 ವರ್ಷ) ಎಂದು ಗುರುತಿಸಲಾಗಿದೆ.
ಬಲವಾದ ಗಾಳಿಗೆ ಮಗುಚಿದ ದೋಣಿ: ಸೋಲಾಪುರ ಮತ್ತು ಪುಣೆ ಜಿಲ್ಲೆಗಳ ಉಜನಿ ಅಣೆಕಟ್ಟಿನಲ್ಲಿ ಸೋಲಾಪುರ ಜಿಲ್ಲೆಯ ಕುಗಾಂವ್ ಗ್ರಾಮ ಮತ್ತು ಪುಣೆ ಜಿಲ್ಲೆಯ ಕಲಾಶಿ ಗ್ರಾಮದ ನಡುವೆ ಪ್ರಯಾಣಿಕ ದೋಣಿ ಮುಳುಗಿದೆ. ಗಾಳಿಯ ರಭಸಕ್ಕೆ ಪ್ರಯಾಣಿಕ ದೋಣಿ ಮಗುಚಿ ಬಿದ್ದಿದೆ. ಕರ್ಮಲಾ ತಾಲೂಕಿನ ಜರ್ರೆ ಮೂಲದ ಪತಿ ಮತ್ತು ಪತ್ನಿ ಮತ್ತು ಅವರ ಇಬ್ಬರು ಮಕ್ಕಳು ಮತ್ತು ಇಬ್ಬರು ಕುಗಾಂವ್ ನಿವಾಸಿಗಳು ಸೇರಿ ಒಟ್ಟು ಆರು ಜನರು ಅಪಘಾತದಲ್ಲಿ ಸಾವನ್ನಪ್ಪಿದ್ದಾರೆ.
ಸೋಲಾಪುರ ಜಿಲ್ಲೆಯ ಕರ್ಮಲಾ ತಾಲೂಕಿನ ಕುಗಾಂವದಿಂದ ಇಂದಾಪುರ ತಾಲೂಕಿನ ಕಳಶಿ ಗ್ರಾಮಕ್ಕೆ ದೋಣಿ ಹೋಗುತ್ತಿತ್ತು. ದೋಣಿಯಲ್ಲಿ ಕುಗಾಂವ್ ಮತ್ತು ಜರ್ರೆದಿಂದ ಒಟ್ಟು ಏಳು ಪ್ರಯಾಣಿಕರಿದ್ದರು. ಅಣೆಕಟ್ಟೆಯಿಂದ ಇಂದಾಪುರಕ್ಕೆ ದೋಣಿ ಹೋಗುತ್ತಿದ್ದಾಗ ಜೋರಾಗಿ ಗಾಳಿ ಬೀಸಿತ್ತು. ಗಾಳಿಯ ರಭಸಕ್ಕೆ ದೋಣಿ ನೀರಿನಲ್ಲಿ ಮುಳುಗಿತು. ಈ ಮಾರ್ಗದಲ್ಲಿ ದೋಣಿಯ ಮೂಲಕ ಪ್ರಯಾಣಿಕರನ್ನು ಪ್ರತಿದಿನ ಸಾಗಿಸಲಾಗುತ್ತದೆ. ಸಾಮಾನ್ಯವಾಗಿ ಈ ದೋಣಿ ದಿನಕ್ಕೆ 10 ರಿಂದ 15 ಟ್ರಿಪ್ಗಳ ಸಂಚಾರ ನಡೆಸುತ್ತದೆ. ಆದರೆ, ಮಂಗಳವಾರ ಸಂಜೆ ದೋಣಿ ಮುಳುಗಿ ದೊಡ್ಡ ಅವಘಡ ಸಂಭವಿಸಿದೆ.
ನಾಸಿಕ್ ಡ್ಯಾಂನಲ್ಲಿ ದುರಂತ, ಐವರು ಸಾವು: ಇಗತ್ಪುರಿ ತಾಲೂಕಿನ ಭಾವ್ಲಿ ಡ್ಯಾಂನಲ್ಲಿ ಮುಳುಗಿ ಐವರು ಸಾವನ್ನಪ್ಪಿದ್ದಾರೆ. ನಾಸಿಕ್ ಜಿಲ್ಲೆಯ ಇಗತ್‌ಪುರಿಯ ಭಾವ್ಲಿ ಅಣೆಕಟ್ಟಿನ್ನು ನೋಡಲು ರಿಕ್ಷಾದಲ್ಲಿ ಬಂದಿದ್ದ ಐವರು ನೀರಿನಲ್ಲಿ ಮುಳುಗಿ ಮೃತಪಟ್ಟ ಘಟನೆ ನಡೆದಿದೆ. ಮೇ 21 ರಂದು ಸಂಜೆ ಈ ಅಹಿತಕರ ಘಟನೆ ನಡೆದಿದ್ದು, ಸ್ಥಳೀಯ ಬುಡಕಟ್ಟು ನಾಗರಿಕರ ಸಹಾಯದಿಂದ ಮೃತದೇಹವನ್ನು ಹೊರತೆಗೆಯಲಾಗಿದೆ ಮತ್ತು ಮೃತ ದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಇಗತ್ಪುರಿ ಸರ್ಕಾರಿ ಆಸ್ಪತ್ರೆಗೆ ಕಳುಹಿಸಲಾಗಿದೆ.
ದೊರೆತ ಮಾಹಿತಿಯ ಪ್ರಕಾರ, ನಾಸಿಕ್ ರಸ್ತೆಯ ಗೋರೆವಾಡಿ ಪ್ರದೇಶದಲ್ಲಿ ವಾಸಿಸುವ ಒಂದೇ ಕುಟುಂಬದ ಯುವಕ-ಯುವತಿಯರು ರಿಕ್ಷಾದಲ್ಲಿ ಇಗತ್‌ಪುರಿಯ ಭಾವ್ಲಿ ಅಣೆಕಟ್ಟಿಗೆ ಬಂದಿದ್ದರು. ನೀರಿನ ಆಳದ ಬಗ್ಗೆ ಅರಿಯದ ಅವರೆಲ್ಲರೂ ಮುಳುಗಿ ಸಾವನ್ನಪ್ಪಿದ್ದಾರೆ. ಇಗತ್ಪುರಿ ಪೊಲೀಸರಿಗೆ ಮಾಹಿತಿ ಸಿಕ್ಕ ತಕ್ಷಣ ಸ್ಥಳಕ್ಕೆ ದೌಡಾಯಿಸಿದ್ದರು. ಬಳಿಕ ಸ್ಥಳೀಯ ಬುಡಕಟ್ಟು ಜನರ ನೆರವಿನಿಂದ ಐವರ ಮೃತದೇಹಗಳನ್ನು ನೀರಿನಿಂದ ಹೊರತೆಗೆದರು. ಮೃತದೇಹಗಳನ್ನು ಶವಪರೀಕ್ಷೆಗಾಗಿ ಇಗತ್ಪುರಿ ಸರ್ಕಾರಿ ಆಸ್ಪತ್ರೆಗೆ ರವಾನಿಸಲಾಗಿದೆ. ಮೃತರನ್ನು ಹನೀಫ್ ಶೇಖ್ (24), ಅನಸ್ ಖಾನ್ (15), ನಾಸಿಯಾ ಖಾನ್ (15), ಮಿಜ್ಬಾ ಖಾನ್ (16) ಮತ್ತು ಇಕ್ರಾ ಖಾನ್ (14) ಎಂದು ಗುರುತಿಸಲಾಗಿದೆ.
ಓದಿ: ಮೈಸೂರು: ಮಲಗಿದ್ದಲ್ಲೇ ಒಂದೇ ಕುಟುಂಬದ ನಾಲ್ವರು ಸಾವು, ಸಿಲಿಂಡರ್ ಸೋರಿಕೆ ಶಂಕೆ - Mysuru Family Death:
