ಕಾಲೇಜು ತೆರೆಯಲು ಸರ್ಕಾರದ ಗ್ರೀನ್​ ಸಿಗ್ನಲ್​: ಪ್ರಾಂಶುಪಾಲರ ಅಭಿಪ್ರಾಯ ಏನು!?

ಹಾಸನ: ಕೊರೊನಾ ಎಫೆಕ್ಟ್ ನಂತರ ಇದೇ ಪ್ರಥಮ ಬಾರಿಗೆ ಪದವಿ ತರಗತಿ ಆರಂಭಿಸಲು ಸರ್ಕಾರ ಗ್ರೀನ್ ಸಿಗ್ನಲ್ ನೀಡಿದ್ದು, ಈಗಾಗಲೇ ಹಾಸನದಲ್ಲಿ ಬಹುತೇಕ ಕಾಲೇಜುಗಳು ತರಗತಿ ನಡೆಸಲು ಪೂರ್ವ ತಯಾರಿ ಮಾಡಿಕೊಳ್ಳುತ್ತಿವೆ. ವಿದ್ಯಾರ್ಥಿಗಳು ಕಾಲೇಜಿನ ಒಳಗಡೆ ಹೋಗುವ ಮುನ್ನ ಪ್ರವೇಶ ದ್ವಾರದಲ್ಲಿ ಸ್ಯಾನಿಟೈಸರ್ ಇಡಲಾಗಿದೆ. ಅಷ್ಟೇ ಅಲ್ಲದೇ ಲೆಕ್ಚರರ್ ಹಾಲ್‌ಗೆ ವಿದ್ಯಾರ್ಥಿಗಳು ಹೋಗುವ ಮುನ್ನ ತಮ್ಮ ಕೈಗಳಿಗೆ ಸ್ಯಾನಿಟೈಸರ್ ಹಾಕಿಕೊಳ್ಳಲು ಆಟೋಮ್ಯಾಟಿಕ್ ಸ್ಯಾನಿಟೈಸರ್ ಮಷಿನ್​ ಇಡಲಾಗಿದೆ‌. ಈಗಾಗಲೇ ತರಗತಿ ಒಳಗೆ ಸಾಮಾಜಿಕ ಅಂತರದಲ್ಲಿ ಡೆಸ್ಕ್ ಹಾಕಲಾಗಿದ್ದು, ವಿದ್ಯಾರ್ಥಿಗಳು ತರಗತಿಗೆ ಬಂದಂತಹ ಸಂದರ್ಭದಲ್ಲಿ ದೂರ ದೂರ ಕುಳಿತು ಪಾಠ ಕೇಳಲು ವ್ಯವಸ್ಥೆ ಮಾಡಲಾಗಿದೆ ಎಂದು ಈಟಿವಿ ಭಾರತಕ್ಕೆ ಎಂ.ಕೃಷ್ಣ ಕಾನೂನು ಕಾಲೇಜು ಪಾಂಶುಪಾಲ ಶ್ರೀನಿವಾಸ್ ಮಾಹಿತಿ ನೀಡಿದ್ದಾರೆ.