ಪಾನಮತ್ತ ಯುವಕರಿಂದ ಕಾರು ಚಾಲನೆ: ಆಟೋಗೆ ಡಿಕ್ಕಿ

ಬೆಂಗಳೂರು: ಪಾನಮತ್ತ ಯುವಕರು ಕಾರನ್ನು ಅಡ್ಡಾದಿಡ್ಡಿ ಚಾಲನೆ ಮಾಡಿ ಆಟೋಗೆ ಗುದ್ದಿರುವ ಘಟನೆ ಮಲ್ಲೇಶ್ವರಂ ಸರ್ಕಲ್ ಬಳಿ‌ ತಡರಾತ್ರಿ ನಡೆದಿದೆ. ಮೂವರು ಯುವಕರು ಕುಡಿದು ಇಟಿಯಾಸ್ ಕಾರಿನಲ್ಲಿ ಮೋಜು ಮಸ್ತಿ ಮಾಡುತ್ತಾ ರಸ್ತೆಯಲ್ಲಿ ಅತಿವೇಗದಿಂದ ಬಂದಿದ್ದಾರೆ. ಇದೇ ವೇಳೆ ಬಾಡಿಗೆ ಮುಗಿಸಿ ಮನೆಗೆ ತೆರಳುತ್ತಿದ್ದ ಆಟೋ ಚಾಲಕನಿಗೆ ರಭಸದಿಂದ ಗುದ್ದಿದ್ದಾರೆ. ಆದರೆ ಈ ವೇಳೆ ಮಾನವೀಯತೆ ಮರೆತ ಯುವಕರು ಸ್ಥಳದಲ್ಲಿ ಕಾರು ಬಿಟ್ಟು ಪರಾರಿಯಾಗಿದ್ದಾರೆ. ಇನ್ನು ಆಟೋ ಚಾಲಕನ ಸ್ಥಿತಿ ಗಂಭೀರವಾಗಿದ್ದು, ನಿಮಾನ್ಸ್ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಮಲ್ಲೇಶ್ವರಂ ಟ್ರಾಫಿಕ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಘಟನಾ ಸ್ಥಳದ ಸಿಸಿಟಿವಿ ದೃಶ್ಯ ಪರಿಶೀಲನೆ ನಡೆಯುತ್ತಿದೆ.