ಶಿವಮೊಗ್ಗ: ಕಡ್ಡಾಯವಾಗಿ ಜಿಪಿಎಸ್, ಪ್ಯಾನಿಕ್ ಬಟನ್ ಮತ್ತು ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಅಳವಡಿಕೆ ಸಂಬಂಧಿಸಿದಂತೆ ನಿಗದಿತ ಏಜೆನ್ಸಿ ಬಳಿಯೇ ಹಾಕಿಸಿಕೊಳ್ಳಬೇಕು ಎಂಬ ನಿಯಮ ಕೈಬಿಡಬೇಕು ಎಂದು ನಗರದ ಪ್ರವಾಸಿ ವಾಹನಗಳ ಮಾಲೀಕರು ಒತ್ತಾಯ ಮಾಡಿದ್ದಾರೆ.
ಜಿಪಿಎಸ್ ಮತ್ತು ಪ್ಯಾನಿಕ್ ಬಟನ್ ಅಳವಡಿಸಿಕೊಳ್ಳದಿದ್ದರೆ ಆರ್ಟಿಒನಲ್ಲಿ ವಾಹನಗಳ ಪರವಾನಗಿ ನವೀಕರಣ ಮಾಡುತ್ತಿಲ್ಲ. ಇದರಿಂದ ವಾಹನ ಮಾಲೀಕರು ಸಮಸ್ಯೆ ಎದುರಿಸುವಂತಾಗಿದೆ. ಹೀಗಾಗಿ ಸರ್ಕಾರ ಜಿಪಿಎಸ್ ಮತ್ತು ಪ್ಯಾನಿಕ್ ಬಟನ್ ಅಳವಡಿಸಿಕೊಳ್ಳದಿದ್ದರೂ ವಾಹನದ ಪರವಾನಗಿ ನವೀಕರಣಕ್ಕೆ ಅವಕಾಶ ಮಾಡಿಕೊಡಬೇಕು ಮತ್ತು ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಅನ್ನು ನಿಗದಿತ ಏಜೆನ್ಸಿ ಬಳಿಯೇ ಹಾಕಿಸಿಕೊಳ್ಳಬೇಕು ಎಂಬ ನಿಯಮ ಕೈಬಿಡಬೇಕು ಎಂದು ಆರ್ಟಿಒ ಜಂಟಿ ಆಯುಕ್ತ ಭೀಮನಗೌಡ ಪಾಟೀಲ ಅವರಿಗೆ ಮನವಿ ಸಲ್ಲಿಸಿದರು.
ಕಾರು ಮಾಲೀಕರಾದ ರಂಗನಾಥ 'ಈಟಿವಿ ಭಾರತ' ಜೊತೆ ಮಾತನಾಡಿ, "ಆರ್ಟಿಒದಲ್ಲಿ ನಮ್ಮ ವಾಹನ ನವೀಕರಣ ಮಾಡಬೇಕಾದರೆ ಅವರು ಹೇಳಿದ ಕಡೆ ಹೋಗಿ ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಹಾಕಿಸಬೇಕು, ಜಿಪಿಎಸ್ ಕೂಡ ಇವರು ಹೇಳಿದ ಕಡೆಯೇ ಹಾಕಿಸಿಕೊಳ್ಳಬೇಕು ಎಂಬುದು ಸರಿಯಲ್ಲ. ಒಂದು ಕಾರಿಗೆ ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಹಾಕಿಸಲು 2 ಸಾವಿರ ಖರ್ಚಾಗುತ್ತದೆ. ಆದರೆ, ಏಜೆನ್ಸಿಯವರು 6 ಸಾವಿರ ರೂ ಕೇಳುತ್ತಾರೆ. ಅದೇ ರೀತಿ ಜಿಪಿಎಸ್ ಅನ್ನು ಇವರು ಹೇಳಿದ ಕಡೆ ಹಾಕಿಸಿದರೆ 16 ಸಾವಿರ ರೂ ಆಗುತ್ತದೆ. ಅದೆ ಬೇರೆಕಡೆ ಹಾಕಿಸಿದರೆ 4 ಸಾವಿರ ರೂ ಮಾತ್ರ ಆಗುತ್ತದೆ. ಹೀಗಾಗಿ ಬೇರೆ ಕಡೆ ಇವುಗಳನ್ನು ಹಾಕಿಸಿಕೊಳ್ಳಲು ಅವಕಾಶ ಮಾಡಿಕೊಡಿ" ಎಂದು ವಿನಂತಿಸಿಕೊಂಡರು.
ಪ್ರವಾಸಿ ವಾಹನ ಮಾಲೀಕರ ಹಾಗೂ ಚಾಲಕರ ಸಂಘದ ಕಾರ್ಯದರ್ಶಿ ರಾಘವೇಂದ್ರ ಮಾತನಾಡಿ, "ಜಿಪಿಎಸ್, ಪ್ಯಾನಿಕ್ ಬಟನ್ ಮತ್ತು ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಅನ್ನು ನಾವು ಅಳವಡಿಸಲ್ಲ. ಇದು ನಮಗೆಲ್ಲಾ ಹೊರೆಯಾಗಿದೆ. ಶಿವಮೊಗ್ಗ ಅಷ್ಟೆ ಅಲ್ಲದೇ ರಾಜ್ಯಾದ್ಯಂತ ಇರುವ ಎಲ್ಲಾ ಪ್ರವಾಸಿ ವಾಹನದ ಮಾಲೀಕರು ಸಹ ಇವುಗಳನ್ನು ಅಳವಡಿಕೆ ಮಾಡಲ್ಲ. ಈ ನಿಯಮ ವಿರೋಧಿಸಿ ನಾವೆಲ್ಲಾ ಪ್ರತಿಭಟನೆ ನಡೆಸುತ್ತೇವೆ. ಇದರಿಂದ ರಾಜ್ಯ ಸರ್ಕಾರಕ್ಕೆ ತೆರಿಗೆ ನಷ್ಟ ಉಂಟಾಗುತ್ತದೆ" ಎಂಬ ಎಚ್ಚರಿಕೆ ನೀಡಿದರು.
ಆರ್ಟಿಒ ಜಂಟಿ ಆಯುಕ್ತ ಭೀಮನಗೌಡ ಪಾಟೀಲ ಮಾತನಾಡಿ, "ಸುಪ್ರೀಂಕೋರ್ಟ್ ಆದೇಶದಂತೆ ವಾಹನಗಳಿಗೆ ಜಿಪಿಎಸ್, ಪ್ಯಾನಿಕ್ ಬಟನ್ ಮತ್ತು ರೆಟ್ರೋ ರಿಫ್ಲೆಕ್ಟಿವ್ ಟೇಪ್ ಸೂಚಿಸಲಾಗಿದೆ. ಆದರೆ ಇವುಗಳನ್ನು ಅಳವಡಿಸಿಕೊಳ್ಳುವುದನ್ನು ವಿರೋಧಿಸಿ ವಾಹನಗಳ ಮಾಲೀಕರು ನನಗೆ ಇಂದು ನೀಡಿರುವ ಮನವಿ ಕುರಿತು ಕೇಂದ್ರ ಆರ್ಟಿಒ ಕಚೇರಿಗೆ ತಿಳಿಸಲಾಗುವುದು" ಎಂದರು.
ಇದನ್ನೂ ಓದಿ: ಕೆಂಪೇಗೌಡ ಏರ್ಪೋರ್ಟ್ನಲ್ಲಿ ಟ್ಯಾಕ್ಸಿಗಾಗಿ ಕಾದು ಕಾದು ಸುಸ್ತು: ಅವ್ಯವಸ್ಥೆ ಬಗ್ಗೆ ಪ್ರಯಾಣಿಕನ ಅಕ್ರೋಶ
