ತಮಿಳುನಾಡಲ್ಲೂ ಆರ್​ಸಿಬಿ ಫ್ಯಾನ್ಸ್​​​: ಅಭಿಮಾನಿಗಳಿಂದ "ಈ ಸಲ ಕಪ್​ ನಮ್ದೆ" ಎಂದು ದೇವರಿಗೆ ಹರಕೆ

ಕೃಷ್ಣಗಿರಿ (ತವಿಳುನಾಡು): ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ನ ಪ್ರಖ್ಯಾತ ತಂಡ ಆರ್​ಸಿಬಿ ಎಂದರೆ ತಪ್ಪಾಗಲಾರದು. ಬೆಂಗಳೂರು ತಂಡಕ್ಕೆ ವಿಶ್ವದಾದ್ಯಂತ ಮಿಲಿಯನ್​ ಗಟ್ಟಲೆ ಅಭಿಮಾನಿಗಳಿದ್ದಾರೆ. ಪ್ರತೀ ಬಾರಿ ಐಪಿಎಲ್​ನಲ್ಲಿ ಆರ್​ಸಿಬಿ ಫ್ಯಾನ್ಸ್​ ಒಂದೇ ವಿಚಾರವನ್ನು ಗುನುಗುತ್ತಾರೆ, ಅದೇ ಇ ಸಲ ಕಪ್​ ನಮ್ದೆ ಎಂದು ಐಪಿಎಲ್​ನಿಂದ ನಿವೃತ್ತರಾಗಿರುವ ಎಬಿ ಡಿವಿಲಿಯರ್ಸ್​ಗೆ ಹಾಲ್​ ಆಫ್​ ಫೇಮ್​ ಗೌರವ ನೀಡಲಾಗಿತ್ತು. ಈ ವೇಳೆ ಡಿವಿಲಿಯರ್ಸ್​ ಸಹ ಈ ಸಲ ಕಪ್​ ನಮ್ದೆ ಎಂದು ಹೇಳಿದ್ದಾರೆ. 

2008 ರಿಂದ ಇಂಡಿಯನ್​ ಪ್ರೀಮಿಯರ್​ ಲೀಗ್​ ಆರಂಭವಾಗಿದ್ದು, ಇದರಲ್ಲಿ ಮುಂಬೈ ಇಂಡಿಯನ್ಸ್​ 5 ಮತ್ತು ಚೆನ್ನೈ ಸೂಪರ್​ ಕಿಂಗ್ಸ್​ 4 ಬಾರಿ ಕಪ್​ ಗೆದ್ದಿದೆ. ಆದರೆ ಆರ್​ಸಿಬಿ ಫೈನಲ್ಸ್​ ತಲುಪಿ ಸೋಲನುಭವಿಸಿದೆ. ಕಪ್​ ಗೆಲ್ಲದಿದ್ದರೂ ಅಭಿಮಾನಿಗಳು ತಂಡವನ್ನು ಬಿಟ್ಟುಕೊಟ್ಟಿಲ್ಲ. ತಂಡವನ್ನು ಬೆಂಬಲಿಸುವುದನ್ನು ನಿಲ್ಲಿಸಿಲ್ಲ. ಪ್ರತೀ ವರ್ಷ ತಂಡಕ್ಕೆ ಕಪ್​ ಬರಲಿ ಎಂದು ಹರಸುತ್ತಾರೆ. ಇದಕ್ಕಾಗಿ ಅಭಿಮಾನಿಗಳು ನಾನಾ ರೀತಿಯ ಹರಕೆ ಸೇವೆಗಳನ್ನು ದೇವರಿಗೆ ಸಲ್ಲಿಸಿದ್ದು ಉಂಟು. 

ಈಗ, ಕರ್ನಾಟಕದಲ್ಲಿ ಅಷ್ಟೇ ಅಲ್ಲದೇ ತಮಿಳುನಾ​ಡಿನ ಅಭಿಮಾನಿಗಳು ರಥೋತ್ಸವದ ವೇಳೆ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಕಪ್​ ಗೆಲ್ಲಬೇಕು ಎಂದು ಬೇಡಿಕೆ ಇಟ್ಟಿದ್ದಾರೆ. ರಥೋತ್ಸವದ ವೇಳೆ ಬಾಳೆಹಣ್ಣಿನಲ್ಲಿ ಬೇಡಿಕೆಗಳನ್ನು ಬರೆದು ರಥಕ್ಕೆ ಎಸೆಯುತ್ತಾರೆ. ಇದೊಂದು ರೀತಿಯಲ್ಲಿ ದೇವರಿಗೆ ಬೇಡಿಕೆ ಇಡುವ ಕ್ರಮವಾಗಿದೆ. ತಮಿಳುನಾಡಿನ ಆರ್​ಸಿಬಿಯನ್ಸ್​​ ಉತ್ಸವದ ವೇಳೆ ಬಾಳೆಹಣ್ಣಿನ ಮೇಲೆ ಈ ಸಲ ಕಪ್​ ನಮ್ದೆ ಎಂದು ಬರೆದು ರಥಕ್ಕೆ ಎಸೆದಿದ್ದಾರೆ.

ಕೃಷ್ಣಗಿರಿ ಜಿಲ್ಲೆಯ ಹೊಸೂರು ಪಕ್ಕದ ಗೊಪ್ಪಚಂದ್ರಂ ಗ್ರಾಮದ ವೆಂಕಟರಮಣಸಾಮಿ ದೇವಸ್ಥಾನದ ರಥೋತ್ಸವದ ವೇಳೆ ಬೆಂಗಳೂರು ತಂಡದ ಅಭಿಮಾನಿಗಳು "ಆರ್​ಸಿಬಿ ಈ ಸಲ ಕಪ್​ ನಮ್ದೆ" ಎಂದು ಬರೆದು ದೇವರಿಗೆ ಸಮರ್ಪಿಸಿದ್ದಾರೆ. 16ನೇ ಐಪಿಎಲ್​ ಆವೃತ್ತಿ ಮಾರ್ಚ್​ 31ರಿಂದ ಆರಂಭವಾಗಿದ್ದು, ಆರ್​ಸಿಬಿ ಮೊದಲ ಪಂದ್ಯದಲ್ಲಿ ಭರ್ಜರಿ ಗೆಲುವು ಸಾಧಿಸಿದೆ. ಏಪ್ರಿಲ್​ 6ರಂದು ಕೋಲ್ಕತ್ತಾ ವಿರುದ್ಧ ಎರಡನೇ ಪಂದ್ಯವನ್ನು ಆಡಲಿದೆ.  

ಇದನ್ನೂ ಓದಿ: IPL 2023: ಅಂದು ಟೀಕೆ ಇಂದು ಪ್ರಶಂಸೆ.. ಆರ್​ಸಿಬಿ ಪರ 50ನೇ ವಿಕೆಟ್​ ಪಡೆದ ಸಿರಾಜ್​